SAN MARCOS 10 - Lengua Sur (Enxet) Nuevo Testamento

Jesús apkeltenneykha ektémakxa negyamasma entáwa

¹ Aptekkek axta Jesús tegma apwányam Capernaum, apmeyákxeyk axta yókxexma Judea, tén han ma'a yókxexma ekpayho nak ekteyapmakxa ekhem neyp wátsam Jordán. Apchaknákxeyk axta makham énxet apxámokma aphakxa Jesús, apkeltennáseyha axta makham énxet'ák ekhawo aptémakxa axta cha'a.

² Nápakha fariseos axta apyo'ókmok Jesús yakwayam ékkónek, apkelmaxneyáha axta apwanchek kexaha eyenyók aptáwa énxet.

³ Aptahak axta apchátegmowágko Jesús se'e: —¿Háxko axta apkeltémókxa kóltehek kéxegke Moisés?

⁴ Aptahak axta apkelátegmowágko s'e: —Apchahayók axta agyenyók entáwa Moisés negmésa enxoho weykcha'áhak ekxeyenma nak negyamasma entáwa m'a kelán'a.

⁵ Aptahak axta apkeláneya Jesús se'e: —Apmések axta kéxegke Moisés xa apkeltémókxa nak kóltehek eñama m'a elyennakte kélwáxok nak kéxegke.

⁶ Wánxa agkok, ‘apkelanak axta Dios énxet tén han kelán'a, cham'a sekxo' axta apkeláneya ekyókxoho aksok.

⁷ Ekeso eñamakxa peya nak eyenyók cha'a apyap énxet, tén han eyenyók ma'a egken, yakwayam enxoho épetchaha m'a aptáwa,

⁸ xama sat nahan katnekxak xa ánet nak.’ Háwe kaxwo' ánet, xama aksa katnahagkok.

⁹ Ekeso eñamakxa megkeyméxko nak kéxegke kólyenyókasek mók ma'a Dios apyepetcheso nak.

¹⁰ Xama axta apkelwákxo apheykegkaxa, apkelmaxneyakxók axta Jesús apkeltámeséyak apkeltamho elya'asagkohok xa amya'a nak.

¹¹ Aptahak axta apkeláneya Jesús se'e: —Apyenyókek agkok aptáwa énxet, keñe emekxak mók kelán'a, aptawáseyha elyamhopma enmexma m'a émha amonye aptáwa axta;

¹² yenyókek agkok nahan atáwa xama kelán'a, keñe kamekxak pók énxet, tawáseyha nahan elyamhopma.

Jesús apkelmaxnéseso aksok eltakmela sakcha'a letkók

¹³ Kélnaklókasakmek axta Jesús sakcha'a letkók yakwayam enxoho epaknegwomho'; wánxa agkok, apkelpakhetchesek axta eyke Jesús apkeltámeséyak ma'a énxet'ák ektaha axta apnaklo apketchek.

¹⁴ Xama axta apwet'a Jesús xa, aplókek axta. Aptahak axta apkeláneya apkeltámeséyak se'e: —Kólho hey'ótak sakcha'a letkók, nágkólnókasha, hakte appaxakweykmek aptémakxa nak Wese' apwányam Dios aphawo nak se'e sakcha'a letkók nak.

¹⁵ Agkok exneyásékpohok sakcha'a énxet apma enxoho takha' m'a aptémakxa nak Wese' apwányam Dios, mopwanchek etaxnegwók ma'a.

¹⁶ Apkelpathetáha axta Jesús ma'a sakcha'a letkók nak, apnegkenchek axta anhan apmék étseksa'ák.

Xama énxet ekxákma aksok apagkok appakhetcheso Jesús

¹⁷ Xama axta peya exñekxak makham Jesús yakwayam elenxanmohok apxega, apkétchágkók axta xama énxet apwokmo m'a, apkeltekxekwokmek axta aptapnák apkenmágkaxa Jesús. Aptahak axta apkelmaxneyeyncha'a s'e: —Sẽlxekmóso aptakmalma, ¿Yaksak eyéméxko alának ko'o yakwayam ótak ekyennakte egkenyek megkatnegwayam enéxa?

¹⁸ Aptahak axta apchátegmowágko Jesús se'e: —¿Yaksak ektaha seltaha nak sektakmalma? Wánxa xama apha m'a aptaha nak aptakmela: cham'a Dios.

¹⁹ Apya'ásegkok xép kéltémókxa nak kóltehek: ‘Ná egyakha pók, ná etwasha elyamhopma, ná emenyex, ná etne aksa apmopwána amya'a exének pók, ná elyexanchesha pók; etne apcháyo apyap, tén han ma'a egken.’

²⁰ Aptahak axta apchátegmowágko énxet se'e: —Sẽlxekmóso, ektemegkek ko'o ekyókxoho xa, eyeynamókxa m'a sektémakxa axta wokma'ák.

²¹ Apkelanawók axta Jesús xa énxet nak, apchásekhawók axta anhan. Aptahak axta apcháneya s'e: —Xama aksok kéméxchek elának xép: exeg, ekxeykxa m'a ekyókxoho aksok apagkok ekyetna nak xép, elmés ma'a énxet meyke aksok apagkok nak. Keñe sat keytek xép ekxákma aksok apagkok ma'a néten. Exyem sat makham, keñe sat hétlawha.

²² Xama axta apleg'a énxet xa, teyekmek axta apwáxok; kelapwámegkakxeyk axta aptakhákxo, hakte xámok axta aksok apagkok ma'a.

²³ Apsawheyha axta exma Jesús apkelyaheyncha'a. Aptahak axta apkeláneya apkeltámeséyak se'e: —¡Askehe' sat yakwayam elántexek aptémakxa Wese' apwányam Dios ma'a énxet'ák ekxákma nak aksok apagkok!

²⁴ Pelakkasek axta apkelleg'a apkeltámeséyak xa aptahakxa axta appeywa Jesús, wánxa agkok, aptahak axta makham apkeláneya Jesús se'e: —Etchek. ¡Askohok agko' kólántexek kéxegke m'a aptémakxa nak Wese' apwányam Dios.

²⁵ Yeskohok eyke yakwayam etxek yágyatnáxeg ma'a soketáma aktek; keñe m'a énxet ekxákma nak aksok apagkok askehek etxek ma'a aptémakxa nak Wese' apwányam Dios.

²⁶ Xama axta apkelleg'a makham xa, pelakkásók agko' axta apkelleg'a, aptahak axta cha'a apkelmaxneyeyncha'a pók se'e: —¿Yaksak sat kawagkasaxchek teyp?

²⁷ Apkelanawók axta Jesús apkeltámeséyak. Aptahak axta apchátegmowágko s'e: —Mopwanchek ewagkasakpohok apagko' teyp énxet, Dios aksa apwanchek ewagkasek teyp, hakte méko xama aksok megkapwagkexa elának Dios.

²⁸ Aptahak axta apcháneya Pedro s'e: —Negkexakkek axta negko'o ekyókxoho aksok egagkok axta, keñe negyetlawa exchep.

²⁹ Aptahak axta apchátegmowágko Jesús se'e: —Kéxegke ektahakxa enxoho kélyamasma kélxagkok, kélyepma esenhan kélyáxa', kélchána, kélyepmeyk, kélketchek, esenhan ma'a xóp kélagkok nak eñama selyetlo ko'o, tén han eñama kéllegaso m'a amya'a segwagkasamo nak teyp,

³⁰ kayeykhágwomhok sat kaxwo' kélxaweykekxa aksok kélagkok keso negwánxa nak, kélxanák, kélyepma, kélyáxa', kélchána, kélketchek, tén han ma'a xóp kélagkok nak, neyseksa eykhe kélnaktawáseykegkoho; kólxawak sat nahan ekyennakte kélnenya'ák megkatnegwayam enéxa m'a ektaha sat axnagkok kélheykha.

³¹ Wánxa agkok, meyke kéláyo sat kóltemesásekxak nápakha énxet'ák apteme nak apkelámha apmonye'e keso kaxwo' nak, keñe sat kóltemesásekxak apkelámha apmonye'e m'a nápakha énxet'ák apteme nak meyke kéláyo keso kaxwo' nak.

Jesús ekteme antanxo apxéneykekxoho yakwayam yetsapok

³² Apkelmeyákxeyk axta Jerusalén, apmonye apkeltámeséyak axta apxegak Jesús. Tamháha axta apwáxók Jesús apkeltámeséyak, apkelakak axta m'a apkelxega axta axayo'. Apkelwóneyha axta makham Jesús doce apkeltámeséyak, mók nekha axta apkelya'ásak, apkeltennásek axta yakwánxa katnehek.

³³ “Kélwet'awók kéxegke nelmeyákxo kaxwo' ma'a tegma apwányam Jerusalén, cham'a yakwánxa sat kólmések aptaha nak Apketche énxet ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Yának sat nahan emátog, egkések sat nahan ma'a énxet'ák metnaha nak judíos.

³⁴ Yesmaksek sat nahan, yexpakhak sat nahan apyamánog, etekpagmakha sat nahan, yakhek sat nahan; antanxo ekhem sat eyke exátekhágwók.”

Santiago tén han Juan apkelmaxnagko aksok Jesús

³⁵ Apkelmahágkek axta aphakxa Jesús Santiago, tén han Juan, aptaha axta Zebedeo apketchek. Aptahak axta apcháneya s'e: —Sẽlxekmóso, egmenyék negko'o hegmések ma'a peya nak ólmaxna'.

³⁶ Aptahak axta apkelmaxneyeyncha'a Jesús se'e: —¿Yaksak kéltamho atnésesek kéxegke?

³⁷ Aptahak axta apkelátegmowágko s'e: —Yána sat anxek negko'o enxama ekpayhókxa nak apkelya'asamakxa, keñe sat egmók ma'a ekpayhókxa nak nepsagkalwa, cham'a apkexyekmo sat yetlo apcheymákpoho.

³⁸ Aptahak axta apchátegmowágko Jesús se'e: —Megkólya'ásegkok kéxegke m'a selmaxneya nak. ¿Kélwanche' enxeykel'a kóllegagkohok ma'a peya nak ko'o añegkoho' ekyetchesamaxkoho nak xama egheykok negyal'a aksok ekmáske, tén han kólxawak ma'a nétsapma peya nak ko'o axka' ekyetchesamaxkoho nak yakpasama yegmen?

³⁹ Aptahak axta apkelátegmowágko s'e: —Egwanchek neykhe. Aptahak axta apkeláneya Jesús se'e: —Kóllegagkohok sat kéxegke xa nenlegeykegkoho nak, cham'a ekyetchesamaxkoho nak xama egheykok negyal'a aksok ekmáske peya nak ko'o eynek, kólxawak sat nahan nétsapma peya nak ko'o axka' ekyetchesamaxkoho nak yakpasama yegmen;

⁴⁰ akke hepayhawok ko'o wának exek énxet ekpayhókxa nak selya'asamakxa, tén han ma'a nesagkalwa. Wánxa sat kólmések yakwayam exek ma'a énxet ektaha nak kélpagkancheso.

⁴¹ Xama axta apkelleg'a nápakha Jesús apkeltámeséyak xa, diez axta apyókxoho m'a, apkellókek axta aptaknawé m'a Santiago tén han Juan.

⁴² Wánxa agkok apkelwóneyha axta eyke Jesús. Aptahak axta apkeláneya s'e: —Kélya'ásegkok kéxegke apyetna nepyeseksa énxet'ák melya'áseyak Dios ma'a kelwese'e apkenagkamo nak kapayhawok ennaktésakpohok neyseksa apkelmeykha apnámokkok, yának nahan cha'a kóltehek kéláyo kélagko' nepyeseksa apnámokkok.

⁴³ Akke kapayhawok katnehek kélnepyeseksa kéxegke xa ektaha nak. Kélmokók agkok kéxegke kóltehek kélámha kélmonye'e, kéméxchek kólpasmok kélnámokkok.

⁴⁴ Kélmokók agkok kéxegke kóltehek kélámha kélmonye'e, kéméxchek kóltemeykha aksa ektémol'a énxet apmomap.

⁴⁵ Axta eweyk nahan ektaha nak Apketche énxet yakwayam yának kólpasmok, wánxa agkok, apwayak axta yakwayam epasmok énxet'ák, tén han yakwayam eyenyók apyennakte ekyanmaga yakwayam elwagkasek teyp apyókxoho énxet.

Jesús aptakmelcheseyam Bartimeo aptaha axta meyke apakta'ák

⁴⁶ Apkelwokmek axta tegma apwányam Jerico. Xama axta aptepa Jesús nepyeseksa tegma apwányam yetlo apkeltámeséyak, tén han yetlo m'a énxet apxámokma ektaha axta apyetlo, apheyk axta nekha ámay xama énxet meyke apakta'ák apwesey axta Bartimeo, apkelháxanma axta cha'a kólmések aksok, Timeo apketche axta m'a.

⁴⁷ Xama axta apleg'a apwesey Jesús apkeñama Nazaret, keñe axta aptaha apyennaktésawo appeywa énxet meyke apakta'ák se'e: —¡Jesús, David apketche, yepyósho helanok ko'o!

⁴⁸ Apxámok axta énxet apnókáseykha apkeltamho eykhe ewanmeyekxa, wánxa agkok apyánchesakmók axta eyke apyennaktésamo appeywa m'a énxet meyke apakta'ák nak. Aptahak axta s'e: —¡David apketche, yepyósho helanok ko'o!

⁴⁹ Keñe axta apkenegwokmo Jesús. Aptahak axta s'e: —Kólwónmakha. Kélwóneyha axta m'a énxet meyke apakta'ák axta. Entahak axta amya'a apcháneyákpo s'e: —Ewaskápekxoho, etnamha, xép kélwóneyha.

⁵⁰ Apyenyókek axta apchaklamap ma'a énxet meyke apakta'ák axta, apnextegawók axta néten apyo'ókmo Jesús.

⁵¹ Aptahak axta apkelmaxneyeyncha'a Jesús se'e: —¿Yaksak apkeltamho atnésesek xép? Aptahak axta apchátegmowágko énxet meyke apakta'ák se'e: —Sẽlxekmóso, emenyék ko'o ótekxaxma.

⁵² Aptahak axta apcháneya Jesús se'e: —Apwanchek etakhekxak kaxwo'; mey'áseyam keñamak aptakmelwokmo exchep. Yetlókók axta anhan apweteykekxaxma m'a énxet meyke apakta'ák axta, apyetlókek axta Jesús cham'a ámay apmahágkaxa axta Jesús.