Dutuuc 25 - Lek Jot de Jecu Kritho 1940

¹ Go Petheto bɛn yepinye, ɣɔn aci nin ya diak, ke jiɛl ne Kaithareia leer Jeruthalem.

² Go tit dit kene roordit goki Paulo guɛl e;

³ laŋki bi than Jeruthalem; ŋɔŋki piɔth bik thiɛn dholic bik nɔk.

⁴ Go Petheto ke yɔɔk, ye Paulo abi dhiac ke mac ne Kaithareia, ku yen ne guɔpde abi dai lɔ eeti.

⁵ Ku beer jam, Ye cakka kɔc leu bɛn cakka ke ruɛc ɣa, ku na nɔŋ kerɛɛc tɔ kene yerane, ke ne gueele.

⁶ Ku dhiɛc ne Jeruthalem ne akol cit bɛt ku thiɛr, nin aaken wɛn tueŋ; ku jiɛl leer Kaithareia; ɣɔn miak ke nyuc ne thony de luɔk nom, ku jiɛm bi Paulo bɛi.

⁷ Ɣɔn ye Paulo ye bii, ke Judai eke bɔ ne Jeruthalem kaac kene yen, ku gueelki ne gueel diit ci kut, ka cik kek ke yithken leu ne nyooth cok;

⁸ go Paulo bɛr jam, Ye kacin kerɛɛc ca wuɔc necok, naa looŋ ke Judai, ku naa yekalu, ku naa Kaithar.

⁹ Go Petheto, ye piɔu naŋ bi Judai piɔth ya miɛt, go Paulo thiec, Ye ba lɔ Jeruthalem, ku bi yi lɔ luɔkluk thin ne ɣanom ne yegueele?

¹⁰ Go Paulo jam, Ye an ye kɔɔc ne luŋ de Kaitharic, yeneka bene ɣa lɔ luɔkluk thin: acin kerɛɛc ca wac Judai, na cak ya yi, e kanyic areet.

¹¹ Na nɔŋ ke ca wuɔc ku kerɛɛc ca loi cɔk ɣa thou, ke an ce laŋ ba deeny: yen na cin yith ke gueel guele ɣɛn ne keekɔcke, e kacin ran leu an ne yin ke, a bik piɔth lɔyum. Kaithar eka ya ɣoi.

¹² Go Petheto lɔ loŋ kene buluukke, ku bii, jiɛm, Ye na ye Kaithar yene ɣoi, ke yin bi lɔ enɔŋ Kaithar.

¹³ Ɣɔn ye akol kɔk yi cik bɛr lɔ, ke yi Agiripa melek kene Berenike ɣeet Kaithareia, ku thiecki Petheto.

¹⁴ Ku dhiacki eeti ne akol juec, go Petheto ka ke Paulo kedhia ciɛr melek, jiɛm, Ye raan katɔ etene, ran e nyiɛŋe ne mukic ne Pelik:

¹⁵ yen man, na waar taa ne Jeruthalem, ke banydit ke ka ke Nhialic kene roordit ke Judai bɔ, yi ba ben luɔkwei.

¹⁶ Guɔ ke yɔɔk, Ya kacie luɔi de Romai bi ran ci guɛɛl guɔ gam, ke ŋoot ke ken yethok tuɔm ke kɔc gueel e, lan ben rɔt leu ne kuny ne ka eke gueeleke yen.

¹⁷ Goki bɛn eene. Ɣɔn miak ke an nyuc ne thony de luk nom, caa gaau, ku jaam ya biiye raan.

¹⁸ Wen yi kɛɛcki, kek kɔc gueel e, ke cik gueel ne karɛc eke ca thɔɔŋ;

¹⁹ ke gueelki ne kaken ke duɔr, ku toŋ cɔl Yecu, ne ci thou, yene ye Paulo jam ye kapiir.

²⁰ Guɔ car ban keekake caar kuc; guɔ thiec ne lɔ ben lɔ Jeruthalem, bi lɔ luk thin ne keekake.

²¹ Wen ke ɣoi tiɛt de luŋ de emperɔr, guɔ luel bi muk agut te tuɔc an en enɔŋ Kaithar.

²² Go Agiripa Petheto yɔɔk, Ye an nɔŋ piɔu piŋ de wel ke yerane ne guɔpdie. Go jam, Ye ke kaabake piŋ miak.

²³ Ɣɔn miak ke Agiripa kene Berenike e ke bɔ ne dheeŋ dit, leki te de luk kene bany dit ke rɛm ku roordit ke baai; go Petheto Paulo cɔk coole bi bɛn.

²⁴ Ku jiɛm, Ye melek Agiripa, ku we kɔc wedhia we kɔc tɔ eene, yeran ŋɛmkane ee cii Judai kedhia bɛn enɔŋ an ne Jeruthalem aɣet etene, cotki, yi kace piath bi yerane bɛr piir.

²⁵ Guɔ ke bi e cɔk thou cuɔk yok: wen ye ɣoi emperɔr, guɔ luel ya kaba tuɔc.

²⁶ Ku an cin cok bake gar bɛnydie juɛr ke yen. Yen kaca bɛi ne wenhiim, agut yin yin melek Agiripa, ba naŋ ke ba gɔɔr te cene e caar.

²⁷ Tooc de ran ci muk ku cin ke de gueel gar, ee yic pial.