Dutuuc 11 - Lek Jot de Jecu Kritho 1940

¹ Ku dutuuc ku mɛɛth tɔ ne Judaya acik piŋ ke kɔc ke Juurkɔk ci wɛt de Nhialic gam.

² Ɣɔn ye Petero ye ci lɔ Jeruthalem, ke kɔc ke ŋuɔt e ke teer kene yen,

³ jamki, Yi yin ci lɔ enɔŋ kɔc kene ŋoot, ku came we ke.

⁴ Go Petero ke nyuɔth gol e gɔle kaŋ agut kueny kuɛny kek kecok, jiɛm,

⁵ Ye an ee tɔ pan cɔl Jopa laŋ: guɔ nyuɔth, ŋɛm tony ne bɔ piny ne cit alanh diit tiiŋe piny nhial ne ŋep keeŋuan; go ɣeet enɔŋ a:

⁶ guɔ ya liɛc ka ŋem lai ye cok ŋuan ku lai rol ku ka mol ne keyoth ne piny nom ku diɛt nhial.

⁷ Ku piɛŋ ror ne jam yook an, Ye jɔt rɔt Petero, nakne ku cuɛte.

⁸ Guɔ jam, Ya kacie yen, Bɛnydit: acin kecool rɛɛc ci kan lɔ ne ɣathok.

⁹ Go ror bɛr dhuɔk a nhial, Ye ke cii Nhialic ci cɔk diik duɔne cɔk rac.

¹⁰ Ku yeluɔine kee dhuɔk naadiak: ku beere kaŋ kedhia beere ke miɛɛt nhial.

¹¹ Ku ŋɛmke, kɔc keediak kaa piac bɛn ɣon ta an thin, kɔc eke tocke ne Kaithareia tuuce ke enɔŋ an.

¹² Go Jɔŋdit ɣa yɔɔk ye ba lɔ wɔ ke ka ce diɛr. Ku ruɛce ɣɛn eya ne keemɛɛthcieke keedhetem; goku lɔ ɣon de raan:

¹³ go wɔ nyuɔth ŋem cen malaika ŋem ɣonde ne kaac ku yook, Ye tuɔɔce kɔc Jopa thɔn Thimon, ran ci cɔɔl Petero;

¹⁴ kabi yi lek wel, wel bi yi kony ku kɔcku kedhia.

¹⁵ Ana ya gal jam, ke Jɔŋdiit Lajik lony kepiɔth ci wɔɔk ɣɔn ne acirnom.

¹⁶ Guɔ anom ciɛt ne wɛt de Bɛnydit ne ci luel, Ye Jɔn ee kɔc baptith ne piu; ku week we bi ya baptith ne Jɔŋdiit Lajik.

¹⁷ Yen na ci Nhialic ke miɔc ne miɔc e miɔc en wɔɔk, wɔ kɔc ci Yecu Kritho Bɛnydit gam, ke ɣan yeŋa a ba teer wɔ Nhialic?

¹⁸ Na cik keewelke piŋ, e ke mim, ku lecki Nhialic jamki, Yi Nhialic ee Juurkɔk eya yiɛn wel de kepiɔth bik piir.

¹⁹ Ku kɔc ci thiɛi wei ne ŋet ne bɔ ne Thepano aa keny ɣetki Poinike, ku Kupurio ku Antiokia, nyoothki wɛt nyuthki Judai kepɛc ku cin jur dɛ.

²⁰ Ku kɔc kɔk ke keek, eke ye kɔc ke Kupurio ku Kurene, ɣɔn acik ɣet Antiokia, e ke jam kene Girikii piocike ne Bɛnydit Yecu.

²¹ Go ciin de Bɛnydit tɔ ke keek; go kɔc juec gam, ku welki roth Bɛnydit.

²² Ku thoŋ de yeluɔine ee lɔ ne kanithayic kanitha tɔ ne Jeruthalem: goki Baranaba tooc bi ɣet Antiokia:

²³ ɣɔn ye ci lɔ, ku ye ŋem athiɛi de Nhialic, go piɔu jal miɛt; ku yook ke kedhia bik dhiac kene Bɛnydit e ke rir piɔth:

²⁴ ee ye ran piath, ku ci thiaŋ ne Jɔŋdiit Lajik ku gam; ku kɔc juec aa roth juɛk Bɛnydit.

²⁵ Go Baranaba jal leer Tartho le Thaulo kɔɔr:

²⁶ ɣɔn ye ci ye yok, ke leer Antiokia. Ku tɔ, mɛtki kene kanitha ne run tok ebɛn, ku piocki kɔc juec; ku kɔcpiocke kaa kan cɔɔl Kirithanoi ne Antiokia.

²⁷ Ku keeakolke nebii aa jaal ne Jeruthalem lek Antiokia.

²⁸ Ku ran toŋ de keek, cɔl Agabo, ee rɔt jot, ku nyuuth kɔc ne Jɔŋdit ye kabi naŋ pawɛɛr ne piny nom ebɛn: go pawɛɛr go bɛn ne run de Kulaudio.

²⁹ Go kɔcpiocke goki piɔth naŋ bik kony tuɔc mɛɛthken ceŋ ne Judaya, ne leu leue kaken roth:

³⁰ a goki loi yiya, toocki kony tucki roordit, leere yi Baranaba ku Thaulo.