SAN MATEO 12 - Lengua Sur (Enxet) Nuevo Testamento

Jesús apkeltámeséyak apnakxo hótahap apyexna ekhem apkellókasamakxa apkelyampé énxet'ák judíos

¹ Apweynchámeyha axta Jesús neyseksa aksok kélcheneykekxa, cham'a ekhem sábado apkellókasamakxa axta apkelyampé énxet'ák judíos. Meyk axta kelnápak apkeltámeséyak, apnakxégkek axta hótahap apyexna, keñe axta aptókagko m'a apaktek.

² Apwet'ak axta énxet'ák fariseos xa, keñe axta aptaha apcháneya Jesús se'e: —Elano, xama aksok apkelánegkok apkeltámeséyak megkólhayo nak anlának ekhem sábado nellókasamakxa nak nelyampé.

³ Aptahak axta apchátegmowágko Jesús se'e: —¿Yagkólyetseteyk kéxegke weykcha'áhak aptémakxa axta David, cham'a eyakhama axta meyk yetlo apkelxegexma'a?

⁴ Aptaxnegwokmek axta Dios tegma appagkanamap apagkok, aptókagkek axta anhan ma'a pan kélpagkancheso axta Dios, cham'a megkólhayók axta etwok David tén han ma'a apkelxegexma'a, wánxa aksa etwok ma'a énxet'ák appasmo nak apkelmaxnéseso Dios énxet'ák apagkok.

⁵ ¿Yagkólyetseteyk nahan Moisés segánamakxa apagkok ekxeyenma nak meláneykegkok melya'asáxma énxet'ák appasmo nak apkelmaxnéseso Dios énxet'ák apagkok, mellókasemek eykhe apkelyampé ekhem sábado nellókasamakxa nak nelyampé?

⁶ Eltennásek eyke ko'o ekyetna xama aksok ektakmela agko' se'e mexnawok ma'a tegma appagkanamap nak.

⁷ Megkólya'ásegkok kéxegke ektémakxa nak ekxeyenma eknaktáxésamaxche s'e: ‘Wánxa aksa ko'o seyámenyého kóltehek kéxegke ekha apmopyósa kóllanok kélmók, keñe maltamho helmések ma'a aksok ektekyawa nak.’ Kaxtemek xeyk kélya'áseyak, megkólsexnenayhek xeyk énxet'ák meláneykegko nak xama aksok ekmaso.

⁸ Yetneyk apmopwána elának aksok ekhem nellókasamakxa nelyampé m'a aptaha nak Apketche énxet.

Jesús aptakmelcheseyam xama énxet ekyame apmek ekhem apkellókasamakxa apkelyampé énxet'ák judíos

⁹ Apxegkek axta Jesús apkeñama m'a, aptaxnegwokmek axta tegma apchakneykekxexa axta énxet'ák judíos.

¹⁰ Apheyk axta xama énxet ekyame apmek ma'a; apkeltamhok axta eykhe énxet'ák etegyaha aptemésesakxa yakwayam esexnenak Jesús. Aptahak axta apkelmaxneyeyncha'a s'e: —¿Megkamyawaxcheya kóltakmelchesók xama énxet apháxamap ekhem sábado?

¹¹ Aptahak axta Jesús apchátegmowágko s'e: —¿Yaksak kélxama kéxegke apyetna kéltóso nekkések, apteyekmek agkok kañe' máxek ekhem nellókasamakxa nelyampé megkólya'ameya yakwayam kóllekwók?

¹² ¡Apmomnáwa apagko' énxet mexnawok nekkések! Ekeso eñamakxa negkegwagko nak anlának aksok ektakmela ekhem nellókasamakxa nelyampé.

¹³ Keñe axta aptaha apcháneya Jesús énxet ekyame apmek se'e: —Epékes apaktog. Appékesek axta apaktog xa énxet nak, takmelwokmok agko' axta anhan, hágweykxók axta m'a mók.

¹⁴ Xama axta apkelántepa énxet'ák fariseos, apkeláneykxek axta apkelpakmeyesma yakwayam yakhek Jesús.

Temegkek axta m'a ektémakxa axta apxénamap Jesús eknaktáxésamaxche

¹⁵ Xama axta apleg'a amya'a Jesús, keñe axta apxega. Apxámok axta énxet apyetlo, apkeltakmelcheseykmek axta Jesús apyókxoho apkelháxamap,

¹⁶ apkeltamhok axta anhan Jesús megkóltekkesesha apwesey nepyeseksa énxet.

¹⁷ Cháxa ektahakxa axta ektaha m'a apkeltenneykencha'a axta Isaías, aptaha axta Dios appeywa aplegaso, aptéma axta apkeltenneykencha'a s'e:

¹⁸ “Keso seyásenneykha ko'o s'e, ko'o axta selyéseykha, aptaha nak han seyásekhayo, leklamok nahan ewáxok aptémakxa. Agkések sat nahan ko'o Espíritu ahagkok, eltennasha sat nahan apyókxoho énxet'ák ma'a ekxeyenma nak ko'o ewáxok ektaha ekpéwomo.

¹⁹ Mepakmésmakha sat, melpáxamha sat nahan, megkañexchek sat nahan appeywa m'a ámay nepyeseksa tegma apwányam.

²⁰ Megyentaksek sat ma'a yamámok ektakhé nak, mespanchesek sat nahan ma'a chálewaso yátépépe agkok ketse' ekpánma nak. Elenxanmohok sat ekwokmoho apkelyahákxoho énxet'ák ma'a apkeltémókxa nak antehek Dios.

²¹ Apxámokxoho énxet'ák sat etnahagkok melya'áseyam ma'a.”

Jesús apxénamap eñama ekméso apmopwána kelyekhama'

²² Kélyentegkek axta aphakxa Jesús xama énxet meyke apakta'ák tén han meyke appeywa, kelyekhama' ektawáseykha axta m'a. Apwetáseykxeyk axta exma Jesús tén han aptekkesásekxo appeywa.

²³ Aptahak axta cha'a apkelmaxneyeyncha'a pók apyókxoho énxet'ák ekpelakkasa apkelwet'a s'e: “¿David apketche enxeykel'a xa?”

²⁴ Xama axta apkelleg'a énxet'ák fariseos xa, aptahak axta apkelpakmeta s'e: “Kelyekhama' wese' agkok ekwesey Beelzebú nak ekméso apmopwána yakwayam elántekkesek kelyekhama' xa.”

²⁵ Apya'ásegkok axta Jesús ektahakxa elchetamso apwáxók xa énxet'ák nak. Aptahak axta apkeláneya s'e: “Apkexpancháseykpek agkok énxet'ák xama apkelókxa keñe etnehek apkelenmexamap, apnaktawásamap apancha'awók etnahagkok. Apkexpancháseykpek agkok nahan énxet'ák apheykha tegma apwányam, esenhan apheykha nak xama tegma, megkawegkók apheykha.

²⁶ Hawók nahan ektémakxa m'a Satanás, tekkesek agkok mók kelyekhama' xamo' nak, elexpanchásamáxche agko' katnehek, kamassegwók ma'a ektémakxa nak ekmowána.

²⁷ Kélxénchek kéxegke selántekkesa ko'o kelyekhama' eñama ekmowána m'a Beelzebú, nakso' agkok ektéma xa, ¿yaksak ekméso apmopwancha'a elántekkesek kelyekhama' m'a apkelyetleykekxa nak kéltémakxa kéxegke? Cháxa keñamak ekwetáxko ekyetna megkólakhémo kéxegke xa.

²⁸ Elántekkesek agkok ko'o kelyekhama' eñama apmopwána m'a Dios Espíritu apagkok, cháxa magkenatcheso ekwa'a kélnepyeseksa kéxegke m'a aptémakxa nak Wese' apwányam Dios.

²⁹ “¿Háxko katnehek etaxnegwók énxet kañe' apxagkok ma'a énxet ekha nak apyennakte, tén han elyementók ma'a aksok apagkok, cham'a melpexteta enxoho sekxo'. Wánxa aksa yepwának elyementók aksok apagkok ma'a apkelpexteta enxoho.

³⁰ “Enxet aptaha nak mehepasmo ko'o, apteme senmexeykha; énxet mehewháneyo nak seyancháseykekxa ko'o, yexpánchesek.

³¹ “Ekeso eñamakxa seltennasa nak kéxegke peya meyakmagkásekxék Dios ekyókxoho ektémakxa nak melya'asáxma énxet'ák, tén han ma'a ekyókxoho ektémakxa nak cha'a apkelpakméteykha ekmaso, wánxa agkok, eyakmagkásekxak sat eyke Dios ektahakxa enxoho ekxeyenma ekmaso Espíritu Santo.

³² Kawomhok sat nahan meyakmagkáseykekxa Dios aptémakxa m'a énxet apxeyenma ekmaso nak ma'a aptaha nak Apketche énxet; wánxa agkok eyakmagkásekxak sat eyke Dios aptémakxa m'a énxet apxeyenma nak ekmaso Espíritu Santo neyseksók apha keso náxop, tén han ma'a egmonye sat.

Ekyexna keñamak kélyekpelchémo yámet

³³ “Tásek agkok yámet, tásek katnehek ma'a ekyexna; asagkók agkok yámet, asagkek katnehek ma'a ekyexna; ekyexna cha'a kañék kélyekpelchémo yámet.

³⁴ ¡Kélhawók kéxegke yéwa! ¿Háxko katnehek kólxének aksok ektakmela eyesagko enxoho kéltémakxa kéxegke? Ekyókxoho ektémakxa nak elchetamso apwáxok énxet katyapwakxak ma'a apátog.

³⁵ Aksok ektakmela cha'a exének ma'a énxet ektakmela nak aptémakxa, hakte keytek aksok ektakmela m'a apwáxok, keñe m'a énxet ekmaso nak aptémakxa, aksok ekmaso cha'a exének, hakte keytek aksok ekmaso m'a apwáxok.

³⁶ Eltennásek ko'o kéxegke peya kólxénekxohok ektémakxa kélpeywa naksa m'a ekhem nelyekpelchamáxchexa sat.

³⁷ Kélpeywa kélagko' sat kañék kélyekpelchamáxkoho kéxegke, meyke kéltémakxa sat kexaha, kélsexnánémaxche esenhan.”

Enxet'ák elmasagcha'a apkeltémakxa apkeltémo étak aksok sempelakkaso nak agweta'

³⁸ Nápakha énxet'ák fariseos axta apkelpakmétak, tén han ma'a apkelxekmóso nak Dios énxet'ák apagkok ektémakxa segánamakxa, aptahak axta apcháneya Jesús se'e: —Sẽlxekmóso, egmenyék negko'o agwetak elának xép aksok sempelakkaso nak agweta'.

³⁹ Aptahak axta apchátegmowágko Jesús se'e: —Apkeltamhok étak aksok sempelakkaso agweta' se'e énxet'ák elmasagcha'a nak apkeltémakxa, apyenseyam nak han apkelyetlo Dios. Wánxa sat kólxekmósek kéxegke aksok sempelakkaso agweta' ma'a ektémakxa axta Jonás aptaha axta Dios appeywa aplegaso.

⁴⁰ Kaxhok sat ma'a ektémakxa axta Jonás apha antanxo ekhem tén han antanxo axta'a kañe' kelasma ekyawe awáxok, sat nahan katnehek ma'a aptaha nak Apketche énxet, antanxo ekhem, antanxo axta'a, sat katnehek apyetno kañe' xóp.

⁴¹ Yaknaha sat ma'a énxet'ák apheykencha'a axta tegma apwányam Nínive, cham'a ekhem nelyekpelchamáxchexa sat, cham'a kéltaha sat nahan kélyekpelchémo énxet'ák apheykencha'a nak se'e kaxwo' nak, elsexnenak sat énxet'ák hakte apkelyakmagkasegkek axta apwáxók ma'a énxet'ák apheykencha'a axta Nínive, cham'a apkelleg'a axta apkeltenneykha Jonás; akke exnawok Jonás aksok ekyetna nak se'e.

⁴² Katnamha sat nahan wese' ekwányam eñama nak Nepyeyam cham'a ekhem nelyekpelchamáxchexa sat, cham'a kéltaha sat nahan kélyekpelchémo énxet'ák apheykencha'a nak se'e kaxwo' nak, kalsexnenak sat énxet'ák, hakte tayépok agko' axta eñamakxa eltamho keyxhok ektémakxa apya'áseykegkoho Salomón ma'a, akke exnawok Salomón aksok ekyetna nak se'e.

Espíritu ekmaso ektakhémo

⁴³ “Tekkek agkok xama kelyekhama' énxet apwáxok, kamhagkok ma'a yókxexma ekyamakakxa nak exma meykexa yegmen, yakwayam enxoho kategyaha ellókasamakxa ekyampé; agkok nahan kót'ak, keñe katnehek elchetamso awáxok se'e:

⁴⁴ ‘Atakhohok sat ma'a exagkok, cham'a sektepakxa axta.’ Takháwok agkok, keñe kóteyágwakxak énxet apwáxok ektémol'a tegma meyke ekha kañe', kéláxñeso, tén han kéltakmelcháseykekxoho kañe'.

⁴⁵ Keñe kaxog, kánchesekxak ma'a siete kelyekhama' elmasagcha'a agko' nak, megkaxnawo xa mók nak, kasawhaxkohok nahan kalántaxnegwók xa énxet apwáxok nak, keñe kayeykhágwomhok agko' ektahakxa xa énxet nak, megkaxók ma'a ektémakxa axta sekxo'. Sat nahan katnehek xa énxet'ák elmasagcha'a nak apkeltémakxa keso negwánxa nak.”

Egken, tén han Jesús apkelyáxeg

⁴⁶ Apkeltennáha axta makham Jesús nepyeseksa énxet'ák, cham'a ekyo'ókmo axta egken, tén han ma'a apkelyáxeg, mokók axta kapakhetchesek. Yókxexma axta chaknáha,

⁴⁷ kéltennásekxek axta Jesús. Entahak axta amya'a apcháneyákpo s'e: —Yókxexma exchek kenmáha egken tén han apkelyáxeg, xép xeyk kélmokók kólpakhetchesek.

⁴⁸ Aptahak axta apchátegmowágko Jesús ma'a ektaha axta apkeltennáseykekxa: —¿Yaksak ko'o méme, yaksak nahan ma'a elyáxeg?

⁴⁹ Appenteyhagkok axta Jesús apkeltámeséyak, aptahak axta s'e: —Keso ko'o méme s'e, tén han elyáxeg.

⁵⁰ Enxet ektahakxa enxoho apkelané m'a apmopmenyého nak Táta apha nak néten, cha'a aptaha eyáxeg ko'o m'a, tén han elyáxeg kelwán'ák, tén han méme ahagkok ko'o m'a.