SAN MARCOS 16 - Lengua Sur (Enxet) Nuevo Testamento

Jesús apxátekhágwayam

¹ Yeyk'ak axta ekhem sábado apkellókasamakxa axta apkelyampé énxet'ák judíos, tegyágkek axta sokmátsa yakwayam kaxpakhak Jesús aphápak ma'a María Magdalena, axta nahan ma'a María, Salomé egken.

² Axto'ok agko' axta elmeyákxo takhaxpop ma'a kelán'ák nak, cham'a eyeynókxa axta ekxega ekhem semanal'a, peyk axta katyapok ekhem.

³ Entahak axta elpakhetchásexkoho s'e: —¿Yaksak sat henlekkesek meteymog takhaxpop átog?

⁴ Xama axta elanawo, axta kót'ak meteymog ma'a ekyetnakxa axta, cham'a meteymog ekyawe kélapma axta átog.

⁵ Xama axta elántaxna kañe' takhaxpop, wet'ak axta xama wokma'ák apha m'a ekpayhókxa nak nelya'asamakxa, aphóxek axta aptaxno apmopé m'a wokma'ák nak. Kelyegwakkek axta xa kelán'ák nak.

⁶ Wánxa agkok, aptahak axta apkeláneya s'e: —Nágkólyegwe. Jesús apkeñama Nazaret kélchetámak kéxegke, cham'a kélchexna axta néten aksok ektegyéso. Apxátekhágwokme', méko s'e. Kóllano s'e kélpekkenakxa axta.

⁷ Kóltakhoho, kóltennásekxa sat apkeltámeséyak, tén han ma'a Pedro: ‘Apweykekxa apmonye exnek xeyk etnehek Galilea; sat kólwetagwakxak ma'a, ekhawo aptémakxa axta apkelanagkama.’

⁸ Naktémagkakxók axta kelán'ák eltakhawo elenyekto m'a takhaxpop, hakte kelpexyenegkek axta elyegwé. Axta kaltennáseyha xama énxet enxoho, hakte kelakak axta.

Jesús apxekmowásamákpekxoho María Magdalena

⁹ Apxekmowáseykpekxók axta sekxo' María Magdalena, natámen apxátekhágwayam Jesús ma'a amonye elsaye ekhem eyeynókxa ekxega semanal'a, cham'a María apkelántekkesesama axta awáxok siete kelyekhama'.

¹⁰ Xegkek axta eltennáseykxo m'a aptamheykencha'awo axta apkelxegexma'a Jesús, cham'a ellapwámegko axta, tén han ma'a apkelekxagweyncha'a axta.

¹¹ Xama axta apkelleg'a amya'a apxátekhágwokmo Jesús xa énxet'ák nak, cham'a ekxéna axta ekwet'a xa kelán'a nak, apkelya'ásekmek axta.

Jesús apxekmowásamákpekxoho apkánet apkeltámeséyak

¹² Mók ektémakxa apxekmowásamákpekxoho axta aptahak Jesús apkánet apkeltámeséyak natámen xa, cham'a apkelxega axta apkelmahágko yókxexma.

¹³ Apkeltakhawok axta anhan xa, apkeltennáseykxeyk axta apkelxegexma'a, apkelya'ásekmek axta eyke nahan xa.

Jesús apméso apkeltamheykha énxeta'ák seykha amya'a

¹⁴ Nano' axta entahak apxekmowáseykpekxoho nahan Jesús once apkeltámeséyak, cham'a apheyncha'a axta nekha mésa. Apkelpakhetchesek axta eñama m'a apkelya'áseyam axta, tén han eñama m'a elyennakte apwáxók axta, hakte apkelya'ásekmek axta apkelleg'a apkeltenneykha m'a ektaha axta apweté apxátekhágwokmo Jesús.

¹⁵ Aptahak axta apkeláneya s'e: “Kólmohok ekyókxoho yókxexma, kóllegés nahan apyókxoho énxet'ák se'e amya'a segwagkasamo nak teyp.

¹⁶ Kólwagkasaxchek sat teyp kéxegke kélteme nak megkólya'áseyam tén han kéltegye nak yakpasama yegmen; kólsexnánéxchek sat eyke kéxegke kélteme nak kélya'áseyam.

¹⁷ Keytek sat kélnepyeseksa kéxegke aksok magkenatcheso nak agweta' kéxegke kélteme nak megkólya'áseyam se'e: kólántekkesek sat kelyekhama' yetlo kélxeyenma sekwesey ko'o; katyapok sat nahan mók ektémakxa kélpeywa;

¹⁸ kólmok sat nahan cha'a yéwa; kélyenchek sat agkok nahan pánakte segakhamol'a, megkatnésesamok sat exma kéxegke; kólpaknegwomhok sat nahan ektamheyak enxoho negmasé, kaltakmelwók sat nahan.”

Jesús apmeyeykekxa néten

¹⁹ Kélya'ásekxeyk axta néten Jesús natámen apkelpakhetcheso apkeltámeséyak, aphákxeyk axta m'a ekpayhókxa nak apkelya'asamakxa Dios.

²⁰ Apkelxegkek axta xa énxet'ák nak, yakwayam eltennaha tásek amya'a ekyókxoho yókxexma; appasmomchek axta anhan Wese' egegkok, ekmámnaksoho axta temék amya'a apkeltenneykha eñama ekpasmo apkelané m'a aksok sempelakkaso nak agweta'.