SAN JUAN 9 - Lengua Sur (Enxet) Nuevo Testamento

Jesús apwetáseykekxaxma énxet meyke apakta'ák eyénamo sekxo' apteyékmo

¹ Apwetágwokmek axta Jesús neyseksa apxega énxet meyke apakta'ák eyeynamókxa sekxo' apteyékmo.

² Aptahak axta apkelmaxneyeyncha'a apkeltámeséyak se'e: —Sẽlxekmóso, ¿Yaksak ektéma aptéma nak meyke apakta'ák xa énxet nak? ¿Enxeykel'a keñamak ma'a ekteme nak megkalya'asáxma enchána, esenhan ma'a mey'asáxma apagko' nak?

³ Aptahak axta apchátegmowágko Jesús se'e: —Megkañamak ma'a mey'asáxma apagko' nak, megkañamak nahan ma'a megkalya'asáxma nak enchána; Dios apmopwána eyke yakwayam kataxchek ektéma meyke apakta'ák xa énxet nak.

⁴ Kéméxchek anlának aptamheykha m'a aptaha axta seyáphaso ko'o keso ekhakxoho ekhem nak, hakte kayaktések sat, cham'a magkegwagkexal'a anlának nentamheykha.

⁵ Ko'o sekteme elseyexma keso náxop neyseksa sekha makham keso náxop.

⁶ Apkelpatseyk axta apyamánog náxop Jesús natámen apteme appeywa xa, aptemesásekxeyk axta ketsék yelpa', keñe axta apkeltexnasásegko apakta'ák xa énxet meyke apakta'ák nak.

⁷ Keñe axta aptahak apcháneya s'e: —Exeg, eyakpásekxa yegmen ma'a yámelchet ekwesey nak Siloé (nenteme nak nempeywa: “Eyaphásamáxche”). Apxegkek axta xa énxet meyke apakta'ák nak, apyakpásekmek axta yegmen ma'a, xama axta aptakháwo makham, keñe axta apwetákxoxma.

⁸ Apkelmaxneyáha axta cha'a pók énxet'ák ektaha axta apheykha keto' apxagkok, tén han ma'a énxet'ák ektaha axta apweté cha'a exek nekha ámay eleyxek exkak aksok. Aptahak axta apkelpakmeta s'e: —¿Háweya aphama axta cha'a nekha ámay eleyxek aksok apxawé xa énxet nak?

⁹ Aptahak axta nápakha énxet se'e: —Cháxa: Keñe axta nápakha énxet aptaha apkelpeywa s'e: —Háwe, aphawo neykhe. Wánxa agkok, apxeyenma apagko' axta eyke aptahak ma'a énxet apteme axta meyke apakta'ák, aptahak axta s'e: —Ko'o neykhe s'e.

¹⁰ Entahak axta amya'a kélmaxneyeyncha'a s'e: —¿Yaksak ektaha apkepwagko nak kaxwo' apwetákxoxma exchep?

¹¹ Aptahak axta apchátegmowágko énxet se'e: —Yelpa' exchek apkelanak énxet apwesey exchek Jesús, keñe seltexnasásegko ahakta'ák. Keñe exchek han aptaha seyáneya s'e: ‘Exeg, emhok yámelchet ekwesey nak Siloé, eyakpásem sat ma'a.’ Ekxegkek xeyk ko'o, xama exchek sekyakpásekmo m'a, keñe sekwetákxoxma.

¹² Entahak axta amya'a kélmaxneyeyncha'a s'e: —¿Háxko apmahágkaxa m'a énxet nak? —May'ásegkok,— axta aptahak apchátegmowágko xa énxet nak.

Enxet'ák fariseos apkelmaxneyeykha énxet kaxwé apweteykekxaxma

^13-14 Ekhem apkellókasamakxa apkelyampé énxet'ák judíos axta m'a aptemesáseykxo axta yelpa' apyamánog Jesús, tén han ma'a apwetaseykxo axtaxma énxet meyke apakta'ák. Ekeso eñamakxa kélyentamákxo axta nápakta'awo' fariseos ma'a énxet ektaha axta kaxwé apweteykekxaxma,

¹⁵ apkelmaxneyáha axta ektahakxa apweteykekxaxma xa énxet'ák nak. Aptahak axta apchátegmowágko énxet kaxwé apweteykekxaxma s'e: —Yelpa' exchek ko'o eltexnasásegkok ahakta'ák, keñe sekyakpasa nahan yegmen, keñe kaxwo' sekwetákxoxma.

¹⁶ Aptahak axta apkelpakmeta nápakha fariseos se'e: —Enxet ektaha nak apkelané xa megkañamak Dios, hakte metnahak apcháyo ekhem nellókasamakxa nelyampé. Keñe axta anhan nápakha énxet aptaha apkelpakmeta s'e: —¿Háxko katnehek elának aksok sempelakkaso agweta' aptaha enxoho mey'asáxma? Cháxa ektahakxa axta apkexpáncháseykpo énxet'ák xa.

¹⁷ Apkelmaxneyakxók axta makham énxet'ák ma'a énxet apteme axta meyke apakta'ák. Aptahak axta apcháneya s'e: —¿Háxko etnehek exének xép ma'a, hakte apwetáseykxek kaxwoxma? Aptahak axta apchátegmowágko énxet kaxwé apweteykekxaxma s'e: —Ekxénchek ko'o aptaha Dios appeywa aplegaso m'a.

¹⁸ Apya'ásekmek axta eyke énxet'ák judíos aptéma meyke apakta'ák xa énxet nak, keñe anhan apwetákxoxma, wokmók axta anhan apkeláneyeykha enchána,

¹⁹ aptahak axta anhan apkelmaxneyeyncha'a enchána s'e: —¿Kélketcheya m'a? ¿Kélxeyenmeya kéxegke aptéma meyke apakta'ák sekxo' apteyékmo m'a? ¿Háxko ektahakxa apkepwagko nak kaxwo' apwetákxoxma?

²⁰ Entahak axta elátegmowágko enchána s'e: —Negya'ásegkok negko'o aptaha egketche m'a, negya'ásegkok nahan aptéma meyke apakta'ák sekxo' apteyékmo;

²¹ wánxa aksa magya'ásegko negko'o ektahakxa nak apweteykekxaxma, magya'ásegkok nahan énxet ektaha apwetáseykekxaxma. Kólmaxneyha m'a; apwányam, apwanchek eltennaksohok apagko' ektahakxa apweteykekxaxma.

²² Cháxa ektahakxa axta eyátegmoweyak enchána eyeka énxet'ák xa, hakte hawók axta mók apkelpakmeyesma énxet'ák judíos apmoko elántekkesek énxet'ák kañe' apchakneykekxexa ektahakxa enxoho apkelxeyenma Jesús aptaha Mesías.

²³ Ekeso eñamakxa ektaha axta enchána eyátegmowágko s'e: “Kólmaxneyha m'a, apwányam aptahak.”

²⁴ Apcháneyáha axta makham énxet'ák fariseos xa énxet apteme axta meyke apakta'ák. Entahak axta amya'a apcháneyákpo s'e: —Hẽltennés hana negko'o ekmámnaksoho agko' nápakto' Dios. Negya'ásegkok negko'o aptaha mey'asáxma m'a énxet nak.

²⁵ Aptahak axta apchátegmowágko énxet se'e: —May'ásegkok ko'o, mey'asáxma kexaha, háwe esenhan. Wánxa aksa sekya'ásegkoho ko'o m'a sekteme axta meyke ahakta'ák, keñe kaxwo' sekwetákxoxma.

²⁶ Aptahak axta apkelmaxneyákxoho makham se'e: —¿Háxko axta aptemésesakxa apwetáseykxoxma?

²⁷ Aptahak axta apchátegmowágko énxet kaxwé apweteykekxaxma s'e: —Nano' xeyk seltennasa kéxegke, akke kólyahákxohok sekpeywa. ¿Yaksak ektaha kéltamho nak altennásekxohok makham? ¿Kélmokók enxeykel'a kéxegkáxa kólyetlakxak Jesús?

²⁸ Keñe axta kélwanyeyncha'a xa énxet nak. Entahak axta amya'a apcháneyákpo s'e: —Xép nak apteme apyetlo xa énxet nak, negko'o eyke nenteme negyetlo Moisés.

²⁹ Negya'ásegkok negko'o m'a appakhetchesama axta Dios Moisés; akke agya'ásegkok negko'o apkeñamakxa m'a énxet nak, magya'ásegkok nahan apteyapmakxa.

³⁰ Aptahak axta apchátegmowágko énxet se'e: —¡Neykel'a kólya'ásegkok apteyapmakxa m'a, keñe nak ko'o seteyásekxoxma!

³¹ Negya'ásegkok negko'o megyaháxenmo cha'a Dios aksok apkelmaxnagko m'a énxet'ák melya'asáxma nak; wánxa aksa yeyxhok Dios aksok apkelmaxnagko m'a énxet'ák ektaha nak apkelpeykesamo, cham'a apkeláneyol'a Dios apmopmenyého.

³² Megkañamáxche makham exénakpok xama énxet eteyásekxaxma énxet apteme enxoho meyke apakta'ák sekxo' apteyékmo.

³³ Axta agkok yenyamak Dios xa énxet nak, mopwanchek axta elának xama aksok.

³⁴ Aptahak axta makham apcháneya énxet'ák fariseos kaxwé apweteykekxaxma s'e: —Xép apteme apteyam yetlo ekyawe mey'asáxma. ¿Yaksak ektaha apmoko nak hẽlxekmósek negko'o? Keñe axta kéltekkesa kañe' kélakneykekxexa.

Enxet apteme nak máxa meyke apakta'ák

³⁵ Apleg'ak axta amya'a Jesús kéltekkesa kañe' kélakneykekxexa énxet kaxwé apweteykekxaxma axta. Xama axta apwet'a m'a, aptahak axta apkelmaxneyeyncha'a s'e: —¿Ya ey'ásekmok xép ma'a ektaha nak Apketche énxet?

³⁶ Aptahak axta apchátegmowágko énxet se'e: —Wese', héltennés hana ko'o aptémakxa m'a énxet nak, yakwayam enxoho ko'o atnehek may'áseyam.

³⁷ Aptahak axta apchátegmowágko Jesús se'e: —Apwet'ak kaxwo' xép ma'a nenxéna nak: ko'o neykhe m'a, neykhe so appakhetchásencha'a nak xép.

³⁸ Keñe axta apkeltekxeya aptaknák apkenmágkaxa Jesús xa énxet nak. Aptahak axta apcháneya s'e: —Wese' may'ásekmok kaxwo' ko'o exchep.

³⁹ Keñe axta aptaha appakmeta Jesús se'e: —Ekwa'ak axta ko'o keso náxop yakwayam enxoho atnehek selyekpelchémo énxet'ák, yakwayam enxoho anhan étekxaxma m'a énxet apteme nak meyke apakta'ák, yakwayam enxoho nahan etnekxak meyke apakta'ák ma'a énxet ekha nak apakta'ák.

⁴⁰ Xama axta apkelleg'a nápakha fariseos ektaha axta apheykha xamo' Jesús, aptahak axta apkelmaxneyeyncha'a s'e: —¿Meyke egakta'ák enxeykel'a anhan negko'o xa?

⁴¹ Aptahak axta apchátegmowágko Jesús se'e: —Meyke kélakta'ák axta agkok kéxegke, megkólsexnánexchek axta eñama kéllané megkólya'asáxma. Wánxa agkok, kélxénchek eyke kéxegke kélteme ekha kélakta'ák, cháxa keñamak kéltaha nak kélsexnánémaxche kéxegke xa.