Dutuuc 12 - Lek Jot de Jecu Kritho 1940

¹ Ku keeakolke aacii Kerod melek ke yeciin thiɛu kɔc ke kanitha bi ke yɔŋ.

² Go Jakob manhe ne Jɔn nɔk ne theep.

³ Ɣɔn ye ci yeluɔine ŋem ne mit ne Judai piɔth, ke beer Petero dɔm eya. Keeakolke aake ye akol ke cuin cinic awuro.

⁴ Ɣɔn ye ci ye dɔm, ke tɛɛu ɣon de dom, ku yin lathkeer keethiɛr ku rou, bii ŋuan ya tiit ku tiit ŋuan; nɔŋ piɔu bi bɛi bei ne kɔc nhiim te cii Ret thok.

⁵ Goki Petero mac ɣon de dom, ku dhiac kanitha ke lɔŋ Nhialic ne yen.

⁶ Ku ci Kerod piɔu naŋ bi bɛi bei, ke Petero tɛc ne lathkeer ciɛl yic keerou ne yewɛɛre ke ci rek ne joth keerou: ku tit dutiit kɔk ɣon de dom thok.

⁷ Ku ŋem, malaika de Bɛnydit ee bɛn enɔŋ en, ku mer ɣɛɛr ɣon de domic: ku biɔk Petero lɔɔm, ku puɔc, ku jiɛm, Ye dɔi rɔt jɔt. Go joth loony wei ne yecin.

⁸ Go malaika yɔɔk, Ye ruɔke dɛldu ku war. Go ke loi. Ku beer jam, Ye taaue alanhdu ne yikɔu, ku kuany acok.

⁹ Go lɔ biyic, ku kuɛny cok; ku kuc ke cii malaika loi ne ye yic, cɔɔl ye ye nyuɔth.

¹⁰ Ana yi cik ɣoot ke dutiit keerou reet, e ke lɔ ne thuɔŋ weeth thoŋ lɔ biyic; go thok rɔt liep: goki lɔ biyic, ku tekki ne dhol tok; go malaika leu wei.

¹¹ Ɣɔn ye Petero ye ci ye nyic, ke jam, Ye kanyiɛc emane neyic, Bɛnydit ee malaikade tooc bi a luɔk ne Kerod ciin, ku ne Judai piɔth kedhia.

¹² Ku na ci yeluɔine tak, ke lɔ ɣon de Mari, man e Jɔn cɔl Mak; cii kɔc juec gueer thin lɔŋki.

¹³ Go Petero ɣot tɔɔŋ thok, go nya bɛn bi ben piŋ, nyan cɔl Roda.

¹⁴ Ana ye ci Petero nyic ror, ke ce thok liep ne miɛt cen piɔu miɛt, riŋ ciɛn dhuk leer ku yook kɔc ye Petero akaac ɣot thok.

¹⁵ Goki yɔɔk, Ya yin miɔl. Go dhiac ke dhuk thin, Ye katɔ yeya. Goki bɛr luel, Ya kee malaikade.

¹⁶ Go Petero dhiac ne tɔŋ ɣot thok: ana yi liepki thok, ku yi ŋemki, e ke gɛi.

¹⁷ Go ke nieu ne yeciin bik mim, ku ciir ke bii cii Bɛnydit ye bɛi bei ɣon de dom. Ku yook ke, Ye laka lɛkka Jakob keekake ku mɛɛthkuɔ. Ku jiɛl leer te dɛ.

¹⁸ Ɣɔn ye piny ye run, ke lathkeer liɛp roth ne ke ci Petero nyaai.

¹⁹ Ɣɔn ye Kerod ye ci ye kɔɔr, ku cii yok, ke car dutiit, ku yook kɔcke bik ke nɔk. Go jaal ne Judaya leer Kaithareia lee ceŋ thin.

²⁰ Ɣɔn ke Kerod ke kec piɔu ne kɔc ke Turo ku Thidon. Goki lɔ enɔŋ en netok, ku cɔkki Bulatheto, ran diit de ɣon de melek, cɔkki ye mɛtheden, kɔrki dɔɔr, panden ee yene miith loom piny de melek.

²¹ Ku kol tok ke Kerod tɛɛu alɛth ke melek, ku nyuuc ne thonyde nom, ku cir ke wel.

²² Go kɔc coot, jamki, Ya kee ror de nhialic, ku kacie ror de raan.

²³ Go malaika de Bɛnydit dai nɔk, ne ke ken en Nhialic yiɛn nuɔm: ku ciɛm liɔk, ku jiɛl tiɛpde.

²⁴ Go wɛt de Nhialic jal cil kut.

²⁵ Ku dhuk Baranaba kene Thaulo dhukki ne Jeruthalem, ɣɔn cik kek luɔiden thol, ku leerki Jɔn ci cɔɔl Mak.