2 Petero 2 - Lek Jot de Jecu Kritho 1940

¹ Ku nebii ke adhuɔm aake tɔ eya ne kɔc yic, ci man de week eya dupiooc ke adhuɔm aabi roth ya jɔt ne weyic, ku yeki ka riɔk gam bɛi ne weyic neluɔɔŋ, ku yeki Bɛnyden jai eya, man ci ke ɣɔɔc, bik riaŋ rac bɛi ne kenhiim,

² ku kɔc juec abi luɔi rɛɛcden biɔth; ku dhol ye yic abi ya jaam arac ne keek.

³ Ku weŋ ye kek weu wak abi we ya ɣɔɔc ne wel ke adhuɔm. Lukden wei ee dhiac ke bɔ ete ɣɔn, ku riaŋden acie lɔŋ.

⁴ Na ken Nhialic malaikai ya pal rɛɛcden, ku ye ke cuat ne giɛnaic, ku tɛɛu ke ne adhum col yic yic, bik luk ya tiit;

⁵ ku ken piny thɛɛr ɣɔn puɔl, ku luɛk Noa kene kɔc kɔk keedherou, man ye duwen de ke lajik, ɣɔn mou en kɔc rac ne piny nom;

⁶ ku wel bɛi ke Thɔdom ku Gɔmora e ke ye ŋeth, luk weiden e ye riaŋdit, bi ya nyiin bik kek kɔc rac ya nyiɛn,

⁷ ku luɛk Lɔt ran lajik, man e ci piɔu dhiau areet ne luɔi rɛɛc de piir tɔ ne piny nom

⁸ (yeran lajiŋne ɣɔn ceŋ en ne keyic, na ye ŋem keek, ku piŋ keek, ke lajiŋden de tiɛpde ɣok ne nyindhia ne kuɔc luɔiden, ku kuɔc muŋ de loŋ):

⁹ ku Nhialic anyic luaŋ yen kɔc lajik luak bei ne themic, ku cɔk kɔc rac cɔk tɔ ne wɛiic agut kol de luk;

¹⁰ ku kaaye keek man ye cath ne luɔi de guɔp, ku kɔɔr rɛɛc de guɔp yene roth cɔk col, ku ye riɛr tɔɔnic. Aaye ŋeeny, ku yiki roth ŋaar ne rɛɛcic, ku cik ye riɔc ne bui de banydit nɔŋ nuɔm.

¹¹ Na cak ya malaikai, ka man ye ke wuɔr ne riɛr ku dit, ke kaaci ke ye guɛl lɛɛtike ne Bɛnydit nom.

¹² Ku keekake, acit ka eke cakke e kee cin nhiim, ku ci ke dhieth e kee ye lai bi ke ya dɔm, ku nɛk ke, ku yeki jam areet ne ka kucike, ku riɔkden abene ke riɔk necok,

¹³ te cin kepiɛth yokki ne luɔi rɛɛcdenic; aaye kɔc ye piɔth lɔyum ne diɛr rɛɛc kol, aaye ka col ku ka ci riak, ku yeki roth kuɛth rɛɛc ne miɛth de nhiɛr ku te ye kek cam kene week;

¹⁴ ku cik nyin thiaŋ ne kɔr de abɛɛl, nyin ci rɛɛc ye puɔl, ku yeki tip ce kaac apiath deep, ku yeki naŋ piɔth ye wak: yeki mith ke aciɛn;

¹⁵ aa dhol piath nyaŋ wei, ku yecki wei, ku kuanyki Balaam wen de Beor cok, man e nhiar riop de rɛɛc;

¹⁶ ku ci waai ne rɛɛcde: a go akaja jam ne ror de raan bi beel de nebi peen.

¹⁷ Keekake aaye awaŋgaak cin yic piu, ku yeki rur ye yom kuath; cike tau cuɔl de wɛr.

¹⁸ Na yeki wel dit juec luel e kaaye kɔc deep ne kɔr rɛɛc de guɔp, kɔc ye poth ne kɔc ceŋ awacic yic;

¹⁹ goki ke lɛk luny, ke keek ne gupken ŋoot e ke ye awuut ke rɛɛc; ne ke na ci ke dɛ yi tiam, ke yekene eka bin dhil ya aluaŋde.

²⁰ Ne ke na cik acol de piny nom cak wan ne nyiny nyic kek Bɛnydit ku Duluɛk Yecu Kritho, ku te cene ke bɛr deep ne cuɔl, ku ci ke tiam, ke rɛɛc ciɛn abi rɛɛc tueŋ wuɔr.

²¹ Aŋuan lan ete ken kek dhol lajik nyic, ne nyiny cik ke ye nyic, ku berki dhuk ciɛn, pɛlki loŋ lajiŋ e ci yiɛn ke.

²² Ee tuɔl enɔŋ keek ci man de kaŋ yic e ci luel, Ya jo kee ŋɔɔkke dhuɔk rɔt, ku kul ci rɔt waak ee rɔt bɛɛr lɔ dal ne tiɔkic.