1 Timotheo 4 - Lek Jot de Jecu Kritho 1940

¹ Ku Jɔŋdit ee jam areet, ye ne akol bi bɛn abii kɔk ke gam puɔl, ku yiki piŋ ne jak ke adhuɔɔm ku pioc de jak rac,

² ne adhuɔɔm de kɔc ye lueth luel, ceneke nyinyden de kepiɔth miir ne luŋ leth;

³ ku yiki thiek peen, ku yiki kɔc yɔɔk yi bik riiŋ ya rɛɛc, ke ke cii Nhialic cak bi ya loom ne lɛc ne keek kek kɔc ye gam ku yiki yic nyic.

⁴ Ke cii Nhialic cak ebɛn ee ya kepiath, ku kacin toŋden bi ya reec, te yene ye loom ne lɛc:

⁵ ne ke cene ye ya cɔk lajik ne wɛt de Nhialic ku lɔŋ.

⁶ Na ye mɛɛth taau nhiim ne keekake yic, ke yin ye ya awun piɛth de Yecu Kritho, ci miɛɛth ne wel ke gam ku pioc piɛth e ye biɔɔth agut ci emane:

⁷ ku ye akokool ye ke rɛɛc akokool rɛc ke diɔrdit. Ku ye lui ne luɔi de Nhialic:

⁸ ne ke ye luɔi de guɔp ye piathde yuul emath; ku luɔi ye ya ke de Nhialic yenekee piath ne kaŋ kedhia, ku ye naŋ keluel de piir ye tɔ ne yemane, ku piir bi bɛn.

⁹ Yewɛte kee wɛt yic, ku kee piath ne raan ebɛn te yen e loom,

¹⁰ Ya yekene yeneka ye wɔ lui ku yuku them, ne ke cene ŋɔthda tau Nhialiny ye piir, man ye ya Duluɛŋ de kɔc kedhia, ye dit enɔŋ kɔc ye gam.

¹¹ Ye jam arir ne keekake ku yin ke weet.

¹² Ne ye ciɛn ran ye ranthiɛidu tɔɔn; ku ye ya kɛɛrden kek kɔc ye gam, ne wɛt, ku ne piir, ku ne nhiɛr, ku ne gam ku lɔcar.

¹³ Ye rɔt gam ciɛr, ku yook, ku pioc, agut te bɛi ɣan.

¹⁴ Duɔne miɔc ye tɔɔk miɔc ye tɔ ne yiyic, ɣɔn yine yin ne nyooth, ku kɛn de cin de roordit.

¹⁵ Ye lui areet ne keekake, dhuɔle rɔt keek; bi lɔ tueŋdu ya tic enɔŋ kɔc kedhia.

¹⁶ Ye rɔt ŋem apiath ku piocdu. Ye dhiac ne keekake yic, na ye yekene loi, ke yin ye rɔt luɔk ku keek kek kɔc ye yin piŋ.