Dutuuc 5 - Lek Jot de Jecu Kritho 1940

¹ Ku ran cɔl Anania kene tiŋden cɔl Thapeire ee ke tɔ ke ye ɣaac,

² ku both biak dɛ de ka eke ɣɛɛcke, ku kee nyic tiŋde, ku leer kake ku tɛɛu ke piny ne dutuuc nhiim.

³ Go Petero jam, Ye Anania, yeŋo nyuuce Catan ne yipiɔu ba lueth tɔr Jɔŋdiit Lajik, ku ba biak toŋ de ka eke ɣɔcke ne dom both?

⁴ Waar ŋoot en ke tɔ ke yi, ne cie kedu? ku te cin e ɣaac, ke weu cie kaku eya? Yeŋo take ekene ne yipiɔu? acie kɔc kek cake tɔr lueth, ee Nhialic.

⁵ Na ci Anania keewelke piŋ, go yuik ku thook.

⁶ Go rorthi roth jɔt, ku kuathki ne alath ku ketki biyic lek thiɔk.

⁷ Na cit cin ye thaa diak ye leer, ke tiŋde bɔ, ku kuc luɔi ci loi.

⁸ Go Petero yɔɔk, Ye lɛkne ɣa lan e ɣɛɛc we dom ne keeweuke. Go gam, Ye keeka.

⁹ Go Petero jam, Ye yeŋo e mɛt we ne them we Jɔŋdiit de Nhialic? ŋem, kɔc eke thiak monydu aatɔ ɣot thok, aabi yi bɛr ket.

¹⁰ Ku go guɔ yuik e enom thook. Go rorthi goki bɛn, goki yok ne ci thou, goki kɛt biyic lek thiɔk ne monyde lɔɔm.

¹¹ Go kanitha riɔc areet ebɛn, ku kɔc kedhia kɔc ci keekake piŋ.

¹² Ku ciit juec ku kagɛieke kaa loi ne kɔc nyin ne dutuuc cin. Goki ya gueer etok kedhia ne akuanh de Tholomonic.

¹³ Ku alɛi acin ran toŋ ci ŋeeny ci mat ke ke, ku lec keek ne kɔc.

¹⁴ Ku kɔc ci gam aa juak yic ne dun diit de roor ku diar,

¹⁵ agut te koom kek kɔc bec ne dhɔl yic ku kɛneke ne athin nhiim ku ageen bi tiɛp de Petero ke yen bar te teek en.

¹⁶ Go dun dit gueer eya ne bɛi yuil Jeruthalem biiki kɔc bec ku kɔc ci dɔm ne jak rac, go ke cɔk dem kedhia.

¹⁷ Go bɛnydiit de ka ke Nhialic go rɔt jɔt kene kɔc tɔ kene yen, yi Thadokai, go tiɛl ke thiɔŋ yic.

¹⁸ Goki dutuuc dɔm, ku tɛɛuike ɣon de dom.

¹⁹ Go malaika de Bɛnydit go ɣot liep thok ne wɛɛric, ku bii ke bei ku jiɛm,

²⁰ Ye lak kaacka yekalu, ku lɛkka kɔc ne wel kedhia ke Yepiire.

²¹ Ɣɔn yi cik ye piŋ, goki lɔ yekalu aci piny run lek weet. Go bɛnydiit de ka ke Nhialic go bɛn kene kɔc tɔ kene yen, ku tuc buluuk ku roordit kedhia ke kɔc ke Yithrael, ku thɔn keek, bi ke lɔ bɛi ɣon de dom.

²² Go atoc lɔ goki ke lɔ yok ne liu, goki dhuk ku jamki,

²³ Yi ɣon de dom acuk lɔ yok ne thiɛk, ku dutiit aakaac ɣot thok, goku wu liepku ɣot, ke cin raan thin.

²⁴ Ku na ci bɛny de yekalu ku banydit ke ka ke Nhialic keewelke piŋ, goki nhiim mum ne keek yi bi yekene cil ne ŋo.

²⁵ Go ran tok bɛn ku yook ke, Ye piɛŋka, kɔc cak taau ɣon de dom aakaac ne yekalu aaweet kɔc.

²⁶ Go bɛny lɔ ke kɔcke dic ke, ku cik ke muk areet, aariɔc ne kɔc duɔeke bi biɔk ne kur.

²⁷ Ɣɔn yi cik ke bɛi, e ke tɛɛueke ne buluuk nhiim. Go bɛnydiit de ka ke Nhialic ke yɔɔk,

²⁸ Ye we cuk yɔɔk wu cak kɔc pioc ne keerinke, ku ŋɛmka, we ci Jeruthalem thiɔŋic ne piocduɔn, ku naŋka piɔth bak riɛm de yerane dhuɔk wɔ.

²⁹ Go Petero ku dutuuc kɔk goki bɛr jam, Yi wɔ bi wel ke Nhialic dhiil ne muk tueŋ ne wel ke kɔc.

³⁰ Nhialiny de kuarkuɔ ee Yecu cɔk jɔt rɔt, man cak nɔk, ku nɔkka ne tim nom.

³¹ Yeneka cii Nhialic ye jat ne ciɛn cuecde bi ya Bɛnydit ku ye Duluɛk, bi kɔc ke Yithrael yiɛn wel de kepiɔth ku nyiɛi de karɛcken.

³² Ku wɔ ye duleek ke kaake, ku Jɔŋdiit Lajik eya, man cii Nhialic yiɛn kɔc gam welke.

³³ Ɣɔn yi piŋki keewelke, e ke gut wel kepiɔth, ku nɔŋki piɔth bik ke nɔk bik thou.

³⁴ Go ran tok kɔɔc ne buluuk ciɛl yic, muɔny Paritha cɔl Gamaliɛl, ye ran nyic looŋ, ci riɛu ne kɔc kedhia, ku yook kɔc bik ke cɔk lɔ biyic emaath,

³⁵ ku yook buluuk yela, Ye we kɔc ke Yithrael, ŋɛmka roth apiath ne luɔi bak loi enɔŋ keekɔcke.

³⁶ Ɣɔn Theuda ee rɔt jɔt, ku luel ye ye bɛny dit. Go dun de kɔc, yin ya thiɛrnyɛny ŋuan, go mat kene yen. Go nɔk a thou. Ku kɔc kedhia kɔc ci welke gam, aa thiɛi wei, ku cik beer tɔ.

³⁷ Na re ke Judath de Galili ke beer rɔt jɔt ne akol eke gɛɛreke rin ke kɔc. Go kɔc bɛr thɛl enɔŋ en, go bɛr thou. Ku kɔc kedhia, kɔc ci welke gam, kaa thiɛi wei.

³⁸ Yen emane we ya yɔɔk, ya pɛɛnka roth wei ne keekɔcke ku pɛlekeek. Na ye keewelke ku yeluɔine yeki ka ke kɔc, e kaabi riak.

³⁹ Ku na ye ke de Nhialic, e kacuk bi leu ne riɔk, duɔke we bi yen yok ne ɣɛɛt wene Nhialic.

⁴⁰ Goki gam, ku cɔlki dutuuc ku duiike ku yookki ke, Yi duɔka ber jam ne rin ke Yecu, ku pɛlike.

⁴¹ Goki jaal ne buluuk nhiim e ke mit piɔth ne ke cii Nhialic ke cɔk gum ne keeRinke.

⁴² Goki dhiac e ke ye pioc ku yiki kɔc wɛɛt ne nyindhia ne yekalu ku ne bɛi yic yi Yecu kee Kritho.