1 Jɔn 4 - Lek Jot de Jecu Kritho 1940

¹ Kɔc nhiarke, duɔka jɔk ebɛn ye gam, ku yaka jak them, lan ye kek ka ke Nhialic: ne ke cii nebii juec ye alueth lɔ ne piny nom.

² Ekene aye we Jɔŋdiit de Nhialic nyic: jɔk ebɛn jɔŋ ye Yecu Kritho gam ke ne bɔ ne ye raan ee ya ke de Nhialic;

³ ku jɔk ebɛn jɔŋ ci Yecu ye gam ke ne bɔ ne ye raan acie ya ke de Nhialic: yenekee jɔŋ atiir de Kritho, man ci we bɛnde piŋ, ku kee guɔ tɔ ne piny nom emane.

⁴ We ye ka ke Nhialic, miththiicie, ku kaacak tiam: ne ke dit en yen man tɔ ne weyic, awɛr en yen man ye tɔ ne piny nom.

⁵ Aaye ka ke piny nom; yeneka yi kek jam ci ka ke piny nom; ku ye ke piŋ ne piny nom.

⁶ Wɔ ye ka ke Nhialic: ku ran ye Nhialic nyic ee wɔ piŋ; ku ran cie ke de Nhialic aci wɔ ye piŋ. Wɔ ye jɔn de yic nyic ne yekene, ku jaŋ alueth.

⁷ Kaciek nhiarke, yuku roth nhiar: nhiɛr ee bɛn nenɔŋ Nhialic, ku raan ebɛn ran ye nhier ee dhieth ne Nhialic, ku ye Nhialic nyic.

⁸ Ran cie nhier ee Nhialic kuc; Nhialic ee nhiɛr.

⁹ Nhiɛr de Nhialic ee nyuɔth wɔ ne yekene, Nhialic ee Wantoŋde tuɔc ne piny nom, buk ya piir ne yen.

¹⁰ Nhiɛr eke, acie wɔ wɔ nhiar Nhialic, ee yenekee ci wɔ nhiar, ku tuuc Wende bi a dupuŋ de karackuɔ.

¹¹ Kaciek nhiarke, na ci Nhialic wɔ ya nhiar yela, ke wɔ yuku roth dhiil ne nhiɛr.

¹² Acin ran ci Nhialic kan ŋem. Na yuku roth nhiar, ke Nhialic ee ceŋ ne wɔyic, ku nhiɛrde ee jal lɔcap ne wɔyic.

¹³ Anyicku ke wɔ ye ceŋ ne yeyic, ku ceŋ ne wɔyic, ne yin cen wɔ yiɛn Jɔŋdiitde.

¹⁴ Ku wɔɔk, wɔ kɔc ci e ŋem, wɔ ye duleek ke tuuc ci Wun Wende tooc, bi ya Duluɛŋ de kɔc ke piny nom.

¹⁵ Raan ebɛn, ran ye gam ye Yecu kee Wen de Nhialic, aceŋe Nhialic ne yeyic, ku ceŋ ne Nhialicic.

¹⁶ Ku wɔ ye nhiɛr nhiɛre Nhialic wɔ nyic, ku gamku. Nhialic ee nhiɛr; ku ran ye ceŋ ne nhiɛric ee ceŋ ne Nhialicic, ku ceŋ Nhialic ne yeyic.

¹⁷ Nhiɛr ee lɔcap ne wɔyic ne yekene, ne ke bi wɔ ŋeeny ne kol e luk, ne wɔ cit en ne piny nom.

¹⁸ Acin riɔc tɔ ne nhiɛric; nhiɛr lɔcap ee riɔc ciɛc wei; riɔc atɔ ke wɛi guɔm: ku ran ye riɔc acie lɔcap ne nhiɛric.

¹⁹ Wɔ ye nhier, ne nhiɛr cen wɔ kan nhiar.

²⁰ Na jam raan, Ye an ye Nhialic nhiar, ku mɛɛn manhe, e kator lueth: na ye raan manhe ŋem e yenyin maan, e kace Nhialic bi a leu ne nhiɛr, man cii ye ŋem.

²¹ Eloŋe ee lomku nenɔŋ en, Ye ran ye Nhialic nhiar abi manhe ya nhiar eya.