2 Petero 3 - Lek Jot de Jecu Kritho 1940

¹ Yekene, kɔc nhiarke, yenekee thon de rou gar week: ku ne keyic keerou, aacan ke we cuɔth piɔth bak wenhiim ya ciɛt;

² bak wel eke luelke ɣɔn ne nebii lajik ya tak, loŋ de Bɛnydit ku Duluɛk ne dutuuckuɔn yic:

³ ku yaka nyic, lan bii mebuui bɛn kene buiden ne kolciɛn, e ke cath ne luɔi rɛɛcdenic,

⁴ ku yeki jam, Yi wɛt de bɛnde eko? elan e thoue kuarkuɔ akene kaŋ kedhia roth waar, aacit ete ɣɔn ciɛke kaŋ.

⁵ Yekene acik cok ne kuc, lan e nɔŋ en nhial ɣɔn thɛɛr, ku ci piny rɔt cuɔk bei ne piu yic ku ne piu ciɛl yic, ne wɛt de Nhialic;

⁶ ku ne yekene ee ci piny nom kum ne piu, ku riɛɛk:

⁷ ku nhial tɔ emane, kene piny tɔ emane, aa tɔɔu bik mac tiit, aa wɛk kol de luk, ku riaŋ de kɔc rac.

⁸ Duɔka nhiim ye maar ne yetoŋe, kɔc nhiar keek, kol tok acit run keebianabur enɔŋ Bɛnydit, ku run keebianabur aacit kol tok.

⁹ Bɛnydit aci rɔt ye dak keciluel, ci man ye kɔc kɔk rɔtdɛɛk tak; ee kac de piɔu luut ne week, aci ye kɔr ne toŋ bi liu, ee bi raan ebɛn yepiɔu ya wel.

¹⁰ Ku akol de Bɛnydit abi bɛn ci rueny; nhial abi wuɔɔc wei ne awuɔu dit, ku kadit nhial abi maar ne alɛth dit, ku piny kene ka yeke loi abi nyop wei.

¹¹ Na bi keekake bik liu kedhia yila, ke we bi roth dhiɛl ke we ye kɔc kaŋo ne ceŋ lajikic, ku piir de Nhialicic,

¹² ku yaka bɛn de kol de Nhialic kɔɔr ku yaka cok ŋɔɔth, kol bene nhial cuɔny ne mac bi maar, ku mɛr kadit nhial ne alɛth dit?

¹³ Luɛlden cen e luel, ee ye wɔ nhial jot ŋɔɔth kene piny jot, ka ye lajik ke ceŋ thin.

¹⁴ Yen, kɔc nhiar keek, na yaka keekake kɔɔr, ke we yaka lui areet bi we yok ne dɔɔric, te cin acuɔl ku rɛɛc ne yenyin.

¹⁵ Ku yaka nyic ke guɔm diit de Bɛnydiitda ye luak; ci man ci wanmathdɛn nhiarku Paulo ye gar week eya ne nyinyden ci yiɛn en;

¹⁶ ku kee tɔ eya ne thoonke yic kedhia, te jiɛm en ne keekake ne keyic; aaci gɔɔr keekake, ku kɔk ke keek aanɔŋ yic ka rir ne dot, ka ye kɔc kuc kaŋ ke ku kɔc ye niɔɔp ke dhɔŋ yic, ci luɔi ye kek ye luɔi kɔk ke kacigɔɔr, agut en riakki roth kepɛc.

¹⁷ Yen week, kɔc nhiar keek, na yaka keekake kan nyic, ke we yaka roth ŋem kɛlke we bi nyaai ne awany de kɔc rac, ku jalka yuik ne kɔcduɔnic.

¹⁸ Yaka cil ne athiɛi de nyiny de Bɛnydiitda Yecu Kritho man ye Duluɛŋda. Eeyabi nuɔm bi ya tɔ kene yen ne yemane ku agut en athɛɛr. Amen.