SAN MATEO 15 - Lengua Sur (Enxet) Nuevo Testamento

Aksok ekteméseso nak ekmanyása aptémakxa énxet nápakto' Dios

¹ Apyo'ókmek axta Jesús nápakha énxet'ák fariseos tén han ma'a énxet apkelxekmóso axta ektémakxa segánamakxa, apkelwokmo axta apkeleñama m'a Jerusalén. Aptahak axta apkelmaxneyeyncha'a s'e:

² —¿Yaksak ektaha metnaha nak apkeltámeséyak ma'a apkeltémakxa axta ẽlyepmeyk nano'? ¿Yaksak ektaha melyenyesa nak apmék amonye aptéyak ekhawo m'a nentémakxal'a?

³ Aptahak axta apkelmaxneyeyncha'a Jesús se'e: —¿Yaksak ektaha megkólyahákxoho nak han kéxegkáxa apkeltémókxa nak antehek Dios, kélmokók aksa kólyetlákxak ma'a kéltémakxa kélagko' nak?

⁴ Hakte temék appeywa Dios se'e: ‘Kólteme kéláyo kélyepmeyk tén han ma'a kélchána,’ apxeyenmék nahan ‘Kéxegke ektahakxa enxoho kéltémo kasók ektahakxa kélyepmeyk esenhan ma'a kélchána, kólának sat kólmatñekxa'.’

⁵ Kélxénchek cha'a kéxegke apkepwagko etnehek yának apyap énxet se'e, esenhan ma'a egken: ‘Mowanchek ko'o apasmok, hakte ekyókxoho aksok ahagkok ko'o elmeyásak ma'a Dios’;

⁶ kélxénchek nahan kéxegke ektahakxa enxoho ekteme ekpeywa xa, megkeyméxko epasmok apyepmeyk esenhan ma'a enchána. Kéltemék agkok xa, kéltemésesek kéxegke mékoho m'a apkeltémókxa nak antehek Dios, keñe kélyetlákxo m'a kéltémakxa kélagko' nak.

⁷ ¡Kéxegke kélmeyókásamáxkoho nak kéltémakxa! Apchakhásesamók kéltémakxa kéxegke Isaías aptaha axta Dios appeywa aplegaso, aptéma axta appeywa s'e:

⁸ ‘Appeywa aksa heyawho ko'o xa énxet'ák nak, keñe m'a apwáxók nak megkaxegkáseykencha'a heyawhok ko'o

⁹ Chakhémók selpeykesamo ko'o xa énxet'ák nak; hakte énxet apkeltémókxa antehek ma'a ektémakxa nak apkelxekmóso.’

¹⁰ Apkeltamhok axta elakxegegmohok énxet Jesús. Aptahak axta apkeláneya s'e: —Kóleyxho, kólya'asagkoho nahan:

¹¹ Háwe ekteméseso ekmanyása apwáxok énxet nápakto' Dios ma'a aksok ektaxnamol'a apátog, akke ekteméseso ekmanyása apwáxok énxet nápakto' Dios ma'a ekteyapmol'a eñama apátog.

¹² Keñe axta apya'aweykxo apkeltámeséyak Jesús. Aptahak axta apcháneya s'e: —Apkelnatha'awók énxet'ák fariseos apkelleg'a xa aptahakxa nak appeywa exchep.

¹³ Aptahak axta apchátegmowágko Jesús se'e: —Ekyókxoho yámet megkatnaha nak apkeneykekxa m'a Táta apha nak néten, kólpátekkesek sat.

¹⁴ Kólho aksa, énxet'ák meyke apakta'ák xa, cháxa appeykesáseykegkohol'a apxega pók meyke apakta'ák xa. Appeykesásegkek agkok apxega pók énxet meyke apakta'ák ma'a aptémo xamo' nak meyke apakta'ák, apkánet epalegmak kañe' máxek.

¹⁵ Aptahak axta Pedro apcháneya Jesús se'e: —Hempeykesásekxa negko'o xa aptahakxa nak sẽltennaso.

¹⁶ Aptahak axta apchátegmowágko Jesús se'e: —¿Yagkólya'ásegkok nahan kéxegkáxa xa?

¹⁷ ¿Yagkólya'ásegkok kéxegke ekhagweykmoho egwokmo' ekyókxoho aksok elántaxnamol'a egátog, keñe katyepekxak makham?

¹⁸ Elchetamso apwáxok keñamak énxet ma'a ekteyapweyktamhol'a apátog; cháxa ektemésesamol'a ekmanyása apwáxok énxet nápakto' Dios xa.

¹⁹ Hakte apwáxok cha'a kañék ekteyapma énxet ma'a ekmaso elchetamso apwáxok nak, cham'a kélakhe kélmók nak, tén han ma'a kéltawáseykha elyamhápeyak nak, tén han ma'a megkólmasexta nak, tén han ma'a kélmenyexma nak, tén han ma'a kélmowána amya'a nak, tén han ma'a kéltekkesáseykha nak apwesey ekmaso kélmók.

²⁰ Cháxa ektemésesamol'a ekmanyása apwáxok énxet nápakto' Dios xa; wánxa agkok, háwe eyke ekteméseso ekmanyása apwáxok énxet nápakto' Dios ma'a mólyenyeso nak egmék amonye nento nento.

Kelán'a megkatnaha judía megkay'áseyam Jesús

²¹ Apxegkek axta Jesús apkeñama m'a, axta apmahágkok ma'a yókxexma Tiro tén han ma'a Sidón.

²² Yo'ókmek axta Jesús xama kelán'a eñama Canaan ekha axta xa yókxexma nak, entahak axta ekyennaktésawo ekpeywa s'e: —¡Wese', David Apketche, yepyósho helanok ko'o! ¡tawáseykha ko'o kelyekhama' hatte, legasáseykegkok nahan!

²³ Axta yátegmowagkok Jesús. Keñe axta apyepetchegwákxoho apkeltámeséyak, aptahak axta apcháneya s'e: —Yának katakhohok xa kelán'a nak, kelpáxamokmek nentámen.

²⁴ Aptahak axta Jesús se'e: —Eyáphásek axta ko'o Dios nepyeseksa énxet'ák Israel aptaha nak nekkések apkelxegányam.

²⁵ Wánxa agkok, keltekxekwokmek axta atapnák kelán'a apmonye Jesús. Entahak axta eyáneya s'e: —¡Wese', hepásem ko'o!

²⁶ Aptahak axta apchátegmowágko Jesús se'e: —Megkapayhawok kólyementók pan ma'a ektaha nak kélketchek, keñe kólmések semheg.

²⁷ Entahak axta eyátegmowágko kelán'a s'e: —Wese', nakso' xa, wánxa agkok kawomhok eyke ekto semheg ma'a nento ekpalleykha nak kóneg mésa apagkok ma'a ótep.

²⁸ Aptahak axta apcháneya Jesús se'e; —Kelán'a, awanhek megkay'áseyam, katnehek sat ma'a eyámenyéxa nak katnehek. Yetlókók axta anhan ektakmelwayam étche kelwána xa kelán'a nak.

Jesús apkeltakmelcheseyam apxámokma apkelháxamap

²⁹ Apxegákxeyk axta makham Jesús apkeñama m'a, apwákxeyk axta neyáwa wátsam ekpayhegwayam kéltéma nak Galilea; apkenátwokmek axta xama egkexe, aphakmek axta néten.

³⁰ Apxámok axta énxet apkelwokmo m'a aphakxa axta Jesús. Apnaklókok axta anhan énxet meyke aptapnák, tén han ma'a meyke apakta'ák nak, tén han ma'a elyakseykekxa apmék nak, tén han ma'a meyke appeywa nak, tén han ma'a ekyókxoho ektémakxa nak apkelháxamap, kélnegkenwokmek axta apkenmágkaxa Jesús, keñe axta apkeltakmelchesekmo.

³¹ Pelakkásók agko' axta apkelwet'a énxet'ák ektepékxo apkelpeywa m'a énxet meyke apkelpeywa nak, tén han apkeltakmelákxo m'a énxet'ák elyakseykekxa axta apmék, tén han apkelxegákxo m'a énxet'ák meyke aptapnák axta, tén han apkepwagko elyaheykha m'a énxet'ák meyke apakta'ák axta. Apkeltemésesek axta apcheymákpoho Israel Dios apagkok xa énxet'ák nak.

Jesús apkelmeyáseyak aptéyak cuatro mil énxet

³² Apkelwóneyha axta Jesús apkeltámeséyak, aptahak axta apkeláneya s'e: —Apyósekak ko'o sélano xa énxet'ák nak, hakte antanxo ekhem wokmok apheykha s'e sekhakxa nak, méko nahan aptéyak. Momenyék ko'o aláphaksek apxanák yetlo metéyak aptéyak, hakte káhapwakxak katnehek xama náxet ámay.

³³ Aptahak axta apkelátegmowágko apkeltámeséyak se'e: —¿Háxko agwetágwók nento yakwayam ólagkok xa énxet'ák nak, hakte méko énxet se'e yókxexma nak?

³⁴ Aptahak axta apkelmaxneyeyncha'a Jesús se'e: —¿Háxko apwánxa pan apyetna kéxegke? —Siete apyetnak negko'o pan, tén han antawók kelasma etkók —axta aptahak apkelátegmowágko xa énxet'ák nak.

³⁵ Keñe axta apkeltamho exmakha náxop Jesús xa énxet'ák nak,

³⁶ apkelmeyk axta xa siete pan nak, tén han ma'a kelasma. Natámen apméso ekxeyenma apwáxok Dios axta apkelyepta xa pan nak, apkelmeyásegkek axta anhan apkeltámeséyak, keñe axta apkeltámeséyak apkelmeyásegko xa énxet'ák nak.

³⁷ Apyókxoho axta aptókagkok ekwokmoho apkelyakkanakmo, siete axta anhan wokmok kélxatméyak kélxata pan nápakha'a apkeleymomap.

³⁸ Cuatro mil axta apyókxoho énxet'ák ektaha axta aptéyak xa, meyke kélyetseté kelán'ák, tén han ma'a sakcha'a létkók.

³⁹ Keñe axta apkeltamho Jesús eltakhekxak apxanák xa énxet'ák nak, apchánteyk axta yántakpayhe, keñe axta apmeyákxo m'a yókxexma Magadán.