SAN MATEO 17 - Lengua Sur (Enxet) Nuevo Testamento

Jesús elyenmeykekxa apyókxa

¹ Seis ekhem axta entahak ekyeykhe, keñe axta apnaklawa Jesús mók nekha Pedro, Santiago, axta nahan ma'a Juan, aptaha axta Santiago apyáxeg, axta apkelchenátchesakmok ma'a egkexe netno' axta.

² Nápakta'awo' axta yakmagkásak aptémakxa Jesús xa apkeltámeséyak nak, kelyenmeyk axta nápát ektémol'a ekhem, apkelmopé axta aptamhákxak apkelnakta ektémol'a chálewaso.

³ Apkelwet'ak axta anhan Moisés tén han Elías apkelpakhetchásekpoho Jesús xa apkeltámeséyak nak.

⁴ Aptahak axta Pedro apcháneya Jesús se'e: —Wese', ektakmelakxoho agko' nelwa'a negko'o xa s'e. Alának sat ko'o apkántanxo tegma apketkók apkeltamho enxoho exchep: xama sat xép, xama sat nahan Moisés, xama sat nahan Elías.

⁵ Neyseksa appakmeyesma axta Pedro eyahapwa'a xama yaphopé elyenma xa énxet'ák nak. Keñe axta ektepa kélpeywa neyseksa xa yaphopé nak. Entahak axta kélpeywa s'e: “Keso hatte seyásekhayo nak ko'o s'e, selyéseykha ahagko' axta anhan: kóleyxho appeywa.”,

⁶ Xama axta apkelleg'a Jesús apkeltámeséyak xa, apkelpólenteyk axta náxop ekwokmoho apkeltekxeyágko nápakta'a xóp, awanhek axta anhan apkelaye.

⁷ Apya'aweykxeyk axta Jesús xa apkeltámeséyak nak, keñe axta apsawhawo apkelpaknamágko. Aptahak axta apkeláneya s'e: —Kólchaknaha, nágkólé'.

⁸ Xama axta apkelanawo apkeltámeséyak, apxakko' axta aksa apwet'ak Jesús, massék axta apkelwet'a apkelxegexma'a.

⁹ Apmések axta appeywa Jesús apkeltámeséyak neyseksa apkelánteyapma axta néten egkexe. Aptahak axta apkeláneya s'e: —Nágkóltennaha aksa ektahakxa nak kélweté aksok kélxekmósamo, ekwokmoho apxátekhágwokmo m'a ektaha nak Apketche énxet.

¹⁰ Aptahak axta apkelmaxneyeyncha'a apkeltámeséyak Jesús se'e: —¿Yaksaktéma apkelxeyenma nak cha'a énxet'ák apkelxekmósamo nak ektémakxa segánamakxa apxénamakpo ewak apmonye Elías?

¹¹ Aptahak axta apchátegmowágko Jesús se'e: —Nakso' apxénamakpo Elías ewak apmonye, yakwayam elánekxak ekyókxoho aksok.

¹² Wánxa agkok eltennásek eyke ko'o kéxegke apwaya Elías, akke elyekpelchék ma'a énxet'ák nak, aptemésesek axta aksa m'a apmokókxa axta etnésesek. Sat nahan etnahagkok eñásesagkohok ektaha nak Apketche énxet xa énxet'ák nak.

¹³ Keñe axta apkelya'ásegwokmo apkeltámeséyak apxéna Jesús ma'a Juan el Bautista.

Jesús aptakmelcheseyam wokma'ák kelyekhama' ektawáseykha

¹⁴ Xama axta apkelwákxo m'a apchaknágkaxa axta énxet'ák, apyo'ókmek axta xama énxet Jesús, apkeltekxekwokmek axta anhan aptapnák apkenmágkaxa Jesús. Aptahak axta apcháneya s'e:

¹⁵ —Wese', yepyósho elanok hatte, hakte yetsepekxohok cha'a, sagkók agko' nahan katnehek aplegeykegkoho; nátex cha'a étnók apyaknena enxoho, tén han ma'a neygmen.

¹⁶ Ekyentegkesakmek xeyk eykhe anhan apkeltámeséyak, mopwanchek xeyk eyke aptakmelchesekmo.

¹⁷ Aptahak axta apchátegmowágko Jesús se'e: —¡Enxet apkelya'áseyam kéxegke, kélxegányam nahan! ¿Háxko ekwánxa ekhem kammohok sekha ko'o kélnepyeseksa kéxegke? ¿Háxko sat ekwánxa ekhem kammohok selenmáxamáxkoho kéxegke? Kólyentementa wokma'ák se'e.

¹⁸ Appakhetchesek axta Jesús kelyekhama', aptekkesek axta anhan wokma'ák apwáxok, yetlókók axta anhan aptakmelwayam.

¹⁹ Keñe axta appakhetchesekmo apkeltámeséyak Jesús mók nekha. Aptahak axta apkelmaxneyeyncha'a s'e: —¿Yaksak ektaha magkegwagko nak negko'o nentekkesa xa kelyekhama' nak?

²⁰ Aptahak axta apkeláneya Jesús se'e: —Asextók eyke megkólya'áseyam kéxegke. Yetneyk agkok megkólya'áseyam, kaxhok eykhe megkólya'áseyam ma'a ekwánxal'a aktek yámet ekweseyl'a mostaza, kóltehek kólának egkexe s'e: ‘Kapatyep xa, katnegwom mók nekha’, kapatyapok nahan xa egkexe nak. Megkólapagkanaxchék nahan kéxegke. Nakso' xa sektahakxa nak seláneya.

²¹ Wánxa agkok, yetlo nempeywa nelmaxnagko akke awanchek katyapok xa kelyekhama' ektéma nak, tén han yetlo m'a manto nak nento olpeykeshok Dios.

Jesús apxéneykekxoho makham yakwayam yetsapok

²² Neyseksa apkelxega yókxexma Galilea axta aptahak apkeláneya Jesús apkeltámeséyak se'e: —Kólának sat emok énxet'ák ma'a ektaha nak Apketche énxet,

²³ yakhek sat nahan; wánxa agkok antanxo ekhem sat eyke exátekhágwók. Kellapwagkásegkek axta apkeltámeséyak xa amya'a nak.

Tegma appagkanamap kélanchesáseykekxa selyakye

²⁴ Xama axta apwokmo Jesús yetlo apkeltámeséyak tegma apwányam Capernaum, apteyánegwokmok axta Pedro m'a énxet'ák ektaha axta apchanchesáseykekxa selyakye tegma appagkanamap. Entahak axta amya'a kélmaxneyeyncha'a Pedro s'e: —¿Epekkenhoya cha'a selyakye yakwayam egkések tegma appagkanamap apkelxekmóso nak kéxegke?

²⁵ —Ehay, epekkenhok cha'a —axta aptahak apchátegmowágko Pedro. Xama axta aptaxna Pedro kañe' tegma, Jesús axta appakmétak apmonye. Aptahak axta apcháneya s'e: —¿Háxko ektahakxa elchetamso apwáxok xép Simón? ¿Yaksak énxet apméso cha'a selyakye yakwayam elmaha m'a kelwese'e nak keso náxop? ¿Apkelenyémeyo xamo', enxeykel'a m'a pók énxet'ák nak.

²⁶ —Pók énxet'ák cha'a apkelméso selyakye, —axta aptahak Pedro. Keñe axta anhan aptaha appeywa Jesús se'e: —Meyánmagkasek neyke m'a énxet'ák ektaha nak apheykegkaxa apancha'awo'.

²⁷ Emhok sekxo' ekpayhegwayam nak wátsam ekwányam, ényaw sat sókhaxé neygmen, eltegkes sat ma'a ektaswé amonye enxoho kelasma. Xama sawo selyakye sat étak kañe' awáxok. Kaxhok sat yakwayam agmések selyakye m'a tegma appagkanamap, xép tén han ko'o, yakwayam enxoho móllókasek énxet'ák. Esakxés sat, eyánmagkas sat nahan.