SAN MATEO 22 - Lengua Sur (Enxet) Nuevo Testamento

Jesús apyetcháseykekxoho elánamáxche nento sẽlyamhopma

¹ Apkeltennáseyha axta makham Jesús énxet'ák aksok apyetcháseykekxoho. Aptahak axta apkeláneya s'e:

² “Máxa xama wese' apkeláneso ektámáxche nento elyamhopma apketche m'a aptémakxa nak Wese' apwányam Dios.

³ Apkeláphásek axta apkelásenneykha apkeltamho eltennásekxak ma'a énxet'ák ektaha axta apkeláneyeykha, axta eyke emokok epásegwók xa énxet'ák nak.

⁴ Apkeláphásekxeyk axta makham pók apkelásenneykha. Aptahak axta apkeláneya s'e: ‘Kóltennés ekpencháséxko elánamáxche nento m'a énxet'ák seláneyeykha axta, eltamhok xeyk ko'o kólnápok weyke tén han seknaktóso kélnakmelaso nak, penchásexchek ekyókxoho; tásek elxegmak kaxwo'.’

⁵ Axta eyke elyahákxak énxet'ák ektaha axta kéláneyeykha. Xóp apagkok axta apmeyákxak pók énxet ektaha axta kéláneyeykha, keñe axta pók apmeyákxo m'a apkelyanmagkásamakpexa,

⁶ keñe axta nápakha apkelma xa wese' apkelásenneykha nak, apnaktawásegkok axta anhan ekwokmoho apkennapa.

⁷ Aplókok apagko' axta xa wese' nak, apkeltamhok axta ennáhapwók sẽlpextétamo apagkok xa énxet'ák apkennapa axta apkelásenneykha, apkeltamhok axta anhan ewatneyásekxak apheykegkaxa.

⁸ Aptahak axta apkeláneya apkelásenneykha s'e: ‘Penchásexchek elánamáxche ektámáxche nento sẽlyamhopma, wánxa agkok, akke kapayhawok elxegmak ma'a énxet'ák seláneyeykha axta ko'o.

⁹ Kólmohok kéxegke ámay nepyeseksa tegma apwányam, kólána sat epásegwók ektámáxche nento sẽlyamhopma énxet kélwet'akxa enxoho.’

¹⁰ Apkelxegkek axta nahan xa wese' apkelásenneykha nak, apchánchesakxeyk axta apyókxoho énxet'ák ektaha axta apkelweté, elmasagcha'a apkeltémakxa, tén han ma'a ektakmela nak apkeltémakxa; keñe axta aplana énxet ma'a ektámáxchexa nento.

¹¹ “Xama axta aptaxnegwokmo wese' apteyánegwokmoho m'a énxet'ák ektaha axta apkeláneyeykha, apwet'ak axta xama énxet apmaheyak axta aksa meyke apkennáxamomap.

¹² Aptahak axta apcháneya s'e: ‘Emók, ¿háxko aptahakxa aptaxnegwa'a exchep se'e, yetlo meyke apkennáxamomap?’ Apwanmakkek axta aksa xa.

¹³ Keñe axta apkelpakhetchesa wese' m'a énxet'ák ektaha axta apkeláneykha neyseksa ektámáxche nento sẽlyamhopma, aptahak axta apkeláneya s'e: ‘Kólnaktetches apmagkok, tén han apmék, kólyenyaw yókxexma ekyaktesakxa nak exma, cham'a yakwánxa sat elekxagwaha m'a, eltakxek sat nahan apma'ák eñama aplegeykegkoho ekmáske.’

¹⁴ Apxámok énxet ektaha nak kéláneyeykha, apkántawók eyke m'a ektaha nak kélyéseykha.”

Amya'a ekxénamaxche selyakye elmomaxche

¹⁵ Apkelxegkek axta énxet'ák fariseos, apkeláneykxek axta apkelpakmeyesma yakwayam ékkónek esexnenak Jesús aptahakxa enxoho appeywa, cham'a natámen axta xa.

¹⁶ Apkeláphásek axta énxet'ák fariseos énxet'ák ektaha axta apkelxegexma'a, tén han ma'a ektaha axta apkelyetlo Herodes, yakwayam enxoho etnehek yának Jesús se'e: —Sẽlxekmóso, negya'ásegkok negko'o ektéma cha'a ekmámnaksoho aksok apxeyenma exchep, tén han apkelxekmósama énxet'ák ma'a apkeltémókxa nak antehek Dios, meyke apkenmexmo m'a ektémakxa nak apkelpakmeyesma énxet, hakte mexeyenmak xép ma'a elpeykesáseykekxoho nak apwáxók énxet'ák.

¹⁷ ¿Háxko katnehek xép elchetamso apwáxok?: ¿Táseya agmések selyakye wese' Roma, sagkek enxeykel'a?

¹⁸ Apyekpelchawók axta Jesús ektahakxa ekmaso elchetamso apwáxók xa énxet'ák nak. Aptahak axta apkeláneya s'e: —Kéxegke kélmeyókásamáxkoho nak kéltémakxa, ¿Yaksak ektaha selyekkóna nak?

¹⁹ Helxekmós hana ko'o sawo selyakye kélmésamol'a cha'a wese' Roma. Apsókasakmek axta xama sawo selyakye.

²⁰ Aptahak axta apkelmaxneyeyncha'a Jesús se'e: —¿Yaksak nát so, yaksak nahan énxet apwesey so kéltáxéso nak?

²¹ Aptahak axta apkelátegmowágko s'e: —Wese' apwányam Roma. Keñe axta aptaha apkeláneya Jesús se'e: —Kólmés wese' Roma m'a ektaha nak apagkok, kólmés nahan Dios ma'a ektaha nak apagkok.

²² Xama axta apkelleg'a xa, apkelwanmeyágkek axta aksa apkelano, apyenyókek axta aksa apkeltakháwo.

Jesús kélmaxneyeykha ektémakxa nennakxétekhágwayam

²³ Nápakha énxet'ák saduceos axta nahan apkelwokmok apteyánegwokmoho Jesús cham'a ekhem axta. Exénhok axta cha'a énxet'ák saduceos méko m'a nennakxétekhágwayam nak; ékeso eñamakxa aptaha axta apkelmaxneyeyncha'a Jesús se'e:

²⁴ —Sẽlxekmóso, apxeyenmék axta Moisés ma'a apketsapa enxoho xama énxet méko enxoho apketche, keñe apyáxeg emekxak xa appepma aptáwa axta, yakwayam enxoho étaksek apketchek m'a apepma' apketsapma axta.

²⁵ Apheykha axta negyeseksa negko'o siete énxet apkelyáxeg xamo'. Kelyamhopmék axta m'a ektaha axta apwányam, keñe axta apketsapa. Axta eteyk apketche, keñe axta apmákxo apyáxeg ma'a apepma' aptáwa axta.

²⁶ Hawók axta anhan ektahakxa m'a pók ektaha axta aptéteyak, tén han ma'a pók ektaha axta anhan aptéteyak xa pók nak, axta temék xa ektaha nak ekweykmoho apsawhomákpoho m'a siete nak.

²⁷ Apsawhekpók axta apkeletsapa xa, keñe axta anhan étsapa m'a kelán'a.

²⁸ Wokmek sat agkok ekhem nennakxétekhágwayam, ¿yaksak sat katnehek atáwa nepyeseksa siete xa kelán'a nak?, hakte apsawhomákpók axta aptéma aptáwa xa kelán'a nak.

²⁹ Aptahak axta apchátegmowágko Jesús se'e: —Megkólakhawok kéxegke hakte megkólya'ásegkok ektémakxa nak eknaktáxésamaxche weykcha'áhak, megkólya'ásegkok nahan ma'a ektémakxa nak Dios apmopwána.

³⁰ Apnakxátekhágwokmek sat agkok énxet'ák apkeletsapma axta, kamaskok sat elyamhápegko énxet, tén han ma'a kelán'ák, hakte exnágwakxohok sat ma'a Dios apkelásenneykha apheyncha'a nak ma'a néten.

³¹ ¿Yagkólyetseteyk kéxegke aptéma axta apxeyenma Dios ektémakxa nennakxétekhágwayam se'e?

³² ‘Ko'o sekteme Abraham Dios apagkok, Isaac, tén han ma'a Jacob.’ ¡Háwe énxet apkeletsapma Dios apagkok ma'a Dios, wánxa Dios apagkok ma'a énxet'ák meletsapma nak!

³³ Xama axta apkelleg'a énxet'ák xa, pelakkasek axta apkelwet'a ektahakxa apkelxekmóso Jesús.

Segánamakxa Dios ektaha nak ektakmela agko'

³⁴ Apchaknákxeyk axta énxet'ák fariseos apkelleg'a amya'a apkelwanmeyásekxo Jesús ma'a énxet'ák saduceos,

³⁵ keñe axta xama, aptaha axta apkelxekmóso apnámokkok ektémakxa segánamakxa apmoko nahan ékkónek Jesús. Aptahak axta apkelmaxneyeyncha'a s'e:

³⁶ —Sẽlxekmóso, ¿Yaksak segánamakxa ektahakxa nak ektakmela agko' neyseksa m'a ekyókxoho segánamakxa nak?

³⁷ Aptahak axta apcháneya Jesús se'e: —‘Kólteme kélyeykhásamáxkoho kélagko' kélásekhayo Dios Wese' kélagkok, ekweykmoho kaño' agko' kélwáxok, tén han ekweykmoho m'a ektémakxa nak elchetámeykha kélwáxok.’

³⁸ Cháxa ektahakxa nak ekyagwánxa agkok ektakmela segánamakxa eñama Dios xa.

³⁹ Yetneyk nahan mók ekhawo xa ektéma nak ekxeyenma s'e: ‘Yásekhoho pók ekhawo ektémakxa nak apchásekhamakpoho apagko' xép.’

⁴⁰ Cháxa ánet segánamakxa ektaha nak eksawhomo ekpasmo m'a ekyókxoho eltémókxa nak antehek segánamakxa, tén han ma'a ektémakxa axta apkelxekmóso énxet'ák ektaha axta apkellegaso Dios appeywa.

¿Yaksak apyepmeyk nano' Mesías?

⁴¹ Axta elwátesagkok makham apchakneykekxa énxet'ák fariseos.

⁴² Aptahak axta apkelmaxneyeyncha'a Jesús se'e: —¿Yaksak kélanagkama kéxegke Mesías? ¿Yaksak apyepmeyk nano' ma'a? Aptahak axta apkelátegmowágko s'e: —David aptáwen neptámen.

⁴³ Keñe axta aptaha apkeláneya Jesús se'e: —¿Yaksak eyke ektéma aptekkesesama nak elchetamso apwáxok Espíritu Santo David apkeltéma Wese' apagkok ma'a Mesías? Axta aptemék appeywa David se'e:

⁴⁴ ‘Aptahak axta Wese' Dios appakhetchesa Wese' ahagkok Mesías se'e: Exa ekpayhókxa nak selya'asamakxa, Ekwokmoho seknegkenchesa kóneg apmagkok ekyókxoho apkelenmexma.’

⁴⁵ ¿Háxko katnehek etnehek Mesías David aptáwen neptámen, apkeltéma enxoho David Wese' apagkok ma'a Mesías?

⁴⁶ Méko axta eyewagko kátegmowagkok xama enxoho, natámen, apkelakak axta elmaxneyagkohok xa énxet'ák nak.