1 Korinthoi 9 - Lek Jot de Jecu Kritho 1940

¹ Caa nom ye laau? caa ye metuc? kɛn Yecu Bɛnydiitda ŋem? cak ye luɔidie ne Bɛnyditic?

² Na caa cak ya metuc enɔŋ kɔk, ke an ye yen enɔŋ week: ee cin de tuɔc cene ɣa tooc yeneka ye we tɔ ne Bɛnyditic.

³ Kunydien yan rɔt kony enɔŋ kɔc ye ɣa caar eke.

⁴ Cuk ye naŋ riɛr de cam ku de dek?

⁵ Cuk ye naŋ riɛr de ŋɔɔr de tiŋ ci ya gam, ci man de metuuc kɔk, ku watmathken ke Bɛnydit, ku Kepath?

⁶ Wɔɔk wɔne Baranaba, cuk ye naŋ riɛr pen wɔ roth luɔi?

⁷ Ye lathker no ye lɔ tɔɔŋ ne weuke nyin kepɛc? yeŋa ye dom de abiɛi com, ku cii ka ye luɔk thin ye cam? ka yeŋa ye biook nyuaath, ku cii ca ke biook ye rueth?

⁸ Ye ya ka ke kɔc eka yan ke jamka? ka cii loŋ ye luel yeya eya?

⁹ Ee gɔɔr ne loŋ de Motheic, Ya duk miɔr ye duut thok te kɛɛm en rap. Ye ya miɔr yene ye Nhialic diɛɛr?

¹⁰ Ka ne luel eya ne wɔɔk? Ee yic, ee gɔɔr ne wɔɔk: bi ran ye pur bi ya pur ne ŋɔth, ku bi ran ye kɔm, bi ya ŋɔth ne biakde.

¹¹ Na cuk ka ke wei puɔk we, ke yene dit ne buk kakuɔn ke piny nom ya tem?

¹² Te ye kɔk naŋ yerire ne wenhiim, ke wɔ cie ŋuɛɛn ne keek? Yerire ee kenku ya thany roth, ku kaŋ kedhia aake yukuke guum, buk cuɔk ye dugeel ke welpiɛth ke Kritho.

¹³ Kuɔcka ke awuut ke kalajik ye cam ne ka ke yekalu, ku kɔc ye kan de koc luɔi e kee ye mat ne lɔm kene kan de koc?

¹⁴ Yeneka cii Bɛnydit loi bi kɔc ye weet ne welpiath ya piir ne welpiath.

¹⁵ Ku kacin toŋ de keekaka ca loi: keekake akɛnke gɔɔr ya bi ke ya loi ci mandie: aŋuɛn thou, ne bi ran dɛ nuɔmdie ya cɔk ye ciɛlic.

¹⁶ Na ya weet ne welpiath, ke kacin ke yan nuum; luɔi ee dhiɛɛl ne ɣakɔu; riak ee taau ne ɣakɔu, te can ye weet ne welpiath.

¹⁷ Na ya yekene loi ne piɔndie, ke an ye naŋ riop: ku na cie ke de piɔndie, ke an ci cɔk ye duŋem.

¹⁸ Jɔl riopdie ya ŋo? Ba welpiɛth ke Kritho ya cɔk cin ɣooc, ba riɛrdien tɔ ne welpiath yic cuɔk ye dhuɔl.

¹⁹ Na cak nom ya laau enɔŋ raan ebɛn, ke an ci rɔt cɔk ye aluaŋ de kɔc kedhia, ba juaac ya jɔp rɔt.

²⁰ Ɣan ye rɔt cɔk ye Juda enɔŋ Judai, bi a ya juɛk Judai, ku kɔc ye tɔ ne loŋic, aayake thɔŋ rɔt, ku an cie tɔ ne loŋic, bi a ya juɛk kɔc ye tɔ ne loŋic;

²¹ ku kɔc cie tɔ ne loŋic, aayake thɔŋ rɔt, ku kacie ya ciɛn looŋ enɔŋ Nhialic, an ye tɔ ne loŋ de Kritho, ba ke ya juɛk rɔt kek kɔc cie tɔ ne loŋic.

²² Kɔc niɔp ayanke rɔt cɔk niɔp, bi a ya juɛk kɔc niɔp. Ɣan ye rɔt cɔk ye keriɛc ebɛn enɔŋ kɔc kedhia, ba kɔk ya leu ne luak ne luɔi ebɛn.

²³ Ku kaŋ kedhia aaya loi ne ke de welpiath, ba ya ran toŋ de keek.

²⁴ Kuɔcka ke kɔc ye weer ne kat ye kat kedhia, ku kee ran tok e ye miɔɔc? Yen yaka kat wuɔya, bak ya loom.

²⁵ Ku raan ebɛn ye teer bi wɛr ee rɔt muk apiath ne kaŋ kedhia. Ayiki loi, bik naŋ gol ye maar a bi liu, ku keda ee gol cie maar a bi liu.

²⁶ Yen an ye kat yala, ku caa cit ran lɔ gɛkgɛk; ɣan ye ɣeet yala; caa cit ran ye ciɛl biokic:

²⁷ ɣan ye aguɔp muk apiath, ku ya mac: duɔke ɣan bi kɔc kɔk kan piɔc, ku bi a cuat wei ne Nhialic.