1 Petero 2 - Lek Jot de Jecu Kritho 1940

¹ Yen nyaaika kɛc de piɔu ebɛn, ku dhuɔm ebɛn, ku jam koony, ku wek, ku jam rac ebɛn,

² ku yaka ciɛk ke tiɛp kɔɔr cin yic dhuɔm, ci miththii piɔcke dhieth, bak ya cil ne keek agut luak.

³ Kac de piɔu de Bɛnydit acak thiep;

⁴ baka enɔŋ en, ye kuur ye piir, cii kɔc rɛɛc, ku cii Nhialic lɔc ku kook en.

⁵ Ku week eya we bi ciɛt kuur ye piir, we ye buth ke we ye ɣon de wei, bak ya rem de tit lajik, bak koc de wei ya miac, ye lɔyum enɔŋ Nhialic ne Yecu Kritho.

⁶ Ne tɔ tɔ en ne kacigɔɔr yic, Ya ŋɛmka, kuur piɛth de ŋem de pany ataau ne Dhiɔnic, ci lɔc ku kooke: Ku ran ye ye gam ace nyin bi ya riɔc.

⁷ Aye we kook we kɔc ye gam: ku nenɔŋ kɔc ci ye ye gam, Ya kuur ci rɛɛc ne mebuuth, Yeneka ci cɔk ye nom de ŋem de pany;

⁸ ku, Kuur yene kɔth, ku kuur ye kɔc dhoŋ cok; aaye kɔth ne wɛt, nɔŋki ateere: e ke ci meek.

⁹ We ye kɔc ci meek, yaka rem de tiit de melek, yaka jur lajik, jur de Nhialic ne guɔpde, bak kapiɛthke ya nyuɔɔth yen man ci we cɔɔl bei ne cuɔlic bak ya tɔ ne ɣɛr gɛiyeic.

¹⁰ We we cie jur ɣɔn, ku we ci jal ya jur de Nhialic emane. We we ken kac de piɔu yok ɣɔn, ku kacak jal yok emane.

¹¹ Kɔcnhiarke, we yake lɔŋ ci abakook ku alɛi bak roth ya peen ne kɔr reec de guɔp man ye teer ke tiɛp;

¹² ku bak kakuɔn ya loi apiath ne Juurkɔk yic; ku na cakki we ya guɛɛl ci kɔc rac, e kaabi ya daai ne luɔi piɛthduɔn ku bik Nhialic ya noom ne kol e luk.

¹³ Yaka riɛr ebɛn de raan yaka gam ne ke de Nhialic: naa melek, ne ke tɔ yen tueŋ;

¹⁴ naa gabanai ne ke cen ke tooc bi kɔc rac ya wai, ku yiki kɔc piath leec ne luɔi piɛthden.

¹⁵ Yenekee ya piɔn de Nhialic, bak kuny de kɔc ci bel ya cɔk lɔ diu ne luɔi piɛthduɔn.

¹⁶ We ci lony, yen duɔka roth ne thian ne lunyduɔn bak ya lui arac; we ye awuut ke Nhialic.

¹⁷ Yaka raan ebɛn theek. Yaka miɛthakuɔn nhiar. Yaka Nhialic riɛu. Yaka melek theek.

¹⁸ We awuut, yaka wel ke kɔc tɔ ne wenhiim gam ne rieu ebɛn; acie kɔc piath ku lirki piɔth kepɛc, ee agut kɔc kec piɔth eya.

¹⁹ Kene ee lɔyum enɔŋ Nhialic te ye raan kemɛɛn gum, ke ci tau ne ekɔu te cin awac, ne nyiny nyic en Nhialic piɔu.

²⁰ Tɔ lɛc teno te ci we wɛi de rɛɛc yaka loi ye gam te cin ateere? Na yaka kepiath loi ku gum we, ku yaka gam te cin ateere, ke yenekee lɔyum enɔŋ Nhialic.

²¹ Yekene ekee cole we: ne ke ci Kritho gum eya ne week, ku nyiɛŋ we ke bak ya kaar, bak ya biɔth:

²² yen man e ken kerac loi ku cin thok adhuɔm:

²³ yen man e ci laat ku cii gur; gum ku cii lek; ye rɔt gɛi ne yen yen man ye luk nejik.

²⁴ Ee karɛckuɔ jɔt e ekɔu ne tim nom, buk thou ne rɛɛcda ku buk ya piir ne lajik: wɔ ci dɛm ne yum cene e yup.

²⁵ We ci mar ci amɛl; ku we ci Adubiokduɔn bɛr dhuɔk emane, ku ye Bicem de tiipkuɔn.