1 Timotheo 6 - Lek Jot de Jecu Kritho 1940

¹ Ne kɔc kedhia kɔc ye ya aluɛk ne ke ye wunken cok ne rieu, bi rin ke Nhialic ku piocde bi ke cuɔk ye lat.

² Ku aluɛk ye naŋ banyken ci ya gam, ne ke cik ye tɔɔn yic, ne ke yi kek mɛɛth, ne ke yikike luɔi ne rieu dit, ne ke ye kɔc yikike kony ne luɔi piɛthden ye kek ya kɔc ye gam ku ye ke nhiar. Keekake ke e yin ke weet ku jiɛm yin ke.

³ Na nɔŋ ran ye pioc ne pioc dɛ, ku cii wel yith ye gam, agut wel ke Yecu Kritho, ku pioc ye ya ke de luɔi de Nhialic;

⁴ e kee piɔu ya dit, ku cin ke ye nyic, ku ye ya thiɛc de wel ku ateere ke e ye ke tɛm rɔt, ka ye tiɛl bɛi, ku tɔŋ, ku lɛɛt, ku rieth rac,

⁵ ku teer de wel de kɔc cii tak ke riak, ku ci yic jaal, kɔc ye luɔi de Nhialic cɔk ye dhol de weu.

⁶ Luɔi de Nhialic de piɔn cinic teer ee ya juek de weu.

⁷ Acin ke cuk bɛi ne yepinye nom, ku kacin ke buk ya leu ne nyiɛi thin:

⁸ a wɔ ye piɔth lɔyum ne miɛth ku ka bii wɔ ke roth ya kum.

⁹ Kɔc ye piɔth naŋ bany de kaŋ aye yuik ne themic, ku aɣɔm, ku kɔr rɛɛc kuɔt de bɛɛl ku de tɔɔk, ka ye kɔc mou ne riak ku mar de kaŋ.

¹⁰ Nhiɛr de weu yenekee ya meei de keriɛc ye rac ebɛn, ke na ci kɔk ye cuɔp e ke ye yec wei ne gamic, ku cik roth wuɔɔm ne dhien kuɔt.

¹¹ Ku yin, Yin ran de Nhialic, ye kat te de keekake; ku ye lajik kuanyic, ku luɔi de Nhialic, ku gam, ku nhiɛr, ku liɛr de piɔu, ku kuur de piɔu.

¹² Ye tɔŋ piɛth de gam ye thɔr, ye piir athɛɛr kuak piny, yenekee cɔɔle yin, ku gɛm yin ne gam piath ne duleek juec nhiim.

¹³ Yin yɔɔk ne Nhialic nyin, Nhialiny ye kaŋ kedhia cɔk piir, ku ne Yecu Kritho nyin, man e ci gam piath luel ne Pontio Pilato nom;

¹⁴ ya ye looŋ muk, te cin acuɔl, ku te cin awac, agut tuɔl de Bɛnydiitda Yecu Kritho:

¹⁵ ke bi nyuɔɔth ne kolde, yen man ye ya Wun e Riɛr cithiei ku ye tok, Meleŋ de meleek, ku ye Bɛnydiit de banydit;

¹⁶ ye ya toŋ ye tɔ athɛɛr, ku ye ceŋ ne ɣɛɛr cie leu ne ɣetic, man cin ran cie guɔ ŋem, ku kacie leu ne ŋem: eeyabi rieu ku riɛr athɛɛr ya tɔ kene yen. Amen.

¹⁷ Ye acibaany ke yepinye nom yɔɔk, wu ya duɔka wenhiim ye cɔk dit, ku duɔka ŋɔthduɔn ye gɛi kakucke ke baanyduɔn, yakake gɛi Nhialic, yen man ci wɔ yiɛn bany de keriɛc ne ye yumdɛn de piɔu:

¹⁸ ku bik kapiath ya loi, bik kek ke ya bany ne luɔi piath, ku bik ya kok ne miɔc, ku yiki piɔth rɔm:

¹⁹ ku yiki roth tau kapiath ne kol bi bɛn, bik piir yic ya kuak piny.

²⁰ Yin yin Timotheo, ye ke ci yiɛn yi ye gel, ku ye rɔt wɛl wei ne jamic jam rɛɛc de ciɛlic ku ateere de nyic, ye ya lueth te yene ye cɔɔl nyic,

²¹ ke ye kɔc kɔk yen ke tic ne keyic, ye kek gam waan. Eeyabi athiɛi bi ya tɔ kene yin.