1 Korinthoi 8 - Lek Jot de Jecu Kritho 1940

¹ Emane ke de ka yeke nak eidool: Ayuku nyic ke wɔ ye naŋ nyic wɔdhia. Nyic ee dit de piɔu, ku nhiɛr ee ya yik.

² Na ye raan jam ye nɔŋ nyic, e kee ke ete ye dhiil ne nyic kuc;

³ ku na ye ran ye Nhialic nhiar, e kaye nyic ne Nhialic.

⁴ Yen emane ke de cam de ka yeke nak eidool, ayuku nyic ke eidol ye ciɛn ke dɛ ne piny nom, ku kee ciɛn Nhialiny dɛ, ee ya tok.

⁵ Na ciɛk naŋ ka ye cɔɔl nhielic, yin ya tɔ nhial ka ne tiɔp nom; ci man yen naŋ nhielic juec, ku bany juec;

⁶ ke wɔ ye naŋ Nhialiny tok, Wun, man ye keriɛc ebɛn kɔɔc, ku yuku ya kake; ku Bɛnydiit tok, Yecu Kritho, man ye naŋ keriɛc ebɛn, ku wɔɔk ne yen.

⁷ Yenyinye aliu enɔŋ raan ebɛn: ku kɔk, kɔc ye roth nyiɛc eidol, aaye cam ci man de ke ye nak eidol; ku jɔl nyinyden de piɔu, cii yekene niɔɔp, jɔl rɛɛc.

⁸ Acie riiŋ e bi wɔ ya cɔk piath ne Nhialic nyin: ku te ciɛk wɔ ye ya cuet, ke wɔ cie rac eya; ka na cakku ye ya cuet, ke wɔ cie ŋuɛɛn.

⁹ Ku yaka roth ŋem kɛlke yepɛle bi ya kɔth de kɔc ye niɔp.

¹⁰ Na ye raan yi ŋem yin man ye kaŋ nyic ke yin ciɛm luaŋ de eidol, ke nyinyden de piɔu, te ciɛk en niɔp, cii ye bi cɔk ŋɛɛny ku ciɛm ka ci nak eidool?

¹¹ Nyinydu yenekee ran niɔp cɔk thou, ye wanmuuth man e thoue Kritho.

¹² Ku na yaka rɛɛc yinya luɔi mɛɛth, ku yaka nyinyden de piɔu thiin te cen niɔp, ke we ci rɛɛc luɔi Kritho.

¹³ Yen, na ye riiŋ ye wanmaath cɔk kɔth, ke an ci miɛth beer ya cam athɛɛr wada, kɛlke an bi wanmaath ya cɔk kɔth.