1 Korinthoi 11 - Lek Jot de Jecu Kritho 1940

¹ Yaka ɣa kaar, ci man yan Kritho kaar eya.

² Emane we ya leec ne ke ye we wenhiim ciɛt ne ɣɛn ne kaŋ kedhia, ku ne muŋ ye we wel thɛɛr muk arir, ci man e yiɛn ɣɛn ke week.

³ Ku keeyabak ya nyic, ke Kritho ye nom de raan ebɛn; ku ye nom de tiik ya moc; ku nom de Kritho ye Nhialic.

⁴ Raan ebɛn ran ye lɔŋ ka ye weet, ke ci yenom kum, ee yenom yiɛn nyiil.

⁵ Ku tiik ebɛn tiŋ ye lɔŋ ka ye weet, ke ken yenom kum, ee yenom yiɛn nyiil: ne ke yen ciɛt ke ci muut nom.

⁶ Na ken tiik yenom ya kum, ke ne ye yenom muut eya: ku na ye tiik guɔp riɔc ne muɔt de yenom, ke ne ye yenom kum.

⁷ Acin mony bi yenom ya dhiil ne kum, ne ke yen guɔp ke ci thɔɔŋ de Nhialic ku ye ke de nuɔmde: ku tiik ee ya nuɔm de moc.

⁸ Moc acie ya ke de tiik; ee ya tiik e ye ya ke de moc:

⁹ moc ee ce cak ne tiik guɔp; ee tiik yenekee cak ne moc guɔp:

¹⁰ yekene abii tiik ya naŋ cin de riɛr ne yenom, ne ke de malaikai.

¹¹ Ku tiik acie reer te cin moc, ku ce moc ye reer te cin tiik, ne Bɛnyditic.

¹² Na ye tiik ya ke de moc, ke moc ee yenya ne tiik; ku kaŋ kedhia aaye ya ka ke Nhialic.

¹³ Yaka luk ne gupkuɔn: piɛth te ye tiik Nhialic lɔŋ ke ken yenom kum?

¹⁴ Ci ceŋ piiny we ye piɔc eya, ye na ye raan naŋ nhim bar, e kee ye yiɛn nyiil?

¹⁵ Ku na ye tiik ye naŋ nhim bar: e kee ya dheeŋde: nhimke aa yiɛn en bik ye ya kum nom.

¹⁶ Ku na ye raan naŋ ateere, ke wɔ ye ciɛn yeceŋe, agut kanithai ke Nhialic.

¹⁷ Na ya we cak lɛk yekene, ke an ci we ye leec, ne ke ye gueerduɔn ya rɛɛc ku cii ye ya piath.

¹⁸ Ke de acitnom, te ye we gueer luaŋ de Nhialic, e kaya piŋ ya yaka yic tek ku kaya duɔr gam.

¹⁹ We ye weyic dhiil ne tek, bi kɔc piath ya nyic ne weyic.

²⁰ Yen na yaka gueer, e kace rɔt leu ye bak miɛth de Bɛnydit ya cam.

²¹ Te ye we cam, ke nɛk ye kede kaaŋ thok, ku cɔk kene ku dek kene ne miɔl.

²² Yeŋo? Ciɛnka ɣoot ye we ke cam thin ku dek we ke thin? ka ye kanitha de Nhialic yene yaka tɔɔnic, ku yiɛnka aŋaaŋ yicliɛr? Ba we ya yɔɔk yade? Ba we ya leec ne yekene? We caa ye leec.

²³ Ne ke can e loom enɔŋ Bɛnydit yeke ca yiɛn weeke eya, ne ke cii Yecu Bɛnydit mono loom ne wɛɛr e nyiine yen,

²⁴ ɣɔn ye ci lɛc thol, ke wɛkic, ku jiɛm, Ye lɔmka, camka, yekene kee guɔpdie, man ci wuɔkic ne week: yaka loi wuɔla, bak wenhiim ya ciɛt ne an.

²⁵ Ku yene ye cɔɔk de abiny eya, te cii miɛth thei thok, ku jiɛm, Ye yeabinye ee man jot de riɛmdie: yaka loi wuɔla, ne akol ye we ke ye dek kedhia, bak wenhiim ya ciɛt ne an.

²⁶ Akol ye we ke yemonone cam kedhia, ku yaka yeabinye dek, ke we ye thon de Bɛnydit nyuɔɔth agut bɛnde.

²⁷ Yen raan ebɛn ran bi mono ya kuɔc cam, ku ye abiny de Bɛnydit kuɔc dek, abi ya naŋ awany de guɔp de Bɛnydit, ku riɛmde.

²⁸ Ne raan ye rɔt caar, ku bi jal cam ne mono, ku dek abiny.

²⁹ Ran ye cam ku dek, ee luk de rɔt wei cam, ku dek, te cen guɔp de Bɛnydit ye tak thin.

³⁰ Yekene yenekee kɔc juec ke week cɔk niɔp ku yiki bɛc, ku ye juaac nin.

³¹ Ne wɔ ye roth nyiɛc luk, ee te ci wɔ ye luɔkwei.

³² Ku na ye wɔ luk, ke wɔ yeke waai ne Bɛnydit, kɛlke wɔ bi ya luɔkwei wɔne piny nom.

³³ Yen, watmathcie, na yaka gueer bak cam, ke ŋɛk ye ŋɛk tiit.

³⁴ Na ci raan ya cɔk, ke ne ye cam baai; bi gueerduɔn ya cuɔk ye lukwei. Ku biakne aba jal lɔ juir ne kol ban lɔ.