SAN MATEO 23 - Lengua Sur (Enxet) Nuevo Testamento

Jesús apxeyenma nápakta'awo' énxet'ák apkeltémakxa fariseos tén han ma'a énxet'ák apkelxekmóso nak segánamakxa

¹ Aptahak axta Jesús apkeláneya énxet'ák tén han apkeltámeséyak se'e:

² “Apmeykekxek ektémakxa axta aptamheykha Moisés xa énxet'ák apkelxekmóso nak apnámokkok ektémakxa segánamakxa tén han ma'a fariseos.

³ Kólyahakxoho kéxegke xa énxet'ák nak, kóllána nahan ma'a apkeltamhókxa enxoho kóllána, akke nágkólyetlakxa m'a apkeltémakxa nak, hakte exének cha'a xama aksok, keñe elának cha'a mók aksok.

⁴ Eyeykhasagkohok cha'a m'a apkeltémókxa nak etnahagkok énxet'ák, pók énxet aksa cha'a yehekxak xa, keñe melanagkek xama enxoho xa énxet'ák nak.

⁵ Exekmóshok nahan cha'a énxet'ák ma'a ekyókxoho aksok apkeláneyak nak. Apmenyék nahan keytek Dios appeywa kéltáxéso ekpayhakxa nápát, tén han ma'a apaktegák nak, apmenyék nahan elyáncheshok elmakheykha napwa'ék apkelántaxno.

⁶ Apmenyék nahan katakmelhok apteykegkaxa nak aptéyak, apmenyék nahan kaxnagkok eltakmela apkeltaháno m'a kañe' apchakneykekxexa nak.

⁷ Apmenyék nahan kólpeykesek yetlo kéláyo m'a ámay nepyeseksa tegma nak, apmenyék nahan kóltehek kólának ‘sẽlxekmóso’.

⁸ “Wánxa agkok, nágkólho aksa kóltamhaxche kéxegke sẽlxekmóso, hakte kélyókxoho kéxegke kélteme kélyáxeg xamo', wánxa aksa xama apyetna m'a Apkelxekmóso nak kéxegke.

⁹ Nágkólteme aksa anhan kélyap kéxegke xama énxet apheykha nak keso náxop, hakte wánxa xama Kélyap ma'a apha nak néten.

¹⁰ Nágkólho nahan kóltamhaxche kéxegke sempeykesáseyak, hakte Cristo apwánxa apagkok aptaha Sempeykesáseyak.

¹¹ Enxet ektahakxa enxoho apkemha apmonye kélnepyeseksa kéxegke kéméxchek epasmok apnámokkok.

¹² Kéxegke ektahakxa enxoho kéltémo kólawho nepyeseksa kélnámokkok, mékoho sat kóltemesásekxa'; keñe sat kéxegke kéltemesásamáxche nak mékoho, ekha kéláyo sat kóltemesásekxa'.

¹³ “¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa! Megkólhayók nahan kéxegke elántexek énxet ma'a aptémakxa nak Wese' apwányam Dios. Megkólántaxnók nahan kéxegkáxa, megkólhayók nahan elántexek énxet apmáheyo neykhe elántexek.

¹⁴ Kéxegkel'aye kélxekmóso nak kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kéltémakxa, hakte kólyementamhok cha'a kéxegke axanák ma'a kelán'ák tampe' nak, kólwenaktéshok nahan cha'a nempeywa nelmaxnagko yakwayam megkeykpelchexchek kéltahakxa. Ekeso eñamakxa peya nak kólxawak kéxegke ekyawe kéllegasáseykegkoho.

¹⁵ “¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa! Kólsawhekxohok cha'a kélweynchámeykha keso náxop, tén han ma'a wátsam ekwányam nak, yakwayam enxoho elyetlakxak énxet kéltémakxa kéxegke. Kélwet'ak agkok nahan énxet apyetleykekxa kéltémakxa kéxegke, kóltemésesek cha'a eyéméxko agko' kólya'aksek sẽlmasésamakxa xa énxet nak, kayeykhágwomhok cha'a yakwánxa kóltemésesek kéllegasáseykegkoho kéxegke xa énxet'ák nak.

¹⁶ “¡Kéxegkel'aye kéltaha nak meyke kélakta'ák kélpeykesáseyak apxega kélmók! Kéltéma nak cha'a kélpeywa méko katnehek melana enxoho énxet ma'a aptemésesa enxoho ekmámnaksoho appeywa yakwayam elának xama aksok, cham'a apxéna enxoho ektaha apweteykegkoho m'a tegma appagkanamap, keñe apxéna enxoho ektaha ekweteykegkoho m'a selyakye ekyetna nak kañe' tegma appagkanamap, keytlawhok nahan apkelané aptahakxa enxoho appeywa.

¹⁷ Kéxegke elyéháxma nak, tén han meyke kélakta'ák nak. ¿Yaksak aksok ektaha ektakmela agko', selyakye, enxeykel'a m'a tegma appagkanamap nak? Hakte tegma appagkanamap keñamak apteméseso ekpagkanamaxche xa selyakye nak.

¹⁸ Kóltamhohok nahan cha'a kélpeywa kéxegke s'e: ‘Méko katnehek melana enxoho énxet ma'a aptemésesa enxoho ekmámnaksoho appeywa yakwayam elának xama aksok, apxéna enxoho ektaha ekweteykegkoho m'a ekwatnamáxchexal'a aksok, keñe apxéna enxoho ektaha ekweteykegkoho m'a aksok kélnegkenmol'a néten ekwatnamáxchexa aksok, keytlawhok nahan apkelané aptahakxa enxoho appeywa.’

¹⁹ ¡Kéxegke meyke kélakta'ák nak! ¿Yaksak aksok ektaha ektakmela agko': aksok eknegkenamaxcheya, enxeykel'a m'a ekwatnamáxchexal'a aksok néten? Hakte ekwatnamáxchexa aksok keñamak ekteméseso ekpagkanamaxche xa aksok eknegkenamaxche nak.

²⁰ Kéxegke ektahakxa enxoho kélteméseso ekmámnaksoho kélpeywa yetlo kélxeyenma ektaha ekweteykegkoho m'a ekwatnamáxchexal'a aksok, megkólxénak wánxa m'a ekwatnamáxchexa nak aksok, akke anhan kélxénak ektaha ekweteykegkoho m'a ekyókxoho aksok ekhéyak nak néten;

²¹ keñe kéxegke ektahakxa enxoho kélteméseso ekmámnaksoho kélpeywa yetlo kélxeyenma ektaha apweteykegkoho m'a tegma appagkanamap, megkólxénak wánxa m'a tegma appagkanamap nak, akke anhan kélxénak ektaha apweteykegkoho m'a Dios apha nak ma'a kañe'.

²² Kéltemésesek agkok kéxegke ekmámnaksoho kélpeywa yetlo kélxeyenma ektaha ekweteykegkoho m'a néten, kélxénchek nahan kéxegke ektaha ekweteykegkoho m'a Dios aptaháno aphamakxal'a, tén han apweteykegkoho m'a Dios.

²³ “¡Kéxegkel'aye, kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa! kélmésamol'a Dios xama aksok ekwokmo enxoho diez ekyókxoho, cham'a pánakte áwa' ekweseyl'a menta, tén han ma'a ekweseyl'a yakpa', tén han ma'a comino, megkólyahakxók eyke cha'a m'a nelxekmowásamáxche ektaha nak ektakmela agko' eñama m'a segánamakxa nak, cham'a nentémakxa ekpéwomo nak, tén han ma'a negemleykekxoho egmók nak, tén han ma'a magyenseyam nak nempasmo egmók. Cháxa eyéméxko nak kóllána kéxegke xa, meyke kélwáteseyam kéllané xa ekyókxoho nak.

²⁴ ¡Kéxegke kéltaha nak meyke kélakta'ák kélpeykesáseyak apxega kélmók! ¡Kólleyhok cha'a kéxegke páye aptaxnegwa'a enxoho egheykok kélagkok, keñe kólnaksapok ma'a yágyatnáxeg!

²⁵ “¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa!, kélyenyesamol'a cha'a empe'ék egheykok kélagkok tén han ma'a sokpayhe kélagkok nak, wánxa agkok, láneyók eyke aksok kélmenyexma m'a kañe', tén han ma'a aksok kélma nak yetlo megkólyexnegwayam.

²⁶ ¡Xép fariseo meyke apakta'ák nak!; yaxñés sekxo' awáxok xa egheykok apagkok nak, keñe sat kawakxohok nahan eyáxñeyo m'a empehek!

²⁷ “¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa!, hakte máxa kéxegke tegma apketkók takhaxpop kélmópesamol'a, aptásek katnehek apyempe'ék, keñe m'a kañe', kalánhok apexchakkok ma'a ektaha nak apkeletsapma, tén han ma'a ekyókxoho ektémakxa nak ektahapma.

²⁸ Cháxa kéltémakxa nak kéxegke xa, máxa kóltehek ektakmela enxoho kéltémakxa nápakta'awo' énxet'ák, keñe kalánhok kélmeyókásamáxkoho kélagko' kéltémakxa m'a kañe' kélwáxok, tén han ma'a ekmaso nak kéltémakxa.

²⁹ “¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa!, hakte kéxegke kéltaha kélláneso takhaxpop apagkok ma'a ektaha axta apkellegaso Dios appeywa, kéxegke nahan kélnáxegkáseykha m'a énxet apkelpéwomo takhaxpop apagkok nak,

³⁰ kóltehek cha'a kéxegke kélpeywa s'e: ‘Negheykha axta agkok negko'o m'a apheykegkaxa axta ẽlyepmeyk nano', mampasmek axta m'a apkelnapma axta énxet'ák Dios appeywa apkellegaso.’

³¹ Kélyekpelchágwokmek kéxegke aptaha apkelnapma Dios appeywa apkellegaso m'a kélyepmeyk nano' kéxegke, cháxa kéltahakxa nak kélpeywa.

³² ¡Kóllenxanmoho kéllané m'a apchénamo axta apkelaneykegko kélyepmeyk nano' kéxegke!

³³ “¡Yéwa kéxegke! ¡Kélhawók kéxegke yéwa! Megkólwanchek sat kéxegke kólegketaxchek ekwa'a sat ma'a kéllegasáseykegkoho eñama nak ma'a sẽlmaséseykenxa nak.

³⁴ Ekeso eñamakxa peya nak ko'o aláphaksek kélnepyeseksa kéxegke énxet'ák apkellegaso nak Dios appeywa, tén han ma'a énxet'ák apkelya'áseykegkoho nak ektémakxa Dios appeywa, tén han ma'a énxet'ák apkelxekmósamo nak apnámokkok. Kólnápok sat eyke kéxegke m'a, aksok ektegyéso sat nahan kólyepetchesek nápakha, kañe' apchakneykekxexa judíos sat nahan kólnáhapmakha m'a nápakha, kólántaxmakha sat nahan nátegma kólmenxenmakha.

³⁵ Kóllegásesagkohok sat kéxegke eñama ekyegkenamaxche éma apagkok ma'a énxet'ák meyke apkeltémakxa aptekyawa axta, Abel axta eyeynókxa, aptaha axta appéwomo, ekwokmoho m'a apmatña axta Zacarías, aptaha axta Berequías apketche, cham'a kélakha axta kéxegke nápakha tegma appagkanamap keto' ekwatnamáxchexa axta cha'a aksok.

³⁶ Sat kañék eyahapweykta kéllegasáseykegkoho énxet'ák apheyncha'a nak keso negwánxa nak. Nakso' xa sektahakxa nak sekpeywa seláneya kéxegke.

Jesús apkelekxagweykha apkelanyo tegma apwányam Jerusalén

³⁷ “¡Jerusalén, Jerusalén! ¡Kélnapmakxa nak cha'a Dios appeywa apkellegaso nak! ¡Kélyetneykxa nak han cha'a meteymog ma'a seykha amya'a Dios apkeláphaso nak! Hágkaxwe amawhok wánchásekxak énxet'ák apheykha xa Jerusalén, ektémol'a kánchásekxak étkók tat'a kóneg axampagkok, axta eyke kólmáheyók kéxegke.

³⁸ Kóllano hana tegma appagkanamap kélagkok, méko sat katnehek eyásekha'a;

³⁹ eltennásek ko'o kéxegke peya mehelwetekxók cha'a kaxwo', ekwokmoho kéltaha kélpeywa s'e: ‘¡Tásek sat katnehek apxénamap xa apwa'a nak yetlo apsayam Dios apwesey!’ ”