Dutuuc 16 - Lek Jot de Jecu Kritho 1940

¹ Ku ɣeet Derbe eya ku Luthura: ŋem, ranpioce ee tɔ thin, cɔl Timotheo, wen de tiŋ ci gam de Judai; ku ye wun muɔny Giriki.

² Yerane ee yene jam apiath ne mɛɛthkeek tɔ ne Luthura ku ne Yikonion.

³ Go Paulo piɔu naŋ bi cath kene yen; ku loom ku ŋoot, ne nyiny nyice Judai ke yepane yen kedhia ke wun ye Giriki.

⁴ Wen e ke cath ne bɛi yic, gɛmki looŋ yinki ke kɔc bik ke muk, looŋ ci dutuuc ku roordit tɔ ne Jeruthalem ke luel.

⁵ A go gam de kanithai jal lɔ ke rir, ku ye ke jɔp yic ne nyindhia.

⁶ Goki lɔ teek yi Purugia ku Galatia, ne yi bik pioc ne Athia, go ke peen ne Jɔŋdiit Lajik;

⁷ ɣɔn yi ɣetki Muthia, e ke them lɔ Bithunia; go Jɔŋdiit de Yecu ke peen;

⁸ goki Muthia waan leki Toroa.

⁹ Go Paulo nyuɔth ne wɛɛric yela; Ŋem ran de Makedonia ne kaac, lɛŋ en jiɛm, Ye bar Makedonia, tem wɛr, ba wɔ ben kony.

¹⁰ Na wen ci nyuɔth ŋem, ke wɔ dɔc lɔ Makedonia kɔɔr, cɔlku wuu ye Nhialic e ci wɔ cɔɔl, buk ke lɔ piɔc ne welpiath.

¹¹ Goku kɛɛc riɛi ne Toroa, ku cithku wɔnhiim ɣetku Thamotharake, ɣɔn miak ke wɔ lɔ Neapoli;

¹² ku berku lɔ Pilipoi, pandit ne bɛi nhiim kedhia, ee pan de Makedonia, pan ci ɣap ne Romai: goku ceŋ thin ne akol juec.

¹³ Ɣɔn ne kol ye akol de thabath goku lɔ biyic ne baai thok, loku ne wɛryɔu, te cɔlku wuu ye te de lɔŋ; loku ku nyuucku piiny, ku weetku diar ci gueer thin.

¹⁴ Go tiŋ toŋ cɔl Ludia, tiɛŋ meɣony ye wal ŋook ɣaac, tiŋ de pan cɔl Thuatira, tiŋ ye Nhialic door, go wɔ piŋ: go Bɛnydit liep piɔu bi ka luel Paulo ke piŋ.

¹⁵ Ɣɔn aci baptith kene kɔcke, go wɔ lɔŋ jiɛm, Ye na calke wɔ ya dhiac ka gam Bɛnydit, ke we baka ɣondie bii we ceŋ thin. Yen wɔ dam piny yewɛte.

¹⁶ Wen ke wɔ te de lɔŋ, goku rɔm wɔne nyan nɔŋ jɔŋ de car, ye kɔcken weu juec loom ne wel yeke luel.

¹⁷ Go wɔ kuany cok wɔne Paulo jiɛm, Ye keekɔcke kaaye awuut ke Nhialiny Dit Areet, kaaweet we ne dhol e luak.

¹⁸ Ye dhiac ke loi yeya ne akol juec. Go Paulo piɔu thook, ku yook jɔk, Ye yin ya yɔɔk ne rin ke Yecu Kritho ya bar bei ne yeguɔp. Go bɛn bei nelantoŋtɛi.

¹⁹ Na wen ŋem kɔcken en ke cin ke bik kek weu bɛr ya yok, goki Paulo dɔm ku Thila, ku thelike ne tiaiic ne bany ke baai nhiim.

²⁰ Ana yi cik ke laar ne meluuk nhiim, e ke jam, Yi keekɔcke, kaaye Judai, aayɔŋ panda,

²¹ aaweet wɔ ne luɔi ce piath buk ya gam ku buk ya loi, wɔ Romai.

²² Go duut rɔt jɔt teer ke ke: ku reet meluuk alɛthken bei, ku cɔkki ke yupke ne lɔc.

²³ Na wen cik ke dui ne dui dit, e ke cuateke ɣon de dom, ku yookki dutit bi ke tiɛt ɣot:

²⁴ na ci dutit e piŋ, e ke cuɛtke ɣon thin, ku riit kecok ne tiim ke muk.

²⁵ Wen ne wɛɛric ke yi Paulo ku Thila e ke laŋ ku ketki diɛt ke Nhialic, ku piŋ keek ne kɔc kɔk ci dɔm;

²⁶ go piny rɔt met ne met dit, ku mɛt meen ke ɣon de dom: go thok rɔt dai liep ebɛn; ku ka eke ceneke kɔc kedhia duut aa thook luɛl.

²⁷ Go dutit puɔc, ke ŋem thook e ke ɣɔɔr, go theep miɛt bei ye ben rɔt nɔk, cɔɔl ye ci kɔc ci dɔm kat.

²⁸ Go Paulo coot areet jiɛm, Ye duɔne rɔt nɛk: wɔ tɔ.

²⁹ Go mac cɔɔl, ku yɔɔt ɣot, leer ku ciim piny ne Paulo cok ku Thila, ke lɛthe ne riɔc,

³⁰ ku bii ke bei, ku jiɛm, Ye banycie, ba ŋo loi bi a luɔk?

³¹ Goki jam, Yi na gam Yecu Bɛnydit, ke yin bi luɔk, yin wene kɔcku.

³² Ku lekki wɛt de Bɛnydit kene kɔc tɔ ɣonde kedhia.

³³ Go ke dai laar, leer ku wɛɛk ɣonetook ke dui; goki dai baptith ke kɔcke kedhia.

³⁴ Ku leer ke ɣonde, le ke yiɛn miɛth, cii piɔu jal miɛt kene kɔcke kedhia ne gam cik kek Nhialic gam.

³⁵ Ɣɔn miak aci piny run, ke meluuk toc caweec lek jam, Yi lony keekɔcke.

³⁶ Go dutit welken ciɛr Paulo jiɛm, Ye meluuk aa tuuc yi luɔny we: yen baka bei, ku laka ne dɔɔr.

³⁷ Go Paulo jam, Ye kaa wɔ dui ne kɔc nyin ke ke ken wɔ guɔ luɔkwei, wɔ Romai, ku cuɛtki wɔ ɣon de dom; bik wɔ bɛr cuat biyic ne muɔny emane? acie yen; ne ke bɔ ne gupken bik wɔ ben laar biyic.

³⁸ Go caweec keewelke lɔ lɛk meluuk: goki riɔc, ne piŋ cik kek ke piŋ e ke ye Romai;

³⁹ goki bɛn ku laŋike; ku leerike biyic, ku yookki ke bik jaal panden.

⁴⁰ Goki jaal ɣon de dom, ku leki ɣon de Ludia: ku na ɣɔn ci mɛɛthken ke ŋem, goki ke lɛk wel dut kepiɔth, ku jiɛlki.