SAN MATEO 10 - Lengua Sur (Enxet) Nuevo Testamento

Jesús apkelyéseykha doce seykha amya'a

¹ Apkelwóneyha axta Jesús doce seykha amya'a apagkok, apmések axta nahan apkelmopwancha'a yakwayam elántekkesek kelyekhama', tén han emaseksek ma'a ekyókxoho ektémakxa nak negháxamáxche, tén han ma'a ektémakxa nak nenlegeykegkoho ekmáske.

² Keso apkelwesey axta doce seykha amya'a s'e: Simón axta sekxo', apkeltamhomakpo axta nahan Pedro, keñe axta anhan ma'a apyáxeg apwesey axta Andrés; Santiago axta anhan ma'a yetlo apyáxeg apwesey axta Juan, aptaha axta Zebedeo apketchek;

³ Felipe axta anhan ma'a, Bartolomé axta anhan; Tomás axta anhan ma'a, Mateo axta anhan, cham'a apkelmomo axta cha'a selyakye yakwayam kólmések wese' Roma; Santiago axta anhan ma'a aptaha axta Alfeo apketche, Tadeo axta anhan;

⁴ Simón axta anhan ma'a apkeltamhomakpo axta celote, Judas Iscariote axta anhan ma'a, cham'a appelakkasesa axta apkeltamho emakpok Jesús.

Jesús apkeláphaso apkeltámeséyak yakwayam eltennaha aptémakxa nak Wese' apwányam Dios

⁵ Apkeláphásek axta Jesús xa doce apkeltámeséyak nak yetlo apméso appeywa ektéma nak se'e: “Nágkólmohok sekxo' yókxexma apheykegkaxa nak énxet'ák metnaha nak judíos, nágkólántaxnegwom nahan nepyeseksa tegma apwányam yókxexma Samaria;

⁶ akke tásek sekxo' kólya'ammok ma'a énxet'ák Israel, aptaha nak máxa nekkések apkelxegányam.

⁷ Kólxeg, kóllegés nahan eyágketwa'a m'a aptémakxa nak Wese' apwányam Dios.

⁸ Kóltakmelchesem énxet apkelháxamap nak, kólnakxátekhásem nahan ma'a apkeletsapma nak, kóltakmelchesem nahan ma'a ektamhéyak nak negmasé ektepelchamáxchel'a egyempehek, kólántekkes nahan kelyekhama' énxet apwáxok. Meyke ekyanmaga kélxawágkok kéxegke xa kélmowána nak, nágkólma nahan ekyanmaga eñama kéllané xa.

⁹ “Nágkólsaw nahan selyakye, nágkólma nahan ekyanmaga kéltamheykha,

¹⁰ nágkólsaw nahan nahápa kélxata aksok ma'a ámay, nágkólsaw nahan kélántaxno yakwayam kólyakmagkasek pók kéltaxno, nágkólsaw nahan kéltéto kélmagkok, nágkólsaw nahan ma'a kéltaskapeykha. Hakte énxet ektaha nak aptamheykha payhawók exkak apto.

¹¹ “Kélwokmek agkok xama tegma apwányam, esenhan ma'a nátegma apheykegkaxa enxoho énxet, kólchetam sat sekxo' ma'a énxet kéláyo nak, kólhakha sat apxagkok ekwokmoho kélxegákxo makham ma'a.

¹² Kélántaxnegwokmek sat agkok cha'a tegma, kólpeykes sat ektaha apheykha m'a kélántaxnegwánxa enxoho.

¹³ Enxet'ák eyéméxchexa enxoho keytek meyke ektahakxa egwáxok apxanák, katnehek sat ma'a, keñe m'a megkapayhawo nak keytek meyke ektahakxa egwáxok apxanák, megkeytek sat meyke ektahakxa egwáxok ma'a.

¹⁴ Sat agkok emak takha' kéxegke énxet kélwayam apxagkok, tén han ma'a memoko enxoho yeyxhok kéltenneykha, kólántep sat ma'a tegma nak, esenhan ma'a nepyeseksa tegma apwányam nak, kólpalches sat nahan kélmagkok xóp ánek elyepetche.

¹⁵ Sagkók agko' sat katnehek kéllegasáseykegkoho énxet'ák apheykha xa tegma apwányam nak, cham'a ekhem nelyekpelchamáxchexa sat, megkaxók sat ma'a ekwánxa axta kéllegasáseykegkoho énxet'ák apheykha axta yókxexma Sodoma, tén han ma'a Gomorra.,

Sẽlmenxeneykha

¹⁶ “¡Kóllano, máxa ektemesásak kéxegke nekkések seláphasa neyseksa m'a aksok nawha'ák ello nak, kólteme ekha kélya'áseykegkoho ektémol'a yéwa, kólteme anhan megkólyementé aptémol'a wáx'ay.

¹⁷ Katneykha sat kélwáxok, hakte kólnaklók sat kéxegke aphágkaxa m'a kélwese'e ekha nak kélyaheykekxoho, kóltekyawha sat nahan ma'a kañe' tegma apchakneykekxexa nak énxet'ák judíos,

¹⁸ kawomhok sat nahan kélnaklo kéxegke nápakta'awo' ma'a kelwese'e nak yókxexma tén han nápakta'awo' ma'a kelwese'e apkelwányam nak, ko'o eñamakxa; keñe sat kólxének kéxegke amya'a ektakmela ekxeyenma nak ma'a aptémakxa nak Wese' apwányam Dios nápakta'awo' xa énxet'ák nak, tén han nápakta'awo' ma'a énxet'ák melya'áseyak nak Dios.

¹⁹ Kélnaklókek sat agkok kéxegke aphágkaxa m'a kelwese'e ekha nak kélyaheykekxoho, nágkatneykha aksa kélwáxok yakwánxa enxoho kóltehek kélpeywa, esenhan ma'a ektémakxa enxoho yakwayam kólxének. Wokmek sat agkok yakwánxa kólpakmétek, Dios sat egkések yakwánxa kóltehek kélpeywa.

²⁰ Hakte háwe sat kéxegke kélpakmeyesma kélagko', Espíritu apkeñama Dios Egyap sat eyke epakmétek kélpakmeta enxoho kéxegke.

²¹ “Yának sat etekyók apkelyáxeg énxet, keñe sat apyepmeyk yának etekyók ma'a apketchek; keñe sat ma'a kélketchek etnekxak apkenmexma apyepmeyk, elnápekxak sat nahan.

²² Apyókxoho énxet sat etaknók kéxegke ko'o eñamakxa; wánxa agkok, ewagkasakpok sat eyke teyp ma'a énxet apkelenxánekmoho nak apyennaktésamo apteme mehey'áseyam ko'o ekwokmoho néxa.

²³ Kélmenxenáha sat agkok kéxegke xama tegma apwányam, kólmohok sat kólenyahagkok pók tegma apwányam; hakte ewatak sat aptaha nak Apketche énxet neyseksa megkólsawhomo kélmaheyak apyókxoho tegma apwányam yókxexma Israel. Nakso' xa sektahakxa nak seláneya kéxegke.

²⁴ “Méko xama kélxekmóso eyeykhágwomhok ma'a ektaha nak apkelxekmóso, keñe m'a énxet ektaha nak kélásenneykha meyeykhágwomok ma'a wese' apagkok.

²⁵ Enxet ektaha nak kélxekmóso kéméxchek kapayhekxak aksa apwáxok aphágweykxoho enxoho m'a aptaha nak apkelxekmóso, keñe m'a énxet ektaha nak kélásenneykha kéméxchek kapayhekxak aksa apwáxok aphágweykxoho enxoho wese' apagkok. Kéltemék agkok Beelzebú énxet ekha nak apxagkok, ¿háxko anhan kóltehek kólxének ma'a apketchek?

Kéméxchek negko'o antehek negaye Dios

²⁶ “Nágkólé' aksa kéxegke énxet. Ekyókxoho aksok ekyexamaxche nak keyphogwatámhok sat, kólya'ásegwomhok sat nahan ma'a aksok ekpowásamáxkoho nak.

²⁷ Keso sektahakxa nak sekyexchesamo seltennaso kéxegke, kólpeykásekxak sat kólxének; keñe so kélleg'a nak sektahakxa sekyexchesamo seltennaso kéxegke, kóllegés sat apyókxoho énxet'ák.

²⁸ Nágkólé' aksa kéxegke énxet apmopwána nak hegakhek, mopwanchek eyke yakhek ma'a eghagák; akke tásek kólé' ma'a apmopwána nak yakhek negyókxa tén han ma'a eghagák, cham'a sẽlmaséseykenxa nak.

²⁹ “Megkólchexayhek cha'a ánet nátétkók meyke ekmomnáwa, wánxa agkok megkatyemek eyke cha'a náxop megya'awo enxoho m'a Kélyap apha nak néten.

³⁰ Weykmók eyke kélyetsetcheso kéxegke ekyókxoho kélwa'.

³¹ Nágkólé' aksa; ennókek kéxegke, megkólhawok ma'a nátétkók.

Enxet'ák ektaha nak apkelxeyenma Jesucristo nápakta'awo' énxet'ák

³² “Apxénchek agkok xama énxet aptaha sétleykha ko'o nápakta'awo' énxet'ák, axének sat nahan ko'o xa aptaha seyásenneykha nápakto' ma'a Táta apha nak néten;

³³ keñe m'a énxet mehexeyenma nak ko'o nápakta'awo' énxet'ák, maxének sat nahan ko'o xa nápakto' ma'a Táta apha nak néten.

Jesús keñamak apkexpanchásamap énxet

³⁴ “Nágkólána aksa asókmohok meyke ektahakxa egwáxok sekwa'a nak keso náxop, axta ko'o aweyk yakwayam asógmak meyke ektahakxa egwáxok, wánxa m'a nennapmáxche nak.

³⁵ Ekwa'ak axta ko'o yakwayam atnesásekxak apkenmexma apyap énxet, keñe kelán'a katnehek enmexma m'a egken, keñe katnekxak enmexma yepyámog ma'a atánegken;

³⁶ apteme pók apagko' sat etnekxak apkenmexma énxet.

³⁷ “Kéxegke ektahakxa enxoho kélásekhayo kélyap esenhan ma'a kélchána, keñe kasextohok ko'o selásekhayo, megkapayhawok kóltehek kéxegke énxet'ák ahagkok; kéxegke ektahakxa enxoho kélásekhayo agko' kélketchek, esenhan ma'a kélketchek kelwána, keñe kasextohok ko'o selásekhayo, megkapayhawo kóltehek kéxegke énxet'ák ahagkok.

³⁸ Kéxegke ektahakxa enxoho megkólpata aksok ektegyéso kélagkok, keñe anhan mehelyetlogme', megkapayhawo kóltehek énxet'ák ahagkok.

³⁹ Kéxegke ektahakxa enxoho kélmasma ektémakxa nak kélyennakte, kamassegwók sat, wánxa agkok kéxegke ektahakxa enxoho kéletsapma eñama ko'o, kólwagkasaxchek sat teyp.

Aksok nenxawé naksa eñama negma takha' énxet'ák apkelyetlo nak Cristo

⁴⁰ “Enxet ektahakxa enxoho apma takha' kéxegke, hemok nahan ko'o xa takha'; keñe m'a ektahakxa enxoho sema takha' ko'o, emok takha' m'a aptaha nak seyáphaso ko'o.

⁴¹ Kéxegke ektahakxa enxoho kélma takha' xama énxet aptaha nak aplegaso Dios appeywa, aptaha nak nahan apkeñama Dios, kólxawak sat aksok ekhawo m'a kélmésamol'a cha'a énxet aptaha nak aplegaso Dios appeywa; kéxegke ektahakxa enxoho kélma takha' énxet ektakmela nak aptémakxa, eñama apteme ektakmela aptémakxa, kólxawak sat aksok ekhawo m'a kélmésamol'a cha'a énxet ektakmela nak aptémakxa.

⁴² Kéxegke ektahakxa enxoho kélméso xama egheykok ekláneyo yegmen ekmáxakxo m'a énxet ekmasextoho nak kéláyo sétleykha ko'o, kólxawak sat aksok kélméso naksa. Nakso' xa sektahakxa nak sekpeywa seláneya kéxegke.”