1 Petero 1 - Lek Jot de Jecu Kritho 1940

¹ Petero, dutuny de Yecu Kritho agɛr kɔc cike lɔc ci thiɛi wei ne Ciɛc tɔ ne Ponto, ku Galatia, ku Kapadokia, ku Athia, ku Bithunia,

² kɔc cike lɔc ne nyiny e kɔn kek Nhialic Wun nyic, ne luɔi lajiŋ de Jɔŋdit, ye ke cɔk gam ku cɔk ke yorke ne riɛm de Yecu Kritho: Eeyabi athiɛi ku dɔɔr ya lɔ ke dit enɔŋ we.

³ Eeyabi athiɛi bi ya tɔ ke Nhialic Wun de Bɛnydiitda Yecu Kritho. Ne kac diitden kɔc yen piɔu acene wɔ bɛr dhieth ne ŋath ye piir ne jon de Yecu Kritho cen rɔt jɔt ne thouic,

⁴ buk naŋ kakuɔk ke dit ka ci bi riak, ku ka cie cuɔl, ku cik ye jaal, cike juɛr week pan nhial,

⁵ ku riɛr de Nhialic ee we gel ne gam agut luaŋ ci juir bi nyuɔɔth ne kol ciɛn.

⁶ We ye piɔth lɔyum ne yekene, na cakke ya dhiac ne guɔm diit de them kuɔt.

⁷ Kekeekake abi gamduɔn ya nyuɔɔth, gam wan jini man ye riak ku ye them ne lɛŋ ne mac, bi we yiɛn lɛc ku nuɔm ku rieu te biiye Yecu Kritho:

⁸ yen man yaka nhiar ke kɛnka ŋem; yen man yaka gam ku yaka piɔth lɔyum ne yum ce luel ku ye ya nuɔm, ke cak ye ŋem;

⁹ we ye luaŋ de tipkuɔn loom luaŋ yaka yok ne gamduɔn.

¹⁰ Nebii aake ci yeluaŋe ya thiec kɔrki areet, ke keek man ci nyuɔth thiɛi bi bɛn enɔŋ week,

¹¹ ku kɔrki koolo, ku bi yene ŋo, tɔ ne piɔn de Jɔŋ de Krithoic te cen guɔm de Kritho nyuɔɔth ke ŋoot ke liu, ku nuɔm bi ye biɔth.

¹² Ee nyuɔth ke, keekake aacike loi ne week ku kacie keek, ka yiike lɛk week emane ne kɔc ci we piɔc ne welpiath ne Jɔŋdit Lajik ci tuɔc pan nhial; keekake aaye malaikai ke piɔth naŋ yieke caar.

¹³ Yen yaka wenhiim juir, yaka cath ne piɔth lir, yaka athiɛi bi bɛn enɔŋ week te bii Yecu Kritho rɔt nyuɔɔth yaka ŋɔɔth;

¹⁴ Yaka ya mith cin ateere, ku duɔka kɔr rɛɛc de guɔp cɔk ye we dɔk ci man ɣɔn kuc we kaŋ.

¹⁵ Acit man len jik yen man ci we cɔɔl, ye we lajik eya ne ke dɛ ebɛn de piir piir we;

¹⁶ ne ke cene e gɔɔr, Ya we bi ya lajik; ne ke lan jik.

¹⁷ Ku na yaka ye cɔɔl Wuɔrduɔn yen man ye luk apiath ci man de luɔi ye ŋɛk loi, ke we yaka reer e tiɔp nom ne rieu:

¹⁸ ne nyiny nyic we ye ke we kene waar ne ka ye riak, ci rial ka jini, ne ka ke ciɛlic ke piirduɔn cakke yok enɔŋ kuarkuɔn;

¹⁹ ee riɛm nhiar, ci riɛm de nyɔŋ cin tewacrɔt ku cin buŋ thin dɛ, ee riɛm de Kritho:

²⁰ yen man e kɔne ya nyic aŋoot ceŋ de piny, ku ci nyuɔɔth ciɛn ne week,

²¹ week we man ye Nhialic gam ne yen, yen man ci ye jɔt ne thouic ku yin nuɔm; bi gamduɔn kene ŋɔthduɔn bik ya tɔ ne Nhialicic.

²² Na ci gam ye we yith gam ci tipkuɔn ya cɔk lacar bak mɛɛth ya nhiar ne nhiɛr cinic aguk, ke we yaka roth nhiar areet ne piɔn ɣer:

²³ week we man cike bɛɛr dhieth ne kɔth cie riak, acie kɔth ye riak, ne wɛt de Nhialic man ye piir ku ye ceŋ athɛɛr.

²⁴ Riiŋ ebɛn ee ya noon, Ku nuɔm ebɛn de raan ee ciɛt noon nom. Noon ee nɔc ku ye nom loony wei:

²⁵ Ku wɛt de Bɛnydit ee ceŋ athɛɛr. Ku yekene ee wɛt de thoŋ piɛth cene we wɛɛt.