1 Korinthoi 5 - Lek Jot de Jecu Kritho 1940

¹ Aye luel ya nɔŋ bal ne weyic, ku bal yinla aliu ne Juurkɔk yic; ya ci ran toŋ de week tiŋ de wun loom.

² Ku we dhiac ke we dit piɔth, ku cak kɔn diɛɛr ne bi ran ci yekene loi bi nyai ne weyic.

³ Yen ɣɛn, na cak guɔp ya liu, ku ya tɔ ne tiɛpdie, e kaca ya thol ne luk ye ran ye yekene loi, ci man e taa ɣan thin.

⁴ Ne rin ke Bɛnydit Yecu, na cak gueer netok wedhia, ku tiɛpdie thin, ku riɛr de Bɛnydiitda Yecu,

⁵ e kee te ca yeran yinlane cuɛt Catan bi rac guɔp, ku bi tiɛpde luɔk ne kol de Bɛnydit Yecu.

⁶ Lecduɔn de wenhiim arac. Kuɔcka ke awuro thintet ye cuin ebɛn cɔk ye awuro?

⁷ Yaka awuro thɛɛr waak wei, bak ya awuro jot, ci man ne ken we kan naŋ awuro. Retda ee nɔk, yen Kritho.

⁸ Yen camku miɛthdit, ke cinic awuro thɛɛr, ku cinic awuro de man ku rɛɛc; ne ye tɔ ke ye mono cinic awuro de piɔn luɔi ku yic.

⁹ We ca gar thondie ya cak bi ya mat wene mekoor ke roth.

¹⁰ Ku kacie meec wei de roth enɔŋ mekoor ke roth ke yepinye nom, ka ne kɔc ye wak yic, ka ne rueny yic, ka ne kɔc yic kɔc ye duur ne ka eke cake ne kɔc cin; kɛlke kek bak ya wɛn piny.

¹¹ Emane we gar keek bak cuɔk ye mat te ye wanmuthduɔn ya mekoor, ka te yen wak, ka te yen duur ne ka eke cake ne kɔc cin, ka te yen kɔc laat; ka te yen miɔl ne deŋ de miau, ka te yen kual; ana cak ya cam, ke we duɔka rɔm we ne yen.

¹² Ba ŋo loi ne luŋ de kɔc tɔ kec? Yaka ke luk kek kɔc tɔ thin,

¹³ ku ci Nhialic ke ye luk kek kɔc ye tɔ kec? Yaka ran rac kuany wei ne weyic.