TITO 1 - Lengua Sur (Enxet) Nuevo Testamento

Pablo ekxeyenma apwáxok

¹ Ko'o Pablo sekteme Dios apkeláneykha tén han sekteme Jesucristo seykha amya'a apagkok, cham'a aptaha nak seyápháseykha yakwayam enxoho atnésesagkok melya'áseyam ma'a ektaha nak Dios apkelyéseykha, yakwayam enxoho nahan elya'ásegwomhok amya'a ekmámnaksoho eñama s'e ektémakxa nak negáyo negko'o,

² ektaha nak ekteméseso ekmámnaksoho m'a nelhaxneykha nak yakwayam anxawak ekyennakte egnenyek megkatnegwayam enéxa. Apxeyenmék axta Dios keytek ekyennakte egnenyek amonye apkelané axta keso náxop, cham'a Dios metné nak apmopwána amya'a.

³ Elya'asásegwokmek eyke kaxwo' negko'o Dios keso negwánxa nak, cham'a ektémakxa nak appeywa, eñama m'a kéltenneykha nak tásek amya'a, cham'a seyánémaxko axta anhan ko'o xa altennaha, eñama apkeltémo m'a Dios segwagkasamo nak teyp.

⁴ Tito, ektáxésesek xép se'e weykcha'áhak nak, xép aptaha nak ekmámnaksoho hatte eñama s'e ektémakxa nak nenteme magya'áseyam egkánet nak. Emenyék ko'o etnehek apméso naksa Dios Egyap, tén han Jesucristo segwagkasamo nak teyp ma'a ektémakxa nak segemleykekxoho, tén han ma'a meyke ektahakxa apwáxok xép.

Tito aptamheykha yókxexma étkok Creta

⁵ Emenyék axta ko'o elánekxak xép ma'a eyéméxko axta kóllánekxak, cham'a sekheyásekxo axta exchep yókxexma étkok Creta, yakwayam enxoho anhan elyésha exchep ma'a apkelámha apmonye'e nak kélakneykekxexa ekyókxoho apyawakxa enxoho tegma yókxexma Creta, ekhawo m'a sektahakxa axta seyáneya exchep.

⁶ Enxet apkemha apmonye nak kélakneykekxexa, kéméxchek etnehek ma'a meyke kélxéncháseykekxohol'a aptémakxa. Kéméxchek etnehek wánxa xama aptáwa, kéméxchek nahan etnahagkok melya'áseyam apketchek, metnehek nahan ma'a kélya'áseykegkoho nak apkeltémakxa ekmaso, metnehek nahan ma'a kélya'áseykegkoho nak apteme melyaheykekxoho.

⁷ Enxet apteme nak apkemha apmonye kélakneykekxexa, elának cha'a m'a aptamheykha eñama nak Dios, ékeso eñamakxa eyéméxko nak etnehek ekpéwomo aptémakxa. Megkapayhawok etnehek ekyennakte apwáxok, megkapayhawok nahan etnehek ma'a ekmanyehe nak elwok, megkeyméxchek nahan etnehek ma'a anmenáto nak, metnehek nahan ma'a megyéso nak elwok, metnehek nahan ma'a ekmaso nak aptémakxa yepmenyéhok selyakye.

⁸ Wánxa agkok, kéméxchek cha'a emok takha pók exnésók ma'a apxagkok, tén han etnehek ma'a énxet ektakmela nak aptémakxa, cham'a apmopwána nak elanagkohok aptémakxa, kéméxchek nahan etnehek ma'a ekpéwomo nak aptémakxa, etnehek nahan appagkanchásamap Dios, etnehek nahan cha'a meyenseyam apkelané aptamheykha.

⁹ Kéméxchek meyensemek ma'a amya'a ekmámnaksoho nak, cham'a kélxekmósama axta, yakwayam enxoho nahan yepwának elwaskakkásekxohok apnámokkok, yetlo m'a nelxekmowásamáxche ektakmela nak, yakwayam enxoho anhan ellekwomhok énxet'ák apkelxeyenma nak ektaha megkamámnaksoho m'a amya'a nak.

¹⁰ Hakte apxámok énxet megkaleklo nak apwáxok nelxekmowásamáxche ektakmela nak, ekyagwánxa agko' nepyeseksa m'a énxet'ák apkelenxáneykmoho nak apkeláneyak ma'a sẽlkahaso kélyenyekhamol'a egyempehek, cham'a énxet'ák apxeyenmol'a aksok ektaha nak mékoho agko', cham'a apkelyexancháseykencha'awol'a énxet.

¹¹ Tásek megkólhok elpakmétek xa énxet nak, hakte apkelya'asegkek cha'a exma apteme melya'áseyam énxet, elxekmósek cha'a m'a megkeyméxko nak eykhe kólxekmósek, yakwayam enxoho étak selyakye yetlo ekmaso apkeltémakxa.

¹² Aptahak axta apxéna apchókxa xamo' xama énxet Dios appeywa aplegaso apha axta yókxexma étkok Creta s'e: “Enxet'ák apheykha nak se'e Creta, apmopwancha'a amya'a cha'a etnahagkok, apkellamchek nahan, megyeksek nahan emayhagkok aptéyak, mopmenyék nahan eltemeykha.”

¹³ Nakso' axta aptahakxa appeywa xa; ékeso eñamakxa seltamho nak megyésekxék xép egkések appeywa ekyennakte xa énxet'ák nak, yakwayam enxoho etnahagkok ekmámnaksoho melya'áseyam,

¹⁴ yakwayam enxoho nahan megyeyxók ma'a apkelyeykháseykegkoho nak aksok apxeyenma énxet'ák judíos, tén han megyeyxók apkeltamhókxa etnehek ma'a énxet'ák memáheyo nak yeyxhók ma'a amya'a ekmámnaksoho nak.

¹⁵ Enxet'ák meyke nak elenchahamaxche elchetamso apwáxók, kaxének cha'a apwáxók ektakmela antók ekyókxoho aksok; keñe m'a énxet apkelya'áseyam nak, tén han ma'a ekmaso nak elchetamso apwáxók ekyókxoho aksok cha'a kaxének apwáxók ektaha ekmanyása; hakte weykmók ekmanyása m'a ektémakxa nak elchetamso apwáxók.

¹⁶ Elxénhok cha'a apkelya'áseykegkoho Dios xa énxet'ák nak, aksok apkeláneyak akke cha'a kañék ekwetamaxche ektaha megkamámnaksoho xa aptamheykegkaxa nak apkelpeywa; asagcha'awo' nahan apkeltémakxa, méko nahan apkelyaheykekxoho, mopwanchek nahan elanagkok nentamheykha ektakmela xama enxoho.