SAN MATEO 26 - Lengua Sur (Enxet) Nuevo Testamento

Ekhémo mók apkelpakmeyesma énxet'ák yakwayam yának emakpok Jesús

¹ Xama axta apsawha apkeltennáseykha énxet'ák Jesús, aptahak axta apkeláneya apkeltámeséyak se'e:

² —Kélya'ásegkok kéxegke eyéméxko ánet ekhem yakwayam kalanaxchek ma'a ekhem melwagkayam nak énxet'ák judíos kéltéma nak Pascua, cham'a yakwánxa sat kólának emakpok aptaha nak Apketche énxet yakwayam kólyepetchesek aksok ektegyéso.

³ Apchaknákxeyk axta énxet'ák apkelámha apmonye'e nak appasmo apkelmaxnéseso Dios énxet'ák apagkok ma'a Caifás apxagkok, cham'a Caifás aptaha axta apkemha apmonye appasmo apkelmaxnéseso Dios énxet'ák apagkok. Axta anhan ma'a énxet'ák apkelámha apmonye'e nak apchakneykekxexa énxet'ák judíos.

⁴ Apkeláneykxeyk axta apkelpakmeyesma yakwayam emok Jesús yetlo apkelyexamakpoho, keñe anhan yának emátog.

⁵ Aptahak axta apkelpakmeta s'e: —Manlanyek sat eyke nepyeseksa énxet apxámokma ekhem mólwagkayam nak, yakwayam enxoho mennegkesexma énxet'ák.

Xama kelán'a expakháseso sokmátsa apkátek Jesús

⁶ Apheyk axta Jesús tegma apwányam Betania, Simón apxagkok, cham'a apkeltamhomakpo axta negmasé ektepelchamáxche egyempehek áto';

⁷ Yo'ókmek axta Jesús xama kelán'a aphakxa nekha mésa. Sókok axta xama sokmátsa elánamáxche axta axagkok meteymog ekwesey nak alabastro, enókok agko' axta m'a. Kexpakhásesek axta apkátek Jesús ma'a sokmátsa nak.

⁸ Xama axta apkelwet'a Jesús apkeltámeséyak ektaha xa, apkellókek axta. Aptahak axta apcháneya s'e: —¿Yaksak ektaha ektawáseyncha'a nak xa sokmátsa nak?

⁹ Tásek axta eykhe kólyenyekxak ekmomnáwa agko' xa sokmátsa nak, yakwayam enxoho kólpasmok ma'a énxet'ák meyke nak aksok apagkok.

¹⁰ Apleg'awók axta Jesús xa. Aptahak axta apkeláneya apkeltámeséyak se'e: —¿Yaksak ektaha kélya'asa nak exma xa kelán'a nak? Tásek setnésesakxa ko'o xa.

¹¹ Exmakha sat cha'a kélnepyeseksa kéxegke énxet'ák meyke nak aksok apagkok, wánxa agkok maxek sat eyke cha'a ko'o kélnepyeseksa kéxegke.

¹² Penchásók elana yakwánxa nak ko'o katnehek selatawanya ektahakxa nak sexpakhágwa'a sokmátsa xa kelán'a nak.

¹³ Kaxénaxchek sat nahan cha'a ekyókxoho yókxexma kéltennágkaxa enxoho cha'a tásek amya'a setnésesamakxa xa kelán'a nak. Sat ektahakxa agkok megkólwagkayam xa ektaha nak. Nakso' xa sektahakxa nak sekpeywa seláneya kéxegke.

Judas appelakkaseso apkenagko emakpok Jesús

¹⁴ Apmahágkek axta aphágkaxa apkelámha apmonye'e appasmo apkelmaxnéseso Dios énxet'ák apagkok xama Jesús apkeltámeséyak, apkeñama axta nepyeseksa doce Jesús apkeltámeséyak, cham'a apwesey axta Judas Iscariote.

¹⁵ Aptahak axta apkeláneya s'e: —¿Háxko sat ekwánxa helmések selyakye sekmésa enxoho ko'o kéxegke Jesús. Apyanmagkasek axta treinta sawo selyakye elmomnáwa.

¹⁶ Keñe axta aptegyeyncha'a Judas yakwánxa etnésesek yának emok Jesús xa énxet'ák nak.

Nempasmo ektakmela

¹⁷ Wokmek axta eyeynókxa ekxega ekhem aptámákpexa axta pan meyke kempáseyak, apkelmeyákxeyk axta apkeltámeséyak aphakxa Jesús. Aptahak axta apkelmaxneyeyncha'a s'e: —¿Háxko sat yának anlánegwók nentéyak ekhem Pascua mólwagkayam nak?

¹⁸ Aptahak axta apchátegmowágko Jesús se'e: —Kólmohok apxagkok xama énxet ma'a nepyeseksa tegma apwányam. kóltehek sat kólának se'e: ‘Aptahak xeyk sẽláneya negko'o sẽlxekmóso s'e: Chágketwokmek kaxwo' ekhem yakwánxa amátog ko'o. Amhagkok sat ko'o apxagkok xép yakwayam alánegwók nentéyak ekhem Pascua mólwagkayam nak yetlo seltámeséyak.’

¹⁹ Aptamhágkek axta anhan apkeltámeséyak ma'a aptahakxa axta apcháneya Jesús, apkelánegkek axta nahan aptéyak ekhem Pascua melwagkayam axta.

²⁰ Xama axta ekyaktésa, apheyk axta xamo' Jesús doce apkeltámeséyak nekha mésa;

²¹ Aptahak axta apkeláneya neyseksa aptéyak se'e: —Kélxama sat kólának amaxchek kéxegke. Nakso' xa sektahakxa nak seláneya kéxegke.

²² Kelapwámegkók agko' axta apkeltámeséyak apkelleg'a xa, xama axta apmákpok aptaha apkelmaxneyeykha Jesús se'e: —Wese', ¿ko'oya sat?

²³ Aptahak axta apchátegmowágko Jesús se'e: —Sat yának amaxchek ko'o m'a sekyásáso exchek xamo' pan kañe' sokpayhe.

²⁴ Katnehek sat aptaha nak Apketche énxet ma'a ektémakxa nak ekxeyenma eknaktáxésamaxche weykcha'áhak; wánxa agkok, sagkók agko' sat eyke katnehek kéllegasáseykegkoho m'a ektaha nak apkeltémo emakpok aptaha nak Apketche énxet. Tásek axta eykhe metyemek xa énxet nak.

²⁵ Keñe axta appakmeta Judas, aptaha axta apkeltémo emakpok Jesús. Aptahak axta apkelmaxneyeyncha'a s'e: —Sẽlxekmóso, ¿ko'oya sat? —Cháxa aptahakxa nak appeywa —axta aptahak apchátegmowágko Jesús.

²⁶ Neyseksa aptéyak axta apmak pan Jesús, apmések axta ekxeyenma apwáxok Dios, keñe axta apyepta, apkelmeyásegkek axta anhan apkeltámeséyak. Aptahak axta apkeláneya s'e: —Kólma, kóltaw, keso sekyókxoho ko'o s'e.

²⁷ Keñe axta apma anhan egheykok, apmések axta makham ekxeyenma apwáxok Dios, keñe axta apmésa apkeltámeséyak. Aptahak axta apkeláneya s'e: —Kólyenák kélyókxoho s'e,

²⁸ hakte cháxa éma ahagkok ko'o xa, ektaha nak ekteméseso ekmámnaksoho m'a ekhémo mók nelpakhetchásamáxkoho nak Dios, cháxa peya nak kayegkenaxchek yakwayam enxoho meyakmagkásekxék Dios ektémakxa melya'asáxma apyókxoho énxet.

²⁹ Eltennásek eyke ko'o kéxegke peya meynekxók cha'a ko'o vino elánamáxche nak anmen yámet ekyexna, ekwokmoho sekyenawo xamo' kéxegke vino axnagkok ekyetna nak ma'a aptémakxa nak Wese' apwányam Dios.

Jesús apxeyenma Pedro peya etnehek hó magya'áseyak

³⁰ Apkelmeyákxeyk axta egkexe Olivos natámen apkelmeneykmaso negmeneykmaso eñama nak Salmos.

³¹ Aptahak axta apkeláneya Jesús apkeltámeséyak se'e: —Kélyókxoho sat kamaskok kéltaha mehelya'áseyam ko'o keso axta'a nak. Hakte temegkek eknaktáxésamaxche weykcha'áhak se'e: ‘Wakhek sat ko'o keláneykha nekkések, keñe sat yexpaknek ma'a nekkések.’

³² Wánxa agkok, ekxátekhágwokmek sat agkok ko'o, sekweykekxa emonye sat atnehek ko'o m'a Galilea, keñe sat kólwakxak kéxegke axayo'.

³³ Aptahak axta apchátegmowágko Pedro s'e: —Kamaskok sat eykhe etnehek apcháyo exchep selxegexma'a, megkamassehek eyke ko'o seyáyo exchep.

³⁴ Aptahak axta apcháneya Jesús se'e: —Antanxo sat katnehek xép mexeyenma sekwesey keso axta'a nak, amonye elpáwá tat'a. Nakso' xa sektahakxa nak sekpeywa seyáneya exchep.

³⁵ Aptahak axta Pedro s'e: —Watsaphok sat eykhe xamo' xép, megkamassehek eyke sekxeyenma apwesey exchep. Hawók axta anhan aptahakxa apkelpakmeyesma apyókxoho apkeltámeséyak.

Jesús apteme nempeywa nelmaxnagko yókxexma Getsemaní

³⁶ Apmeyákxeyk axta Jesús yetlo apkeltámeséyak yókxexma eltamhomaxchexa axta Getsemaní. Aptahak axta apkeláneya apkeltámeséyak se'e: —Kólhakha sekxo' se'e. Amhagkok sekxo' ko'o mók nekha atnegwók nempeywa nelmaxnagko.

³⁷ Apyentegkek axta Pedro tén han apkánet Zebedeo apketchek. Awanhek axta elapwayam Jesús, teyekmek axta anhan apwáxok.

³⁸ Aptahak axta apkeláneya s'e: —Eyeykhágwokmók ko'o selapwayam máxa entahak sétsapa enxoho. Kólhakha sat se'e. Nágkólnakten aksa, helwahánho sat matyenma.

³⁹ Yetlókók axta apxega Jesús apmahágko yámmakhawo, apháxegwokmek axta ekwokmoho aptekxeya ekpayhakxa nápát xóp. Aptahak axta aptaha nempeywa nelmaxnagko s'e: “Táta, apwanchek agkok xép, nágyána aksa añegkohok ko'o yakwánxa nak hetnehek ekyetchesamaxkoho nak xama egheykok negya aksok ekmáskel'a, momenyék ko'o kalanaxchek ma'a sekmamenyého ahagko' nak, wánxa m'a apmopmenyého nak xép.”

⁴⁰ Keñe axta apmeyákxo makham aphágkaxa apkeltámeséyak. Apwetágweykxeyk axta apnaktena. Aptahak axta Jesús apcháneya Pedro s'e: —¿Megkólwancheya exchek megkólnaktena ekweykmoho xama hora selwéhenawo selhaxneykha ko'o?

⁴¹ Kólleyxmakha, nágkólnaktén, kólteme nempeywa nelmaxnagko yakwayam enxoho megkahapwék kéxegke ekyekkónma. Kélmenyék eykhe kóllának kéxegke ekpayhawo nak anlána', kélyelkáxkók eyke.

⁴² Aptakháwok axta makham Jesús. Aptahak axta aptaha nempeywa nelmaxnagko s'e: “Táta, mowanchek agkok ko'o sektakhésawo xa peya nak añegkoho', katnehek sat ma'a apkepmenyého nak katnehek xép.”

⁴³ Xama axta apmeyanto makham aphágkaxa apkeltámeséyak, apwetágwakteyk axta makham apnaktena, hakte mopwancha'ak axta menaktena.

⁴⁴ Apkexakkek axta aksa aptemegwákxo makham nempeywa nelmaxnagko, apheyásók axta apteme nempeywa nelmaxnagko m'a aptahakxa axta cha'a appeywa.

⁴⁵ Keñe axta apmeyákxo makham aphágkaxa axta apkeltámeséyak. Aptahak axta makham apkeláneya s'e: —Kélnaktenchek neykel'a makham kéxegke kéllókasa kélyampé. Wokmek kaxwo' yakwánxa kólmések aptaha nak Apketche énxet ma'a énxet'ák melya'asáxma nak.

⁴⁶ Nók, kólchaknekxa néten; keto' apwa'akxa m'a ektaha axta apkeltémo amaxchek ko'o.

Jesús apmomap

⁴⁷ Neyseksa appakmeyesma Jesús axta apwokmok Judas, aptaha axta apkeñama nepyeseksa m'a doce Jesús apkeltámeséyak. Apxámok axta énxet apkelxegexma'a apwokmo m'a, yetlo apkelmeykha sókwenakte, yámet axta anhan apkelmeykha. Enxet'ák apkelámha apmonye'e appasmo apkelmaxnéseso Dios énxet'ák apagkok axta apkeláphaso, tén han ma'a énxet'ák judíos apkelámha apmonye'e nak kélakneykekxexa.

⁴⁸ Nano' axta apkeltennasa Judas énxet'ák yakwánxa etnehek yakwayam enxoho elya'asagkohok apkelxegexma'a aptémakxa Jesús. Aptahak axta apkeláneya s'e: “Enxet sekpetsesakxa enxoho ko'o, sat kólmok ma'a.”

⁴⁹ Apyo'ókmek axta Judas apkenmágkaxa Jesús. Aptahak axta appeykesa s'e: —¡Xép nak sẽlxekmóso! Appetsesek axta.

⁵⁰ Aptahak axta apchátegmowágko Jesús se'e: —Emók, epekhaksoho elának ma'a apmoko nak elának. Keñe axta apkelakxegakmoho nahan ma'a nápakha Judas apkelxegexma'a, keñe axta apma Jesús xa énxet'ák nak.

⁵¹ Yetlókók axta anhan apleklo sókwenakte apagkok xama Jesús apkeltámeséyak, apyakténchesek axta apeykok apkemha apmonye appasmo apkelmaxnéseso Dios énxet'ák apagkok apkeláneykha.

⁵² Aptahak axta apcháneya Jesús se'e: —Yakxegkásekxa axagkok sókwenakte apagkok, hakte apyókxoho énxet ektaha nak apkelmeykha sókwenakte apkennapmap, sókwenakte nahan kannápok.

⁵³ ¿Ya ey'ásegkok xép seyewagko ko'o almaxnak Táta yakwayam hepasmok, keñe heyaphásesek ko'o apkelásenneykha apxámokma apagko' keso kaxwo' nak?

⁵⁴ Ektemék agkok ko'o xa, megkatnehek ma'a ektémakxa nak ekxeyenma eknaktáxésamaxche weykcha'áhak, ekxeyenma eyéméxko katnehek xa.

⁵⁵ Yetlókók axta apteme apkelmaxneyeykha Jesús énxet'ák se'e: —¿Yaksak ektaha kélsokmoho nak kéxegke sókwenakte tén han yámet selya'awa yakwayam helmok máxa énxet ekmaso aptémakxa eltemesásak? Yókxoho ekhem axta ko'o selxekmóso énxet kañe' tegma appagkanamap, axta nahan helmák kéxegke.

⁵⁶ Wánxa agkok, temék eyke yakwayam enxoho katnehek ma'a ektémakxa axta eknaktáxésamaxche weykcha'áhak, cham'a apkelxeyenma axta énxet'ák ektaha axta Dios appeywa apkellegaso. Apyenyókek axta aksa apxakko' Jesús apkeltámeséyak apkenyahágko ektaha axta xa.

Jesús kélyentama aphágkaxa énxet'ák ekyawe kéláyo nak

⁵⁷ Caifás apxagkok axta apyentamákxak Jesús ma'a énxet'ák ektaha axta apma, cham'a Caifás aptaha axta apkemha apmonye appasmo apkelmaxnéseso Dios énxet'ák apagkok. Axta apchaknákxak énxet'ák apkelxekmóso axta ektémakxa segánamakxa m'a, tén han ma'a apkelámha apmonye'e nak énxet'ák judíos.

⁵⁸ Axta etétegkohok Pedro apyetlawa kélya'asakxa Jesús, axta apwokmok ma'a ekyawakxal'a apwáxok tegma, apkemha apmonye appasmo apkelmaxnéseso Dios énxet'ák apagkok axta apxagkok ma'a. Aptaxnegwokmek axta, aphakmek axta aphágkaxa sẽlpextétamo aptakmelcheso tegma appagkanamap yakwayam enxoho étagkohok yakwánxa katnehek.

⁵⁹ Aptegyáha axta amya'a megkamámnaksoho yakwayam yának emátog Jesús ma'a énxet'ák apkelámha apmonye'e axta appasmo apkelmaxnéseso Dios énxet'ák apagkok, tén han ma'a énxet'ák ekyawe axta kéláyo.

⁶⁰ Apxámok axta eykhe énxet apkelwayam apteme cha'a apkelmopwána amya'a apxéna Jesús, wánxa agkok, axta eyke elwetákxak yakwánxa etnésesek. Nano' axta entahak apkelwokmo anhan apkánet énxet.

⁶¹ Aptahak axta apkelpeywa s'e: —‘Ewanchek ko'o ategkesek se'e Dios tegma appagkanamap apagkok nak, keñe axátekhásekxak makham antanxo ekhem’ —axta aptemék appeywa xa énxet nak.

⁶² Apkempákxeyk axta néten énxet apkemha apmonye axta appasmo apkelmaxnéseso Dios énxet'ák apagkok. Aptahak axta apkelmaxneyeyncha'a Jesús se'e: —¿Megyátegmowagkeya ektahakxa nak apxénamap xép? ¿Yaksak xa ektahakxa nak apxénamap xép?

⁶³ Wánxa agkok, apwanmakkek axta eyke aksa Jesús. Aptahak axta apcháneya énxet apkemha apmonye appasmo apkelmaxnéseso Dios énxet'ák apagkok se'e: —Yetlo sekxeyenma apwesey Dios memassegwayam ko'o, eltamhok heltennaksek xép ekmámnaksoho agko'. Hẽltennés negko'o aptaha enxoho exchep Mesías, aptaha nak Dios Apketche.

⁶⁴ Aptahak axta apchátegmowágko Jesús se'e: —Cháxa aptahakxa nak appeywa exchep. Eltennásek nahan ko'o xa kéxegke peya kólwetak exek ekpayhókxa apkelya'asamakxa Dios ekha apyennakte m'a aptaha nak Apketche énxet, tén han kólwetak exyók neyseksa yaphopé m'a néten.

⁶⁵ Keñe axta apkelyepta aptaxno m'a énxet aptaha axta apkemha apmonye appasmo apkelmaxnéseso Dios énxet'ák apagkok magkenatcheso megkalcha apwáxok ma'a aptahakxa axta appeywa Jesús. Aptahak axta appakmeta s'e: —¡Enmexma Dios aptahakxa nak appeywa xa énxet nak! Megkeyméxchek kaxwo' antegyekxohok énxet ektaha apya'áseykegkoho aptémakxa. Kélleg'ak kéxegke aptahakxa nak appeywa enmexéncha'a Dios;

⁶⁶ ¿háxko ektahakxa elchetamso kélwáxok kéxegke? Aptahak axta apkelátegmowágko énxet'ák se'e: —Apsexnánémap apagko'. Kéméxchek yetsapok.

⁶⁷ Keñe axta kélexpakha'a kélyamánog nápát, kéltekpagkek axta nahan cha'a. Keñe axta nápakha énxet aptekpagkasa cha'a nápát.

⁶⁸ Aptahak axta apcháneya s'e: —¡Xép apteme Mesías, ey'asagkoho' xa ektaha nak ektekpaga!

Pedro apteme hó magya'áseyak Jesús

⁶⁹ Apheyk axta Pedro kañe' ekyawakxa apwáxok tegma, keñe axta ekyo'ókmo xama kelán'a kélásenneykha. Entahak axta eyáneya s'e: —Etnohok axta cha'a exchep apxegexma Jesús apkeñama nak Galilea.

⁷⁰ Axta eyke exénak Pedro nápakta'awo' énxet'ák. Aptahak axta se'e: —May'ásegkok ko'o ektahakxa nak ekpeywa seyáneya.

⁷¹ Keñe axta apmeyákxo Pedro átog. Wet'ak axta makham mók kelán'a kélásenneykha. Entahak axta eláneya énxet'ák ektaha axta apheykha m'a: —Cháxa aptéma axta cha'a apxegexma Jesús xa, cham'a apkeñama nak Nazaret.

⁷² Axta exénak makham Pedro, aptahak axta aptemésesa ekmámnaksoho appeywa s'e: —¡May'ásegkok ko'o m'a énxet nak!

⁷³ Axta kanéwo, keñe axta kélyo'ókmo Pedro. Axta apyo'ókmok ma'a énxet'ák ektaha axta apheykha m'a. Aptahak axta apcháneya s'e: —Nakso' aptaha exchep apkelxegexma'a m'a énxet'ák nak. Hakte negyekpelchawók nahan negko'o ektémakxa nak appeywa exchep.

⁷⁴ Apyennaktésekmók axta appeywa Pedro apxéna eñásesagkohok Dios metnaha enxoho ekmámnaksoho appeywa. Aptahak axta s'e: —¡May'ásegkok ko'o m'a énxet nak! Chakhawók axta anhan ekpáwa xama tat'a kennawo',

⁷⁵ keñe axta ekxénwákxoho apwáxok Pedro aptémakxa axta apkenagkama Jesús se'e: ‘Antanxo sat katnehek mexeyenma exchep sekwesey amonye ekpáwa tat'a.’ Keñe axta aptepa Pedro m'a, axta yeyságkohok apwana.