SAN MARCOS 9 - Lengua Sur (Enxet) Nuevo Testamento

¹ Aptahak axta anhan apkeláneya Jesús se'e: —Nápakha sat meletsepek énxet'ák apheyncha'a nak se'e ekwokmoho apwetágkoho ekwa'a m'a aptémakxa nak Wese' apwányam Dios yetlo apmopwána. Nakso' xa sektahakxa nak sekpeywa seláneya.

Jesús elyenmeykekxa apyókxoho

² Apkenátweykxeyk axta Jesús xama egkexe natámen ekyeykhe seis ekhem, netno' axta m'a. Pedro axta aksa apyentamak, tén han ma'a Santiago, tén han ma'a Juan. Nápakta'awo' axta yakmagkasekmok aptémakxa Jesús ma'a.

³ Apkelyenma axta aptamhákxak aptaxno, apmopé apagko' axta anhan, yeykhágwokmok axta m'a ekweykenxal'a kélmópéyáseykekxoho kélyenyeso apáwa apmopé.

⁴ Apwet'ak axta Elías, tén han Moisés apkelpakhetcháseykpoho Jesús xa énxet'ák nak.

⁵ Aptahak axta Pedro apcháneya Jesús se'e: —Sẽlxekmóso, ¡ektakmelakxoho agko' nelwa'a negko'o xa s'e! Anlának sat negko'o apkántanxo tegma apketkók: xama sat xép, keñe sat pók Moisés, keñe sat pók Elías.

⁶ Apkelyegwakkek axta Jesús apkeltámeséyak, axta ey'ásegkok yakwánxa etnehek appeywa Pedro.

⁷ Keñe axta ekweywento yaphopé, cháhapwa'ak axta nahan pesese agkok xa énxet'ák nak. Neyseksa yaphopé axta tépak kélpeywa. Entahak axta s'e: “Keso hatte seyásekhayo nak ko'o s'e: kóleyxho appeywa.”

⁸ Xama axta apkelyaheyncha'a nepyáwa xa énxet'ák nak, massék axta apwet'a énxet, Jesús axta aksa apwet'ak.

⁹ Neyseksa apkelánteyapma néten egkexe axta apmésa appeywa Jesús apkeltámeséyak apkeltamho meltennaha m'a ektahakxa axta apweté, ekwokmoho apxátekhágwokmo nepyeseksa apkeletsapma m'a aptaha nak Apketche énxet.

¹⁰ Ekeso eñamakxa meltenneykencha'a axta nepyeseksa énxet'ák, elmaxneyha axta eyke cha'a pók Jesús apkeltámeséyak yakwánxa katnehek ma'a apxátekhágwokmo enxoho nepyeseksa apkeletsapma.

¹¹ Aptahak axta Jesús apkeltámeséyak apkelmaxneyeyncha'a s'e: —¿Yaksak ektéma apkelxeyenma nak apmáheyo ewak apmonye Elías ma'a énxet'ák apkelxekmóso nak apnámokkok ektémakxa segánamakxa?

¹² Aptahak axta apchátegmowágko Jesús se'e: —Nakso' apxénamakpo ewak apmonye Elías, yakwayam elánekxak ekyókxoho aksok. ¿Yaksak ektéma ekxeyenma nak eknaktáxésamaxche peya eñegkohok ma'a ektaha nak Apketche énxet, tén han peya etaknaweykpok?

¹³ Wánxa agkok, eltennásek eyke ko'o kéxegke apwaya Elías, aptemésesek axta anhan énxet'ák ma'a ekyókxoho apmáheyókxa axta etnésesek, ekhawo ektémakxa nak ekxeyenma weykcha'áhak eknaktáxésamaxche yakweykenxa katnehek.

Jesús aptakmelcheseyam wokma'ák ekha axta apwáxok espíritu ekmaso

¹⁴ Xama axta apkelwákxo m'a aphágkaxa axta nápakha Jesús apkeltámeséyak, apwetágweykxeyk axta apwakha'a énxet apxámokma, apkelpakhetcháseykpók axta anhan énxet'ák apkelxekmóso nak apnámokkok ektémakxa segánamakxa m'a Jesús apkeltámeséyak.

¹⁵ Xama axta apwetákpo Jesús, apyókxoho énxet axta apnaktémagkok appeykesekmo, hakte pelakkasek axta apwetákpo apwakto.

¹⁶ Aptahak axta apkelmaxneyeyncha'a Jesús énxet'ák se'e: —¿Yaksak kélxéna kéxegke kélpakhetchásexkoho nak xa énxet'ák nak?

¹⁷ Aptahak axta apchátegmowágko xama énxet se'e: —Sẽlxekmóso, ekyentegkesakmek xeyk xép hatte, hakte espíritu meyke ekpeywa eghak apwáxok.

¹⁸ Kamok nahan cha'a espíritu ekmaso apmahágkaxa enxoho, kayaknegkesek cha'a náxop; katyapok nahan cha'a ekyakmopé apwáxok; eltakxek nahan cha'a apma'ák, elyennák nahan cha'a. Eltamhok xeyk eykhe etekkesek espíritu ekmaso m'a apkeltámeséyak, mopwancha'ak xeyk eyke.

¹⁹ Aptahak axta apchátegmowágko Jesús se'e: —¡Enxet apkelya'áseyam kéxegke! ¿Háxko sat ekwánxa ekhem kammok sekha ko'o kélnepyeseksa kéxegke? ¿Háxko sat ekwánxa ekhem kammok selenmáxamáxkoho kéxegke? Kólyentementa wokma'ák se'e.

²⁰ Kélyentegkek axta wokma'ák apkenmágkaxa Jesús. Xama axta ekwet'a Jesús espíritu ekmaso, pekhések axta makham, apyaknenchek axta náxop xa wokma'ák nak, apyettelegwáha axta anhan, tekkek axta anhan ekyakmopé apwáxok.

²¹ Aptahak axta apkelmaxneyeyncha'a Jesús wokma'ák apyap se'e: —¿Nanóya ekteme xa? Aptahak axta apchátegmowágko wokma'ák apyap se'e: —Aptémakxa apketkók axta eyeynamo ekteme xa.

²² Neyseksa táxa nahan cha'a étnók ekyaknegkesa enxoho xa espíritu ekmaso nak tén han ma'a neygmen, yakwayam enxoho kakhek, apwanchek agkok xép elának xama aksok, yepyósho henlano negko'o, hempásem hana.

²³ Aptahak axta apcháneya Jesús se'e: —¿Yaksak ektaha aptaha nak seyáneya ‘apkepwagko enxoho’? ¡Apwanchek elának ekyókxoho aksok ma'a aptaha nak mey'áseyam Dios!

²⁴ Aptahak axta apyennaktésawo appeywa wokma'ák apyap se'e: —May'ásekmok, ¡hepasem yakwayam kayágwomhok may'áseyam!

²⁵ Xama axta apwet'a Jesús apxámagwa'a énxet, appakhetchesek axta espíritu ekmaso. Aptahak axta apcháneya s'e: —Espíritu meyke ekpeywa, tén han meyke aheyk'ák, eltamhok ko'o katyapok xa wokma'ák apwáxok, nágkataxnegwata nahan cha'a apwáxok.

²⁶ Kelpáxamáha axta espíritu ekmaso, pekhések axta makham ma'a wokma'ák nak, keñe axta ektepa apwáxok, máxa apketsapma axta temesásak, apyókxoho énxet axta apxénak apketsapa.

²⁷ Wánxa agkok, apmek axta apmak Jesús apkempásekxo néten xa wokma'ák nak, apkenmáha axta nahan.

²⁸ Keñe axta aptaxnegwokmo Jesús xama tegma. Aptahak axta anhan apkelmaxneyeyncha'a apkeltámeséyak aptamhákxo apxakcha'awók se'e: —¿Yaksak ektaha magewagko nak negko'o nentekkesa xa espíritu ekmaso nak?

²⁹ Aptahak axta apchátegmowágko Jesús se'e: —Nempeywa nelmaxnagko aksa awanchek katekkesek xa ektéma nak kelyekhama'.

Jesús apxéneykekxoho makham yakwayam yetsapok

³⁰ Xama axta apkelxegákxo makham, apkelyeykhágwokmek axta yókxexma Galilea. Axta eyke eltamhok Jesús kólya'asagkohok apmahágkaxa,

³¹ hakte apkeltámeséyak axta apkeltennáseyha. Aptahak axta apkeláneya s'e: —Kólának sat emok énxet'ák ma'a ektaha nak Apketche énxet, yakhek sat nahan; wánxa agkok, antanxo ekhem sat eyke exátekhágwók.

³² Axta elya'ásegkok apkeltámeséyak xa aptahakxa axta apkeláneya Jesús, apkelakak axta eyke elmaxneyha.

¿Yaksak ektahakxa ekyawe kéláyo?

³³ Apkelwákxeyk axta tegma apwányam Capernaum. Apkelmaxneyáha axta Jesús apkeltámeséyak ma'a apkelwákxo axta apxanák. Aptahak axta apkelmaxneyeyncha'a s'e: —¿Yaksak exchek kélxéna kéxegke kéltennakmo exchek náxet ámay?

³⁴ Apkelwanmeyágkek axta eyke aksa apkeltámeséyak, hakte apkelpakhetcháseykpók axta náxet ámay, neyseksa apkelxega, apxéna yaksak kexaha émha amonye nepyeseksa.

³⁵ Apheyk axta Jesús, keñe axta apkelwónencha'a m'a doce apkeltámeséyak nak. Aptahak axta apkeláneya s'e: —Kélmokók agkok kóltehek kélxama kéxegke kélámha kélmonye', kéméxchek kóltemésesaxchek meyke kéláyo nepyeseksa kélnámokkok, tén han kólpasmok ma'a kélnámokkok.

³⁶ Apkenegkesekmek axta xama sakcha'a nepyeseksa apkeltámeséyak, xama axta apchéna sakcha'a, aptahak axta apkeláneya apkeltámeséyak se'e:

³⁷ —Enxet ektahakxa enxoho apchápeykha sakcha'a eñama apxeyenma ko'o sekwesey, heyáhapmakha nahan ko'o xa; keñe m'a énxet ektaha nak seyápeykha ko'o, meheyáhapmakha exakko' ko'o, yáhapmakha nahan ma'a aptaha axta seyáphaso ko'o.

Hegweyhenekxohok cha'a m'a énxet mehenmexeykha nak

³⁸ Aptahak axta Juan apcháneya Jesús se'e: —Sẽlxekmóso, negwet'ak axta negko'o xama énxet aptekkesa kelyekhama' yetlo apxeyenma xép apwesey, axta eyke óg'awok negko'o hakte háwe axta nenxegexma.

³⁹ Aptahak axta apchátegmowágko Jesús se'e: —Kólho aksa, nágkólnókasha, hakte mopwanchek sat hexénekxak ekmaso énxet apkelané enxoho aksok sempelakkaso nak agweta', eñama apxeyenma ko'o sekwesey.

⁴⁰ Hegweheynekxohok cha'a m'a énxet mehenmexeykha nak.

⁴¹ Enxet ektahakxa enxoho apméso kéxegke xama egheykok yegmen eñama kélteme kélyetlo Cristo, exkak sat ekyanmaga eñama apteme xa. Nakso' xa sektahakxa nak seláneya kéxegke.

Sẽleso anlanaksek egmók mey'asáxma

⁴² “Kéxegke ektahakxa enxoho kélláneso mey'asáxma sakcha'a apteme nak mehey'áseyam ko'o, tásek kóltetchesek kélyespok meteymog ekyawe, yakwayam kólyenyók kañe' wátsam ekwányam.

⁴³ Kelánések agkok megkólya'asáxma xama kélmek, kólyakten; tásek kólántexek ekyennaktamakxa egnenyek xama kélmek, kaxnók kólántexek ánet kélmék ma'a sẽlmaseseykenxa nak, cham'a megkaspóneykxa nak táxa.

⁴⁴ cham'a megkaletsapmakxa nak askok, tén han ma'a megkaspóneykxa nak táxa.

⁴⁵ Kelánések agkok megkólya'asáxma xama kélmenek, kólyakten; tásek kólántexek ekyennaktamakxa egnenyek xama kélmenek, kaxnók kólchexeyxchek kéxegke sẽlmaseseykenxa yetlo ánet kélmagkok,

⁴⁶ cham'a megkaletsapmakxa nak askok, tén han ma'a megkaspóneykxa nak táxa.

⁴⁷ Kelánések agkok megkólya'asáxma kélaktek, kóllek; tásek kólántexek aptémakxa nak Wese' apwányam Dios xama kélaktek, kaxnók kólchexeyxchek kéxegke sẽlmaseseykenxa yetlo ánet kélakta'ák,

⁴⁸ cham'a megkaletsapmakxa nak askok, tén han ma'a megkaspóneykxa nak táxa.

⁴⁹ “Hakte táxa sat kañek eyáxñáseykekxa apyókxoho énxet ekhawo ektémakxal'a kólenchahak yásek aksok ektekyawa yakwayam kóltemésesek eyáxñeyo amonye ekwatnamáxche.

⁵⁰ Tásek ma'a yásek nak; wánxa agkok, massék agkok ma'a ektémakxal'a ekmáske yásek, ¿háxko katnehek kólmaha makham kéxegke? Tásek keytek kélnepyeseksa kéxegke m'a ektémakxal'a ekmáske yásek. Kólteme meyke ektahakxa kélwáxok kélyókxoho nak.”