TITO 2 - Lengua Sur (Enxet) Nuevo Testamento

Nelxekmowásamáxche ektakmela

¹ Apkeltennáha agkok xép, kéméxchek cha'a exnéshok apkeltenneykha m'a ektémakxa nak nelxekmowásamáxche ektakmela nak.

² Enxet'ák apkelwányam nak, kéméxchek etnahagkok meltemegweykmohóxma, etnahagkok nahan ektakmela apkeltémakxa, etnahagkok nahan apmopwána apkeláneykegkoho apkeltémakxa, tén han etnahagkok ekmámnaksoho melya'áseyam, tén han etnahagkok ekmámnaksoho m'a apkelásekhamakpoho nak, tén han elwaskápekxohok elenmaxakpohok ma'a ektémakxa nak nenlegeykegkoho.

³ Hawók nahan ma'a kelán'ák elwányam nak, kéméxchek katnahagkok ma'a ektémakxal'a kelán'ák ekteme nak eyáyo Dios. Megkatnehek ma'a eltennágwayam aksa nak nátegma ekmowána amya'a, megkatnehek nahan ma'a anmenáto nak, kéméxchek kaxekmóshok ektakmela ektémakxa námokkok,

⁴ tén han kalxekmósek yakwayam kalásekhohok anakteyegka'a m'a kelán'a etkók ekha nak anakteyegka'a, tén han kalásekhohok ma'a étchek.

⁵ tén han kának katnahagkok ekmowána eláneykegkoho ektémakxa, tén han megkalanyek ma'a ekmaso nak nentémakxa mansexta, tén han katnahagkok ektakmelcheso m'a axanák, tén han katnahagkok ektakmeleykha awáxók, katnahagkok nahan elyaheykekxoho m'a anakteyegka'a, yakwayam enxoho mekaxénaxchek ekmaso m'a amya'a eñama nak Dios.

⁶ Yána nahan etnahagkok apmopwána apkeláneykegkoho apkeltémakxa wokma'ák,

⁷ etne exchep xa ektakmela aptémakxa, cham'a ekyókxoho aksok apkelanakxa enxoho, yakwayam enxoho elyetlakxak aptémakxa exchep xa wokma'ák nak. Apkelxekmósek agkok xép wokma'ák, etakmelchesho cha'a apkelxekmóso, ná etne aksa aptemesáseykha aksa apkelxekmóso,

⁸ etakmelchesho nahan apkeltenneykha, yakwayam enxoho méko kawának kaxének eyesagko aptahakxa appeywa. Keñe sat elmegkágwakxak ma'a énxet'ák ektahakxa enxoho apkenmexeykha exchep. Mopwanchek sat nahan henxének ekmaso negko'o.

⁹ Yána sat nahan etnehek apkelyaheykekxoho wese' apagkok ma'a énxet'ák apkelmomap nak kéltemesáseykha aksa, cham'a ekyókxoho aksok apkeláneygkaxa enxoho cha'a; yána etnahagkok eltakmeleykha apwáxók, metnehek nahan apkelátegmoweyak ma'a ektahakxa enxoho amya'a.

¹⁰ Yána etnahagkok melmenyexeyák, tén han etnahagkok metnéseseykmohoxma aksok kélagkok, yakwayam enxoho étak apyókxoho énxet'ák ektaha ektakmela m'a ektémakxa nak nelxemowásamáxche eñama Dios segwagkasamo nak teyp, eñama ekwetamaxche apkeltémakxa xa énxet'ák nak.

¹¹ Enxekmósek axta negko'o Dios ektémakxa segméso naksa segemleykekxoho, cham'a segemleykekxoho elwagkasama nak cha'a teyp apyókxoho énxet.

¹² Cháxa sẽlxekmósama nak yakwayam agyenyók nentémakxa ekmaso xa ektémakxa nak segméso naksa Dios segemleykekxoho, tén han ólwataksek ma'a aksok negyespagkamakxa nak keso náxop, tén han sẽlxekmósama yakwayam antehek negmowána nenlaneykegkoho nentémakxa keso náxop, tén han antehek ekpéwomo nentémakxa, tén han antehek nempagkanchásamáxche Dios,

¹³ neyseksa nelhaxanma katnehek ma'a aptémakxa axta sempekkencháseykekxa appeywa Dios ektaha nak ektakmela: cham'a apkexyekmo sat Dios egagkok yetlo apcheymákpoho, cham'a aptaha nak Jesucristo segwagkasamo teyp.

¹⁴ Apmeyásamakpók axta apagko' yakwayam emátog, negko'o eñamakxa, yakwayam enxoho hẽlwagkasek teyp neyseksa ekyókxoho nentémakxa ekmaso nak, tén han hentemésesek ektakmela nentémakxa, yakwayam enxoho nahan antehek énxet'ák apagkok, tén han agámenyéhok anlának ma'a aksok eltakmela nak.

¹⁵ Cháxa eyéméxko nak elxekmósek xép énxet'ák xa, tén han elwaskakkásekxohok, egkés nahan cha'a appeywa ekyetna enxoho megyakhémo, yetlo apmeykha m'a ektémakxa nak kéláyo exchep. Neygyoho aksa kólwanyohok xép.