SAN MATEO 9 - Lengua Sur (Enxet) Nuevo Testamento

Jesús aptakmelcheseyam xama énxet megkamopwána eltakheykha

¹ Apchánteyk axta Jesús yántakpayhe natámen xa, apyeykhákxeyk axta neyp wátsam ekpayhegwayam, apwákxeyk axta nátegma aphamakxa axta.

² Kélsókasek axta énxet megkamopwána eltakheykha m'a, taháno axta kélpekkenak kélsawa. Xama axta apwet'a Jesús ekyetna ekyawe melya'áseyam xa énxet'ák nak, aptahak axta apcháneya énxet megkamopwána eltakheykha s'e: —Hatte, ewaskápekxoho, megkólyakmagkáseykxak aptémakxa mey'asáxma exchep.

³ Aptahak axta apkelyexcháseykpoho énxet'ák aptaha axta apkelxekmóso ektémakxa segánamakxa s'e: “Enmexma Dios xa aptahakxa nak appeywa xa énxet nak.”

⁴ Apya'ásegkok axta eyke Jesús ektahakxa elchetamso apwáxók xa énxet'ák nak. Aptahak axta apkelmaxneyeyncha'a s'e: —¿Yaksak ektaha eyesagko nak kéxegke elchetamso kélwáxok?

⁵ ¿Yaksak enyahamo antehek agána'? ¿Keya antehek agának se'e: ‘Megkólyakmagkáseykxak aptémakxa mey'asáxma exchep’, esenhan antehek agának se'e: ‘Etnamha, exeg’?

⁶ Emenyék ko'o axekmósek kéxegke ekyetna kélyaheykekxoho ektaha nak Apketche énxet yakwayam enxoho meyakmagkásekxék apkeltémakxa melya'asáxma énxet keso náxop. Keñe axta aptaha apcháneya énxet megkamopwána eltakheykha s'e: —Etnamha, emekxa aptaháno, emyekxa apxagkok.

⁷ Apkempákxeyk axta néten xa énxet megkamopwána axta eltakheykha, apmeyákxeyk axta anhan apxagkok.

⁸ Xama axta apwet'a énxet'ák xa, apkelakak axta, apkeltemésesek axta anhan apcheymákpoho Dios eñama apméso apmopwána énxet'ák.

Jesús apkeltémo étlawha Mateo

⁹ Apxegákxeyk axta makham Jesús apkeñama m'a, apwetágwokmek axta xama énxet apwesey axta Mateo, cham'a aphama axta elmomaxchexa selyakye yakwayam kólmések wese' Roma. Aptahak axta apcháneya Jesús s'e: —Hétlawha ko'o. Keñe axta apkempákxo néten Mateo, apyetlókek axta anhan Jesús.

¹⁰ Aptáswokmek axta apto Jesús Mateo apxagkok, apkelwokmek axta anhan apxámokma énxet'ák apkelmomo axta selyakye yakwayam egkések wese' Roma, tén han ma'a énxet'ák elmasagcha'a nak apkeltémakxa. Aphakmek axta xamo' Jesús tén han ma'a apkeltámeséyak.

¹¹ Xama apwet'a énxet'ák fariseos xa, aptahak axta apkelmaxneyeyncha'a Jesús apkeltámeséyak se'e: —¿Yaksak ektaha aptóko nak xamo' apkelxekmóso kéxegke énxet'ák apkelmomo nak selyakye yakwayam egkések wese' Roma, tén han ma'a énxet'ák melya'asáxma nak?

¹² Apleg'awók axta eyke Jesús xa, aptahak axta apkeláneya s'e: —Mopmenyék pánakte egyap ma'a énxet'ák apkelyennakte nak, wánxa m'a énxet'ák apkelháxamap nak.

¹³ Kólxeg, kóltámesaxche ektémakxa nak ekxeyenma eknaktáxésamaxche s'e: ‘Emenyék ko'o kóltehek kéxegke apmopyósa kóllanok kélmók, momenyek ko'o kólnápok aksok nawha'ák yakwayam helmések ko'o. Axta ko'o aweyk yakwayam alwónmakha m'a énxet'ák eltakmela nak apkeltémakxa, wánxa m'a énxet'ák melya'asáxma nak.’

Ektémakxa manto nento nelpeykáso enxoho Dios

¹⁴ Apkelyo'ókmek axta Jesús nápakha énxet'ák apkelyetleykekxo axta aptémakxa Juan el Bautista. Aptahak axta apkelmaxneyeyncha'a s'e: —Mantawagkek cha'a negko'o nentéyak nelpeykáso enxoho Dios tén han ma'a fariseos. ¿Yaksaktéma metnaheykegko nak han apkeltámeséyak xa ektaha nak?

¹⁵ Aptahak axta apchátegmowágko Jesús se'e: —¿Kallapwomagkok enxeykel'a énxet'ák kéláneyeykha yakwayam epásegwók elyamhopma, neyseksa apha enxoho makham énxet yakwayam kalyamhápok nepyeseksa? Kammok sat ekhem yakwánxa kólyentemekxak énxet yakwayam nak kalyamhápok, keñe sat metawagkek aptéyak.

¹⁶ “Megkólwanchek kólyepetchesha apáwa aphápak kélyepetchásencha'a enxoho m'a apáwa nápakha aphaxnagkok nak, hakte ketchetsék etnekxak kélyenyesa enxoho m'a apáwa nápakha aphaxnagkok nak, keñe eyánchesagkohok apkelyeptamap ma'a apáwa aphápak nak.

¹⁷ Megkólyetmek nahan vino axnagkok ma'a aksok empe'ék apák kélyetmomól'a, hakte kapaxkátek ma'a aksok empe'ék apák nak, keñe keymasaxkohok keynkenaxchek vino, keñe anhan kalesók ma'a aksok empe'ék apák nak. Kólyátem cha'a vino axnagkok ma'a aksok empe'ék axnagcha'ák kélyetmomól'a, yakwayam enxoho megkaletsagkasaxchek xa ánet nak.”

Jairo apketche kelwána. Kelán'a ekpaknegkeseyam Jesús apchaklamap

¹⁸ Apwokmek axta énxet'ák judíos apkemha apmonye apagkok neyseksa apkeltenneykha axta Jesús, apkeltekxekwokmek axta aptapnák xóp apmonye apkenmágkaxa Jesús. Aptahak axta apcháneya s'e: —Kaxwo' ko'o ketsapak hatte kelwána, apmahágkek agkok xép appekkenwokmek agkok nahan apmek ekyetnakxa, kaxátekhágwók sat.

¹⁹ Akempákxeyk axta néten Jesús apyetlákxeyk axta yetlo apkeltámeséyak xa énxet nak.

²⁰ Keñe axta ekyo'ókmo Jesús xama kelán'a ekweykmo axta doce apyeyam ekháxamáxche, axta kamassegweykmók ektepeykekxa cha'a éma agkok xa kelán'a nak, neptámen axta keñamak ekyo'ókmo, paknegwokmók axta napwa'a apchaklamap,

²¹ hakte axta temék elchetamso awáxok se'e: “Apchaklamap sat eykhe apaknegkesamho', atakmelwók sat eyke.”

²² Appeynchakpók axta neptámen Jesús, apwet'ak axta xa kelán'a nak. Aptahak axta apcháneya s'e: —Hatte, kawaskápekxoho, megkay'áseyam keñamak ektakmelwokmo exche'. Yetlókók axta anhan ektakmelwayam.

²³ Xama axta apwokmo Jesús ma'a judíos apkemha apmonye apagkok apxagkok, apwetágwokmek axta apkeláneykxo aptahakxa yakwayam elpawaksek apkelmeykha m'a énxet'ák apkelpáwasamo axta cha'a apkelmeykha peya enxoho kólatawónek kélhápak, apwetágwokmek axta anhan apkellekxagweyncha'a énxet'ák ekyennakte agko'.

²⁴ Aptahak axta apkeláneya s'e: —Kólántep, megkatsapak se'e kelán'a étkok nak, tenche'. Apkesmések axta énxet'ák Jesús,

²⁵ wánxa agkok apkelántekkesek axta eyke Jesús xa énxet'ák nak; keñe axta aptaxna kañe', apmeyk axta ámek kelán'a étkok, keñe axta ekhákxo néten.

²⁶ Sawhekxók axta nahan ekpayheykekxa amya'a xa yókxexma nak, cham'a ektahakxa axta.

Jesús apkeltakmelcheseyam apkánet énxet meyke apakta'ák

²⁷ Xama axta aptepa Jesús ma'a, apkemhágkek axta apkánet énxet meyke apakta'ák, aptahak axta apkelyennaktésawo apkelpeywa s'e: —¡Yepyósho henlanok negko'o, David apketche!

²⁸ Xama axta aptaxnegwokmo Jesús kañe' tegma, apyo'ókmek axta énxet'ák meyke apakta'ák, aptahak axta Jesús apkelmaxneyeyncha'a s'e: —¿Yagkólya'ásekmok seyewagko ko'o altakmelchesók kéxegke? —Ehay, Wese', —axta aptahak apkelátegmowágko xa énxet'ák nak.

²⁹ Keñe axta apkelpaknegkesekmoho apakta'ák Jesús xa énxet'ák nak. Aptahak axta apkeláneya s'e: —Katnehek sat xa ektahakxa nak megkólya'áseyam kéxegke.

³⁰ Apkelwetákxeyk axta nahan exma xa énxet'ák nak. Aptahak axta apkelpakhetcháseykxoho Jesús meltamho exének se'e: —Nágkóltennasha aksa xama énxet.

³¹ Apkelántepók axta aksa yókxexma ñohok axta apkeltenneyncha'a aptemésesakxa Jesús xa énxet'ák nak.

Jesús aptakmelcheseyam xama énxet meyke appeywa

³² Xama axta apkelántepa xa énxet'ák kaxwé kéltakmelcheseyam nak, nápakha énxet'ák axta anhan apyentegkesakmok Jesús xama énxet meyke appeywa, kelyekhama' axta ektawáseykha m'a.

³³ Xama axta aptekkesa Jesús kelyekhama' kañe' apwáxok xa énxet meyke appeywa nak, yetlókók axta ektepeykekxa appeywa. Pelakkásók agko' axta apkelwet'a énxet'ák. Aptahak axta apkelpakmeta s'e: —¡Megkótémaxchek makham nepyeseksa énxet'ák Israel ekhawo xa ektahakxa nak!

³⁴ Aptahak axta énxet'ák fariseos apkelpakmeta s'e: —Kelyekhama' wese' nak ekméso apmopwána yakwayam elántekkesek kelyekhama' xa énxet nak.

Jesús apmopyósa elanok énxet'ák

³⁵ Apweynchámeyha axta Jesús ekyókxoho nepyeseksa tegma apwányam, tén han ekyókxoho nátegma, apkelxekmósegkek axta cha'a énxet'ák kañe' apchakneykekxexa énxet'ák judíos ekyókxoho yókxexma. Aplegasegkek axta anhan amya'a ektakmela ekxeyenma nak ma'a aptémakxa nak Wese' apwányam Dios, apmasésegkek axta anhan ma'a ekyókxoho ektémakxa nak negháxamáxche, tén han ma'a nenlegeykegkoho ekmáske nak.

³⁶ Xama axta apwet'a Jesús xa énxet'ák nak, apyósekak axta apkelano, hakte kellapwámeykegkek axta, méko axta nahan ekpasmo, máxa axta aptamheykegkok ma'a nekkések meykel'a eltakmelcheso.

³⁷ Keñe axta aptaha Jesús apkeláneya apkeltámeséyak se'e: —Xámok neyke agkok aksok yakwayam nak kanakxaxche, keñe apkántawók ma'a énxet yakwayam nak enakxek ekyexna.

³⁸ Kólmaxna kéxegke m'a ektaha nak Wese' namyep, yakwayam enxoho eláphaksek ma'a ektaha nak apkeltamheykha yakwayam yanchásekxak xa ekyexna nak.