2 Timotheo 4 - Lek Jot de Jecu Kritho 1940

¹ Yin ya yɔɔk ne Nhialic nyin, ku ne Yecu Kritho nyin, yen yen man bi kɔc piir ku kɔc ci thou luk, ku ne tuɔlde ku ceŋde;

² ya ye weet ne wɛt; ye kok ne luɔi te yin en leu, ka te cin e ye leu; ye jɔny, ye weei, ku ye yook, ne guɔmdit ebɛn kene pioc.

³ Akol aabi bɛn akol bik kek pioc yic cuɔk ye piŋ; ku kaabi roth ya kuɔt dupioc ke kɔɔr rɛɛcden, ne ke ye kek keyith thiɛu;

⁴ ku kaabi yic ya waan, ku yiki roth wɛl akokool.

⁵ Ye rɔt muk apiath ne kaŋ kedhia yic, ye karir guum, ye luɔi de dupiony de welpiath loi, cɔk luɔidu ye rɔt dhiɛl.

⁶ An ci rɔt thol ne gɛm, ku koldien de jal ee ɣeet.

⁷ An ci tɔŋ piath, thɔr, an ci cath thol, an ci gam dot:

⁸ ku emane alɔgut an ci tau gol de lajik, man bii Bɛnydit, duluŋ lajik, yiɛn ɣa ne yekole: ku kacie ɣɛn atok, ee ya raan ebɛn ran e ci tuɔlde ya nhiar.

⁹ Them areet ba dɔc bɛn enɔŋ ɣa:

¹⁰ Demath ee ɣa nyaŋ nyinkuɛɛny, ne nhiɛr nhiɛr en ka ke yepinye, ku ler Thethalonike; ku lɔ Kerethke Galatia, ku lɔ Tito Dalmatia.

¹¹ Ee Luk yetok eka tɔ kene ɣɛn. Lom Mak ku bar wene yen: ee naŋ kony enɔŋ ɣɛn ne luɔi.

¹² Ku Tukiko aca tuɔɔc Epetho.

¹³ Ku lueth alanh de kɔu ɣɔn ca nyaaŋ Toroa enɔŋ Karpo, ku kitaap, ku waragaak eya tiit yin ke nyin.

¹⁴ Alekandaro muɔny ajuɔŋ ee ɣa luɔi rɛɛcdit areet: Bɛnydit abi ye riɔp ci luɔide;

¹⁵ ku ye rɔt ŋem ne yen eya; ne ke cen teer areet ne welkuɔ.

¹⁶ Gel tueŋdien de rɔt ee cin en ran ci ɣa kony, kɔc kedhia aake ci ɣa waan: eeyabi ya cuɔk ye kuɛn ke.

¹⁷ Ku Bɛnydit ee kɔɔc ne ɣalɔɔm, ku cɔk ɣa rir; bi wɛt bi cɔk piŋ ne ɣɛn, ku bi Juurkɔk kedhia bik piŋ, a go ɣa luak bei ne koor thok.

¹⁸ Bɛnydit abi ɣa ya luak bei ne luɔi racic ebɛn, ku ye ɣa luak ne ceŋden de pan nhialic: eeyabi nuɔm bi ya tɔ kene yen agut athɛɛr wada. Amen.

¹⁹ Muɔth yii Pirithika kene Akula, ku dhien de Onethiporo.

²⁰ Erathato arɛɛr ne Korintho: ku Toropimo aca nyaaŋ Mileto ke bec.

²¹ Them areet ba dai bɛn enɔŋ ɣɛn aŋoot mɛi wei. Yin ye Eubulo muɔth, ku Pude, ku Lino, ku Kalaudia, kene mɛɛth kedhia.

²² Eeyabi Bɛnydit bi ya tɔ kene tiɛpdu. Eeyabi athiɛi ya tɔ kene yin.