SAN MATEO 20 - Lengua Sur (Enxet) Nuevo Testamento

Jesús apyetcháseykekxoho énxet'ák apkeltamheykha neyseksa anmen yámet

¹ “Máxa xama wese' namyep kélcheneykekxexa anmen yámet ma'a aptémakxa nak Wese' apwányam Dios, cham'a apxegama axta axto'o agko' aptegyeyncha'a énxet yakwayam eltemeykha neyseksa anmen yámet.

² Hawók axta mók apkelpakmeyesma yakwayam eyánmagkasek wese' m'a ekweykenxal'a ekyanmaga xama ekhem nentamheykha, keñe axta apkeláphasa yakwayam eltemeykha neyseksa anmen yámet.

³ Apxegákxeyk axta makham axto'o las nueve axta m'a, apwet'ak axta apheyncha'a énxet meyke apkeltamheykha m'a apheykegkaxal'a cha'a énxet.

⁴ Aptahak axta apkeláneya s'e: ‘Kólmohok nahan kéxegkáxa kóltemeykha m'a seneykekxexa nak anmen yámet, ayanmagkasesek sat ekyanmaga kéltamheykha.’ Apkelxegkek axta.

⁵ Apxegákxeyk axta makham xa wese' nak, yetseksókhem axta m'a, keñe axta apxegákxo makham las tres taxnam. Hawók axta makham ma'a aptahakxa axta.

⁶ Las cinco taxnam axta anhan apmeyákxo makham ma'a apheykegkaxal'a énxet, apkelwetágweykxek axta makham énxet meyke apkeltamheykha; aptahak axta apkelmaxneyeyncha'a s'e: ‘¿Yaksak ektaha kélheyncha'a aksa yókxoho ekhem meyke kéltamheykha s'e?’

⁷ Aptahak axta apkelátegmowágko s'e. ‘Méko eyke segmésama nentamheykha.’ Keñe axta aptaha apkeláneya s'e: ‘Kólmohok nahan kéxegkáxa kóltemeykha m'a seneykekxexa nak anmen yámet.’

⁸ “Xama axta ekyaktésa, aptahak axta apcháneya wese' apkemha apmonye apkeláneykha s'e: ‘Elwónmakha hana énxet'ák ektaha nak apkeltamheykha, eyánmagkases nahan apkeltamheykha yeynho apmonye'e m'a axayok xeyk apkeltamheykha, keñe sat axayok eyánmagkasesek ma'a apmonye'e exchek apkeltamheykha.’

⁹ Apkelwokmek axta m'a ektaha axta apchénamo apkeltamheykha las cinco taxnam, apyókxoho axta anhan apkexawágkok ekweykenxal'a kélyanmagkaso xama ekhem nentamheykha.

¹⁰ Keñe axta ekpehewákxo m'a ektaha axta apchénamo apkeltamheykha apmonye'e axto'o, apkeneykek axta kólmokók kólyáncheseshok kélméso ekyanmaga apkeltamheykha; wánxa agkok apyókxoho axta eyke anhan apkexawágkok ma'a ekweykenxal'a kélyanmagkaso xama ekhem nentamheykha.

¹¹ Xama axta apkelmágko selyakye, apkelpakméteyha axta apxéna m'a wese'.

¹² Aptahak axta apkelpakmeta s'e: ‘Aphésawo nak segyanmagkaseso negko'o xa énxet'ák apkelwe exchek amonye nelwáteso nentamheykha, xama hora aksa apkeltamheykha, keñe negko'o neltamheyncha'a neyseksa ekmexanma mayahat ekyókxoho ekhem.’

¹³ Wánxa agkok, apchátegmowágkek axta eyke wese' appeywa xama xa énxet'ák nak. Aptahak axta apcháneya s'e: ‘Emók, matnesásak ko'o exchep ma'a megkapayhawo nak antehek. ¿Yaxchek kaxnawok mók nelpakmeyesma nenxéna ekwánxa ekyanmaga xama ekhem aptamheykha?

¹⁴ Ema xa selyakye apagkok nak, etakhekxa'. Ekmokók agkok ko'o axnéseshok sekméso ekyanmaga aptamheykha exchep xa axayok apkeltamheykha exchek,

¹⁵ hakte payhawók ko'o atnésesek selyakye ahagkok sekmokókxa enxoho atnésesek. ¿Apnatha'ak enxeykel'a exchep sektaha ko'o mamasma aksok ahagkok?’

¹⁶ “Sat nahan katnehek énxet'ák apteme nak apkelámha apmonye'e keso kaxwo' nak, kónegók sat kóltemesásekxak, keñe sat kóltemesásekxak apkelámha apmonye'e m'a énxet'ák apteme nak kónegók keso kaxwo' nak.

Jesús ekteme antanxo apxéneykekxoho yakwayam yetsapok

¹⁷ Apxegkek axta Jesús apmahágko m'a tegma apwányam Jerusalén. Neyseksa apkelxega axta apkelpakhetchásak apxakcha'awók Jesús doce apkeltámeséyak. Aptahak axta apkeláneya s'e:

¹⁸ —Kélwet'awók kéxegke nelmeyákxo kaxwo' ma'a tegma apwányam Jerusalén, cham'a yakwánxa sat kólmések aptaha nak Apketche énxet ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Yának sat nahan emátog,

¹⁹ egkések sat nahan ma'a énxet'ák metnaha nak judíos yakwayam enxoho yesmaksek, tén han etekpagmakha, tén han épetchesek aksok ektegyéso; wánxa agkok, antanxo ekhem sat eyke exátekhágwók makham.

Santiago tén han Juan egken elmaxnagko aksok Jesús

²⁰ Yo'ókmek axta Jesús Zebedeo aptáwa, yetlo étchek, keltekxekwokmek axta atapnák apkenmágkaxa yakwayam enxoho kalmaxnak xama aksok.

²¹ Aptahak axta apkelmaxneyeyncha'a Jesús se'e: —¿Yaksak amenye'? Entahak axta eyátegmowágko s'e: —Yána exmakha ko'o étchek ma'a aptémakxa nak xép Wese', xama sat exnések ekpayhókxa apkelya'asamakxa, keñe sat nahan pók ma'a nepsagkalwa.

²² Aptahak axta apchátegmowágko Jesús se'e: —Megkólya'ásegkok kéxegke xa selmaxneya nak. ¿Kélwanchek enxeykel'a kóllegagkohok ma'a peya nak ko'o añegkoho' ekyetchesamaxkoho nak xama egheykok negyal'a aksok ekmáske? Aptahak axta apkelátegmowágko s'e: —Egwanchek.

²³ Aptahak axta apchátegmowágko Jesús se'e: —Kóllegagkohok sat kéxegke xa nenlegeykegkoho nak, cham'a ekyetchesamaxkoho nak xama egheykok negyal'a aksok ekmáske, akke ko'o hepayhawok wának exek énxet ekpayhókxa nak selya'asamakxa tén han ma'a nésagkalwa. Appagkanchesek eyke Táta m'a énxet ektaha nak apkelyéseykha.

²⁴ Xama axta apkelleg'a nápakha Jesús apkeltámeséyak xa, diez axta apyókxoho m'a, apkellókek axta aptaknawé m'a apkánet énxet apyáxeg xamo' axta.

²⁵ Wánxa agkok, apkelwóneyha axta eyke Jesús ma'a apkeltámeséyak. Aptahak axta apkeláneya s'e: —Kélya'ásegkok kéxegke apkeltémakxa nak énxet'ák melya'áseyak Dios kelwese'e apagkok. Ennaktésakpohok cha'a neyseksa apkelmeykha apnámokkok. Yának nahan cha'a kóltehek kéláyo agko' nepyeseksa apnámokkok.

²⁶ Akke kapayhawok katnehek kélnepyeseksa kéxegke xa ektaha nak. Kélmokók agkok kéxegke kóltehek kélámha kélmonye'e, kéméxchek kóltemeykha aksa nepyeseksa kélnámokkok;

²⁷ Kélmokók agkok kéxegke kóltehek kélámha kélmonye'e, kéméxchek kóltemeykha aksa ektémol'a énxet apmomap.

²⁸ Hakte hawók aptémakxa m'a aptaha nak Apketche énxet, axta eweyk yakwayam yának kólpasmok, wánxa aksa apwaya yakwayam epasmok énxet, tén han ényók apyennakte yakwayam exámhok énxet apkelwagkaso teyp.

Jesús apkeltakmelcheseyam apkánet énxet meyke apakta'ák

²⁹ Xama axta aptepa Jesús yetlo apkeltámeséyak tegma apwányam Jericó, apxámok axta énxet apyetlákxo.

³⁰ Xama axta apkelleg'a amya'a apyeykhágwokmo Jesús aphágkaxa apkánet énxet meyke apakta'ák, aptahak axta apkelyennaktésawo apkelpeywa s'e: —¡Wese', David Apketche, yepyósho henlanok negko'o!

³¹ Apnókáseyha axta eyke énxet apkeltamho elwanmeyekxa', wánxa agkok, apyanchesekmok axta eyke apteme apkelpeywa s'e: —¡Wese' David Apketche, yepyósho henlanok negko'o!

³² Apkenegwokmek axta Jesús, apkelwóneyha axta m'a énxet meyke apakta'ák nak. Aptahak axta apkelmaxneyeyncha'a s'e: —¿Yaksak kélámenyého atnésesek kéxegke?

³³ Aptahak axta apkelátegmowágko énxet'ák meyke apakta'ák se'e: —Egmenyék negko'o agwetekxaxma.

³⁴ Apyósekak axta apkelano Jesús, appaknegkesakmok axta apakta'ák. Yetlókók axta apkelweteykekxaxma énxet meyke apakta'ák, apkelyetlákxeyk axta anhan Jesús.