2 Timotheo 1 - Lek Jot de Jecu Kritho 1940

¹ Paulo, metuny de Yecu Kritho ne piɔn de Nhialic ne ke de keciluel de piir ye tɔ ne Yecu Krithoic,

² alek Timotheo, mɛnhdien nhiar: Ya keeyaba naŋ athiɛi, ku kac de piɔu, ke dɔɔr, enɔŋ Nhialic Wun ku Yecu Kritho Bɛnydiitda.

³ Ɣan ye Nhialic leec, Nhialiny ne cak ne lui ɣɔn ne kuarkuɔ ne nyiny lɔcar de piɔu, ne ciit yan anom cool ne ciit ne yin ne lɔŋdie, ne wɛɛr ku akɔl,

⁴ ya yi ŋaŋ ne ŋem, ku ɣan ye piu ke yinyin tak, bi ɣa ya thiɔŋ ne yum de piɔu.

⁵ Ɣan ci ɣanom ya ciɛt ne gam yic ye tɔ ne yiyic: gam e kɔn ya tɔ kene Loyith kɔɔkdu, ku kene moor Eunike; ku kene yin eya anyiɛcic.

⁶ Yen yin ya cɔk ciit yinom ba miɔc de Nhialic ba ya kat, miɔc ye tɔ ne yiyic ne kɛn de ɣacin.

⁷ Nhialic ee ce wɔ yin piɔn de riɔc; ee yin wɔ piɔn de riɛr ku nhiɛr ku muŋ de roth.

⁸ Yen duɔne nyin ye riɔc ne luɛl de Bɛnydiitda, ku ne ɣɛn ɣan keden ci mac: ye karir guum ne welpiath ne ke de riɛr de Nhialic;

⁹ man ci wɔ luɔk, ku cɔɔl wɔ ne cɔt lajik, ku kacie ke de luɔida yen ee cɔɔl en wɔɔk, ee cɔl wɔɔk ne ke de yepiɔu ku athiɛi, ke e ci yiɛn wɔɔk ne Yecu Krithoic aŋoot katueŋ wei,

¹⁰ ku kee jal nyuɔɔth emane ne tuɔl de Duluɛŋda Yecu Kritho, yen man ci thou nyaai, ku bii yi piir kene cuɔkluel ne ɣɛɛric ne welpiath,

¹¹ ka cene ke ɣɛn cɔk ye duweet, ku yan ke metuc, ku ya dupioc.

¹² Ku yekene eya yeneka yan keekake guum: ku an ken nyin ya riɔc: ne nyiny nyiɛc ɣan yen yen man ca gam, ku kanyiɛcic ke bi ke ca tau en ya leu ne gel ne kol bɔ.

¹³ Ye cok ke wel yith cake piŋ enɔŋ an ye ke muk, ne gam ku ne nhiɛr ka ye tɔ ne Yecu Krithoic.

¹⁴ Ye kepiɛth e ci tau yi ye gel ne Jɔŋdiit Lajik man ye ceŋ ne wɔyic.

¹⁵ Yekene kanyic, wɛn cii kɔc ke Athia kedhia ɣɛn waan; kɔc nɔŋ yi Pugelo ku Kermogene.

¹⁶ Eeyabi Bɛnydit kac de piɔu ya nyuɔth dhien de Onethiporo: ee ɣa dai rɔɔmic, ku kee ken nyin ya riɔc ne joth ceneke ɣa duut;

¹⁷ ku, ɣɔn tɔ en ne Roma, ke kee ci ɣa kɔɔr areet, go ɣa yok

¹⁸ (eeyabii Bɛnydit ya cɔk yok kac de piɔu de Bɛnydit ne kol bɔ); ku ka juec cen ke lui thin ne Epetho, aanyic keek ejik.