SAN LUCAS 22 - Lengua Sur (Enxet) Nuevo Testamento

Ekhémo mók apkelpakmeyesma énxet'ák yakwayam yának emakpok Jesús

¹ Chágketwokmek axta ekhem aptámákpexa axta pan meyke kempáseyak, cham'a ekhem melwagkayam axta énxet'ák judíos kéltéma axta Pascua.

² Aptegyágkek axta yakwánxa etnehek yakhek Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa, énxet'ák axta eyke apkelakak.

³ Taxneyk axta apwáxok Satanás xama Jesús apkeltámeséyak apkeñama axta nepyeseksa m'a doce nak, apwesey axta Judas Iscariote.

⁴ Apteyánegwokmók axta apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák aptakmelcheso axta tegma appagkanamap, apkeltennásek axta yakwánxa etnehek egkések Jesús.

⁵ Kelpayhekxeyk axta apwáxók xa énxet'ák nak, apxénchek axta anhan egkések selyakye Judas.

⁶ Leyawók axta apwáxok Judas ektahakxa apkelpakhetchásamákpoho, yetlókók axta anhan aptegyeykha yakwánxa etnehek egkések Jesús xa énxet'ák nak, cham'a meykexa enxoho énxet.

Nempasmo ektakmela

⁷ Wokmek axta ekhem aptámákpexa axta pan meyke kempáseyak, aptekyómakxa axta cha'a nekkések apketkók kélpagkancheso nak ekhem Pascua.

⁸ Apcháphásek axta Jesús Pedro tén han Juan. Aptahak axta apkeláneya s'e: —Kólxeg, kóllánegwakxa sat nento yakwayam antók nento taxnam ekhem Pascua m'a.

⁹ Aptahak axta apkelmaxneyeyncha'a s'e: —¿Háxko apkeltamhókxa anlánegwók nento?

¹⁰ Aptahak axta apchátegmowágko Jesús se'e: —Kélántaxnegwokmek sat agkok nepyeseksa tegma apwányam, kólwetagwók sat énxet apseykekxa yátegwáxwa yetlo yegmen. Kólyetlakxa sat ekwokmoho m'a aptaxnegwánxa enxoho tegma xa énxet nak.

¹¹ Kólteme sat kólának ektaha apxagkok se'e: ‘Aptahak xeyk sẽlxekmóso apcháphasa appeywa s'e: ¿Háxko ekpayho tegma apwáxok yakwánxa ataswók sekto yetlo seltámeséyak ekhem mólwagkayam Pascua?’

¹² Exekmósek sat kéxegke tegma netno' ekyawakxa apwáxok ma'a, penchásexchek nahan kéllaneykekxa ekhéyak aksok ma'a. Kóllánegwom nento yakwayam antók taxnam ma'a.

¹³ Apkelxegkek axta xa apkeltámeséyak nak, apwetágwokmek axta nahan ekyókxoho aptahakxa axta apkeláneya Jesús. Apkelánegwokmek axta aptéyak ekhem Pascua melwagkayam axta m'a.

¹⁴ Xama axta ekwokmo yakwánxa etwok apto Jesús tén han apkeltámeséyak, apháha axta nekha mésa.

¹⁵ Aptahak axta apkeláneya Jesús se'e: —¡Awanhek ko'o sekmámenyého atwohok xamo' sekto kéxegke keso taxnam ekhem Pascua mólwagkayam nak amonye setsapma!

¹⁶ Hakte eltennásek ko'o peya malánekxók cha'a nento mólwagkayam nak ekhem Pascua ekwokmoho ektaha m'a aptémakxa nak Wese' apwányam Dios.

¹⁷ Keñe axta apma egheykok, apmések axta ekxeyenma apwáxok Dios, aptahak axta s'e: —Kólyenák se'e, kólmés nahan cha'a kélmók;

¹⁸ hakte eltennásek ko'o kéxegke peya meynekxók cha'a anmen yámet égmenek nak ekwokmoho ekwa'a m'a aptémakxa nak Wese' apwányam Dios.

¹⁹ Keñe axta apma anhan pan, apmések axta ekxeyenma apwáxok Dios, apyepteyk axta, apkelmeyásegkek axta anhan apkeltámeséyak. Aptahak axta apkeláneya s'e: —Keso sekyókxoho ko'o s'e, sekmésa nak yakwayam watsapok kéxegke eñamakxa. Kólteme sat mehelwagkayam ko'o.

²⁰ Hawók axta anhan aptemésesakxa egheykok natámen aptéyak. Aptahak axta s'e: —Keso egheykok ekteme ekhémo mók nelpakhetchásamáxkoho xamo' Dios, ektaha nak éma ahagkok ekteméseso ekmámnaksoho, cháxa ekyegkenáxko nak yakwayam kapasmok kéxegke.

²¹ Enxet apmáheyo nak hetlakkasesek yának amaxchek apheyk se'e nekha mésa nak.

²² Katnehek sat aptaha nak Apketche énxet ma'a apmáheyókxa axta etnésesek Dios, asagko' agko' sat eyke katnehek kéllegasáseykegkoho m'a énxet ektaha nak appelakkaseso apkeltémo emakpok.

²³ Keñe axta aptaha apkelpakhetcháseykpoho apkeltámeséyak se'e: ‘¿Yaksak sat kexaha kaphemmok yakwayam katlakkasesek aksa kának emakpok?’

¿Yaksak ektahakxa ekyawe kéláyo?

²⁴ Apkelátegmoweykpek axta Jesús apkeltámeséyak apxéna yaksak kexaha ekpayhawo exének énxet aptaha apkemha amonye nepyeseksa.

²⁵ Aptahak axta apkeláneya Jesús se'e: “Elyennaktésakpohok cha'a neyseksa apkelmeykha apnámokkok ma'a kelwese'e melya'áseyak nak Dios, exénakpohok cha'a ektakmela apkeltamheykha m'a apkelámha apmonye'e apagkok nak.

²⁶ Akke keyméxchek katnehek kélnepyeseksa kéxegke xa ektaha nak. Enxet ekyawe nak kéláyo, kéméxchek exnésakpohok wokma'ák, keñe m'a énxet ekha nak apkeláneykha, kéméxchek exnésakpohok ma'a kélásenneykhal'a.

²⁷ ¿Yaksak ektahakxa ekyawe kéláyo nepyeseksa xa apkánet nak? ¿Keya m'a aphamol'a nekha mésa etwok apto, enxeykel'a m'a kélásenneykencha'awol'a esantak nento néten mésa? ¿Háwe enxeykel'a m'a aphamol'a nekha mésa etwok apto? Wánxa agkok, ekheyk eyke ko'o kélnepyeseksa kéxegke sekyetchásamáxkoho m'a énxet kélásenneykhal'a.

²⁸ “Mehelyenseykmok cha'a kéxegke neyseksa seklegeykegkoho xamo'.

²⁹ Ekeso eñamakxa sektemésesa nak kéxegke wese' nepyeseksa kélnámokkok, ekhawo setnésesamakxa axta nahan ko'o xa Táta;

³⁰ kóltawagkok sat kéxegke kéltéyak nekha mésa m'a sektémakxa nak ko'o Wese' apwányam, kólyenagkok sat nahan kélyenéyak; kólhakha sat nahan néten taháno eltakmela yakwayam kóltehek kélyekpelchémo m'a doce pók aptémakxa énxet'ák Israel nak.”

Jesús apxeyenma Pedro peya etnehek hó magya'áseyak

³¹ Aptahak axta anhan Wese' egegkok se'e: Simón, elano, amenyék Satanás kaxkak yakwayam kalyawhésha kéxegke ektemésesamol'a exchahayam hótahap;

³² wánxa agkok elmaxnésesek axta eyke ko'o exchep yakwayam enxoho meyensemek apteme mey'áseyam. Ey'áweyktek sat agkok makham xép, epásem sat apnámokkok yakwayam enxoho elenxanmohok apkelyennaktésamo apteme melya'áseyam.

³³ Aptahak axta Simón apcháneya Jesús se'e: —Wese', ekmakawók ko'o axnamhok xamo' xép sẽlpextétamakxa ekwokmoho setsapawo xamo' xép.

³⁴ Aptahak axta apchátegmowágko Jesús se'e: —Pedro, ektahak seyáneya exchep se'e: sakhem sat katnehek antanxo mexeyenma exchep sekwesey amonye ekpáwá tat'a, exének sat mehey'ásegkok exchep.

Chágketwa'ak yakwánxa kawak seklegeykegkoho

³⁵ Keñe axta aptaha apkelmaxneyeyncha'a Jesús se'e: —Xama aksok enxoho axta eykel'a kéméxchek kéxegke, cham'a seláphasa axta meyke nahápa, tén han meyke selyakye axagkok, tén han meyke kéltéto kélmagkok. Aptahak axta apkelátegmowágko s'e: —Axta keyméxchek xama aksok enxoho.

³⁶ Aptahak axta apkeláneya Jesús se'e: —Kaxwo' eyke apwanchek eswok énxet nahápa apagkok ekyetnakxa enxoho, tén han ma'a selyakye axagkok nak; énxet meykexa enxoho sókwenakte apagkok, tásek ényekxak ma'a apchaklamap nak, keñe etegyek xama sókwenakte.

³⁷ Eltennásek kéxegke peya hetnehek ko'o ektémakxa nak eknaktáxésamaxche s'e: ‘Máxa énxet ekmaso aptémakxa axta kéltemésesók nepyeseksa m'a énxet'ák elmasagcha'a nak apkeltémakxa.’ Hetnehek sat ko'o m'a ekyókxoho ektémakxa nak eknaktáxésamaxche sexeyenma ko'o.

³⁸ Aptahak axta apkelpakmeta énxet'ák se'e: —Wese', keso ánet sókwenakte s'e. Aptahak axta Jesús apchátegmowágko s'e: —Wánxa kólteme.

Jesús apteme nempeywa nelmaxnagko yókxexma Getsemaní

³⁹ Apxegkek axta Jesús natámen xa, ekhawo aptémakxa axta cha'a, apkenátweykxeyk axta néten egkexe ekwesey nak Olivos; apyetlókek axta anhan apkeltámeséyak.

⁴⁰ Xama axta apkelwokmo m'a yókxexma nak, aptahak axta apkeláneya Jesús se'e: —Kólteme nempeywa nelmaxnagko, yakwayam enxoho megkahapwék kéxegke ekyekkónma.

⁴¹ Keñe axta apkexaya aksa Jesús apkeltámeséyak ma'a, yámmakhawók axta apmahágkok, ekweykenxal'a agyenyók meteymog, apkeltekxekwokmek axta aptapnák ma'a yakwayam etnehek nempeywa nelmaxnagko.

⁴² Aptahak axta se'e: “Táta, apmenyék agkok xép, hényókas ko'o s'e seklegeykegkoho ekyetchesamaxkoho nak aksok ekmáske negyal'a; momenyék ko'o kalanaxchek ma'a sekmámenyého ahagko' nak, wánxa m'a apmopmenyého nak xép.”

⁴³ Apxekmowáseykpok axta xama Dios apchásenneykha apkeñama néten, yakwayam enxoho ennaktesásekxohok makham apwáxok.

⁴⁴ Apwaskápekxók axta aptaha nempeywa nelmaxnagko Jesús neyseksa ekyawe aplegeykegkoho, kelsekkenánteyk axta apyemes, máxa axta entahak ma'a ektémol'a kasekkenek éma náxop.

⁴⁵ Xama axta apkempákxo néten Jesús ma'a aptahakxa axta nempeywa nelmaxnagko, apmeyákxeyk axta aphágkaxa apkeltámeséyak, apwetágweykxeyk axta apnaktena, elapwámeyak axta chakhak apyempe'ék.

⁴⁶ Aptahak axta apkeláneya s'e: —¿Yaksak ektaha kélnaktena nak? Kólchaknekxa néten, kólteme nempeywa nelmaxnagko, yakwayam enxoho megkahapwék kéxegke ekyekkónma.

Jesús apmomap

⁴⁷ Neyseksa appakmeyesma axta Jesús ma'a apkelwokmo axta énxet apxámokma. Apmonye axta apxegak ma'a énxet apwesey axta Judas apkeñama axta nepyeseksa doce Jesús apkeltámeséyak. Apyepetchegwokmók axta peya epetsesek Jesús.

⁴⁸ Aptahak axta apcháneya Jesús se'e: —Judas, ¿yetlo appetsesoya appelakkasásak xép apkeltamho emakpok ma'a aptaha nak Apketche énxet?

⁴⁹ Xama axta apkelwet'a ektahakxa m'a énxet'ák apkelxegexma'a axta Jesús, aptahak axta apkelpakmeta s'e: —Wese', ¿apkeltamhoya ólmaha sókwenakte ónnapaxchek negko'o xa énxet'ák nak?

⁵⁰ Xama énxet apkemha apmonye appasmo apkelmaxnéseso Dios énxet'ák apagkok apchásenneykha axta apyensásak xama xa Jesús apkelxegexma'a nak, apeykok axta apyaktenchásak ekpayhókxa nak apkelya'asamakxa.

⁵¹ Aptahak axta Jesús se'e: —Nágkóltemésesha, wánxa kólteme. Appaknegkesakmók axta apeykok Jesús xa kélásenneykha nak, aptakmelchesekmek axta anhan.

⁵² Keñe axta aptaha apkeláneya Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák aptakmelcheso nak tegma appagkanamap, tén han ma'a apkelámha apmonye'e nak kélakneykekxexa, cham'a apkelwokmo axta yakwayam éntemekxak Jesús ma'a: —¿Yaksak ektaha kélsokmoho nak sókwenakte selya'awa tén han kélsokmoho yámet, máxa eltemesásak énxet ekmaso aptémakxal'a?

⁵³ Yókxoho ekhem axta cha'a sekha xamo' kéxegke kañe' tegma appagkanamap, axta anhan helpaknegweykmohok xama enxoho. Wokmek eyke kaxwo' ekhem kélagkok kéxegke eñama ekmowána m'a ekyaktesakxaxma nak.

Pedro apteme hó magya'áseyak Jesús

⁵⁴ Apmákpek axta Jesús, apkemha apmonye appasmo apkelmaxnéseso Dios énxet'ák apagkok apxagkok axta kélya'áseykxak. Axta etétegkohok apyetlawa Pedro.

⁵⁵ Kelwatnéxchek axta táxa m'a apyawakxa axta apwáxok tegma, apháha axta anhan énxet'ák nekha táxa, aphakmek axta anhan Pedro m'a.

⁵⁶ Xama axta ekwet'a apha nekha táxa Pedro kelán'a ektaha axta kélásenneykha, axta kalwáteyásak elano, entahak axta eyáneya s'e: —Cháxa aptéma axta cha'a apxegexma Jesús xa.

⁵⁷ Axta eyke exénak Pedro. Aptahak axta s'e: —Kelán'a, may'ásegkok ko'o xa ekxéna nak.

⁵⁸ Axta kanéwók apwet'a nahan pók énxet. Aptahak axta apcháneya s'e: —Xép nahan apkelxegexma'a m'a énxet'ák nak. Aptahak axta apchátegmowágko Pedro s'e: —Háwe ko'o.

⁵⁹ Nano' axta entahak aptaha nahan appeywa pók énxet se'e: —Nakso', axta anhan apxegexma Jesús xa. Galilea anhan apkeñamak xa.

⁶⁰ Aptahak axta Pedro s'e: —May'ásegkok ko'o m'a apxéna nak. —Yetlókók axta anhan ekpáwá tat'a m'a neyseksa appakmeyesma axta Pedro.

⁶¹ Apkenmexákxók axta neptámen Jesús, apkelanawók axta Pedro, keñe axta Pedro ekxeyenwákxoho apwáxok aptéma axta apkenagkama Wese' egegkok se'e: “Antanxo sat katnehek mexeyenma exchep sekwesey sakhem amonye ekpáwá tat'a.”

⁶² Keñe axta aptepa Pedro m'a, axta yeysagkohok apwana.

Jesús apkesmésamap

⁶³ Apkesmések axta Jesús ma'a énxet'ák ektaha axta apkeláneykha. Apchakháha axta anhan cha'a.

⁶⁴ Apnaktetchesek axta anhan apakta'ák. Aptahak axta cha'a apkelmaxneyeyncha'a s'e: —¡Ey'asagkoho hana ektaha nak ektekpaga!

⁶⁵ Xámok axta ektahakxa amya'a kélyamatcháseykha Jesús.

Jesús kélyentama aphágkaxa énxet'ák ekyawe nak kéláyo

⁶⁶ Xama axta elsaka, apchaknákxeyk axta énxet'ák judíos apkelámha apmonye'e nak kélakneykekxexa, tén han ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso axta apnámokkok ektémakxa segánamakxa, keñe axta kélyentama Jesús aphágkaxa m'a kelwese'e ekyawe nak kéláyo, entahak axta amya'a kélmaxneyeyncha'a s'e:

⁶⁷ —Hẽltennés negko'o, ¿Xépya Mesías? Aptahak axta apchátegmowágko Jesús se'e: —Eltennásek agkok kéxegke sektaha ko'o Mesías, kólya'asók.

⁶⁸ Elmaxneyáha agkok nahan kéxegke, mehelátegmowagkek.

⁶⁹ Sakhem sat eyke exnakxak kaxwo' aptaha nak Apketche énxet ma'a ekpayhókxa nak apkelya'asamakxa Dios ekha nak apyennakte.

⁷⁰ Keñe axta aptaha apkelmaxneyeyncha'a apyókxoho énxet se'e: —¿Xép neyke Dios Apketche? Aptahak axta apchátegmowágko Jesús se'e: —Kéxegke kélagko' neykhe exénak ko'o sektaha xa.

⁷¹ Aptahak axta apkelpakmeta énxet'ák se'e: —Megkeyméxchek kaxwo' antegyekxohok énxet apya'áseykegkoho aptémakxa. Negko'o egagko' nenleg'ak aptahakxa appeywa.