1 Jɔn 3 - Lek Jot de Jecu Kritho 1940

¹ Ŋɛmka cɔɔk de nhiɛr ci Wun yiɛn wɔ, bi wɔ ya cɔɔl mith ke Nhialic: ku wɔ ye ke. Yekene acii kɔc ke piny nom wɔ nyic, ne kuny kuc kek ye.

² Kɔc nhiarke, wɔ ye ya mith ke Nhialic emane; ku ke bii wɔ ya kaŋo aken guɔ tuɔl. Kene eka nyicku, na tul, ke wɔ bi ya ciɛt en, abuk ŋem ci mande.

³ Ku raan ebɛn ye naŋ eŋathe ne yen, ee rɔt cɔk lajik, ci man yen lajik.

⁴ Ku raan ebɛn ye rɛɛc loi ee looŋ ya dhoŋ eya: rɛɛc ee dhuŋ de looŋ.

⁵ Ku kanyiɛcka ke ci tuɔl bi karac nyaai; ku kee cin rɛɛc enɔŋ en.

⁶ Ran ye ceŋ eyic ebɛn, ee ciɛn rɛɛc: ran ye rɛɛc loi ebɛn aken ya ŋem, ku kacii ye nyic.

⁷ Miththiicie, ne cin ran ye we yec: ran ye lajik loi ee lajik, ci man yen lajik:

⁸ ran ye rɛɛc loi ee ya ke de durieth, ne ke ye durieth kerac loi ɣɔn ciɛke kaŋ agut ci emane. Ekene ekee cɔk Wen de Nhialic tul, bi luɔi de durieth riɔk.

⁹ Raan ebɛn ci dhieth ne Nhialic ee ciɛn rɛɛc ye loi, ne ke yen kɔthden ye tɔ ke ye: ku cii rɛɛc ye leu, ne bɛn e bii yen enɔŋ Nhialic.

¹⁰ Ekene ekee mith ke Nhialic nyuɔth, ku mith ke durieth: raan ebɛn ci lajik ye loi acie ya ke de Nhialic, ku ran ci manhe ye nhiar eya.

¹¹ Ekene ee thon cak piŋ ɣɔn gɔɔce kaŋ, ya buk roth a nhiar:

¹² ku cuk cit Kain, man ye ke de jɔŋ rac, nɛk manhe. Ku e nɛk ne ŋo? Ee ke ye luɔide ke de rɛɛc, ku lɔ ke de manhe jik.

¹³ Duɔka ye gai, mɛɛthcie, te yene we maan ne kɔc ke piny nom.

¹⁴ Anyicku ke wɔ ci bɛn bei ne thouic ku loku ne piiric, ne nhiɛr nhiɛr wɔ mɛɛthkuɔ. Ran cie nhiɛr ee tɔ ne thouic.

¹⁵ Raan ebɛn ran ye manhe maan ee ran de tir: ku kanyiɛcka ran de tir ee ciɛn piir athɛɛr ne yeyic.

¹⁶ Nhiɛr ayuku nyic ne yekene, ne ke cen piirde gam ne wɔɔk: yen wɔ bi piirda ya dhiil ne gɛm ne mɛɛthkuɔ.

¹⁷ Ran ye naŋ kapiɛth ke yepinye nom, ku ye manhe ŋem ne dak, ku ye yepiɔu wɛl wei enɔŋ en, ke nhiɛr de Nhialic ye tɔ ne yeyic yede?

¹⁸ Miththiicie, dukku ye nhier ne jam, ku ne wɔliep; yuku nhier ne luɔi ku ne yith.

¹⁹ Abuk ya nyic ne ekene ke wɔ ye kɔc ke yith, ku buk wɔnhiim a kuɛm ne yenom,

²⁰ ne ka ye wɔ ke roth luɔkwei ne wɔpiɔth, ne dit diite Nhialic ne piɔthkuɔ, ku ye kaŋ nyic kedhia.

²¹ Kɔc nhiarke, na ce piɔthkuɔ wɔ ye luɔkwei, ke wɔ ye ŋeeny ne Nhialic;

²² ku ke dɛ ebɛn ke yuku thiec, abuk ya loom enɔŋ en, te ye wɔ looŋke tiit, ku yuku kapiath ne yepiɔu loi.

²³ Loŋde eke, ee buk rin ke Wende Yecu Kritho ya gam, ku yuku roth nhiar, acit man cen wɔ yiɛn loŋ.

²⁴ Ku ran ye looŋke tiit ee ceŋ ne yeyic, ku ceŋ ne yeyic. Ku kayuku nyic ne ekene ke ye ceŋ ne wɔyic, ne Jɔŋdiite man ci yiɛn wɔ.