SAN JUAN 3 - Lengua Sur (Enxet) Nuevo Testamento

Jesús tén han Nicodemo

¹ Apheyk axta xama fariseo apwesey axta Nicodemo, énxet ekha kéláyo nepyeseksa judíos axta m'a.

² Yáktések axta aptaha meyk'a Nicodemo Jesús. Aptahak axta apcháneya s'e: —Sẽlxekmóso, negya'ásegkok negko'o aptaha exchep Dios apcháphaso yakwayam hẽlxekmósak negko'o, hakte méko kawának kalának ma'a aksok sempelakkaso agweta' apkelana nak xép, cham'a metnaha enxoho apxegexma Dios.

³ Aptahak axta apcháneya Jesús se'e: —Agkok etnahákxak énxet kaxwé apteyam, mopwanchek étak ma'a aptémakxa nak Wese' apwányam Dios.

⁴ Aptahak axta Nicodemo apkelmaxneyeyncha'a s'e: ¿Háxko katnehek etnekxak kaxwé apteyam énxet aptaha enxoho apwányamo? ¿Apwanchek enxeykel'a etaxnekxak egken awáxok, yakwayam enxoho etnekxak makham kaxwé apteyam?

⁵ Aptahak axta apchátegmowágko Jesús se'e: —Agkok etnahak énxet kaxwé apteyam eñama nak yegmen tén han ma'a eñama nak Espíritu, mopwanchek etxek ma'a aptémakxa nak Wese' apwányam Dios. Nakso' xa sektahakxa nak sekpeywa seyáneya exchep.

⁶ Egyap cha'a kañék sentekkeso negko'o nenteme nak énxet, keñe m'a espíritu apkeñama nak Dios egkések cha'a ekyennakte espíritu egagkok nak.

⁷ Ná etnatches sektahakxa nak seyáneya exchep: ‘Kélyókxoho cha'a kéméxchek kóltemekxak kaxwé kélteyam.’

⁸ Kaxchahámha cha'a exchahayam ekmokókxa enxoho kaxchaháma', eñak eykhe exchep ekpáwá empehek, mey'asagkek eyke eñamakxa, mey'asagkehek nahan ekmahágkaxa. Cháxa ektémakxa nak han ma'a énxet apteme nak kaxwé appaleyam eñama Espíritu.

⁹ Aptahak axta makham Nicodemo apkelmaxneyákxoho s'e: —¿Háxko katnehek, katnehek xa ektaha nak?

¹⁰ Apchátegmowágkek axta Jesús, aptahak axta s'e: —Xép apteme apkelxekmóso énxet'ák Israel, ¿ya ey'ásegkok xa ektéma nak?

¹¹ Nenxénchek cha'a negko'o m'a negya'áseykegkoho nak, nenxénchek nahan cha'a m'a aksok negwetayo nak; kélya'áseykmek eyke kéxegke nentémakxa nak cha'a neltennaso kéxegke. Nakso' xa sektahakxa nak seyáneya exchep.

¹² Kélya'ásekmek agkok seltennasa enxoho kéxegke aksok eleñama nak keso náxop, kólya'asók nahan seltennasa enxoho m'a aksok eleñama nak néten.

¹³ “Méko xama énxet apmeyeykekxo m'a néten, wánxa m'a apwéweykento axta apkeñama néten, cham'a aptaha nak Apketche Enxet.

¹⁴ Kólya'ásekxak sat nahan néten aptaha nak Apketche Enxet, ekhawo m'a aptahakxa axta Moisés apya'asa néten yéwa yókxexma meykexa énxet,

¹⁵ yakwayam enxoho étak elyennakte apnenya'ák apyókxoho énxet'ák ektaha nak apteme melya'áseyam ma'a.

Dios apkelásekhayo énxet'ák apheykha nak keso náxop

¹⁶ “Awanhek axta apkelásekhayo Dios énxet'ák apheykha nak keso náxop, apmések axta Apketche apwánxa xama apagko', yakwayam enxoho megyetsepek ma'a ektahakxa enxoho apteme mey'áseyam, wánxa aksa étak ma'a ekyennakte apnenyek megkatnegwayam enéxa nak.

¹⁷ Hakte axta yáphásak Apketche Dios keso náxop yakwayam enxoho elsexnenak énxet'ák apheykha nak keso náxop, wánxa agkok, apcháphásek axta yakwayam elwagkasek teyp.

¹⁸ “Negko'o ektahakxa enxoho nenteme magya'áseyam Dios Apketche mantehek nensexnánemaxche; keñe m'a énxet ektahakxa enxoho apteme apya'áseyam aptemék apsexnánémap eñama apya'áseyam ma'a Dios Apketche aptaha nak wánxa xama.

¹⁹ Apkelsexnánemakpek ma'a énxet'ák apkelya'áseyam nak, hakte, xama axta ekwa'a elseyexma keso náxop, wánxa axta aksa apkelapmeñého m'a ekyaktesóxma, mopmenyék axta elseyexma, hakte aksok ekmaso axta apkeláneykegkok.

²⁰ Apyókxoho énxet ektahakxa enxoho apkeláneyak aksok ekmaso etaknók ma'a elseyexma nak, mépetchegwomok nahan elseyexma, yakwayam enxoho megkapekkenchásekxék yáxñakxoho m'a aksok ekmaso apkelané nak.

²¹ Keñe m'a énxet'ák ektaha nak apkelyetlo amya'a ekmámnaksoho ey'ókxak cha'a xa elseyexma nak, yakwayam enxoho kataxchek ekhawo Dios apmopmenyého m'a ekyókxoho aksok apkeláneyak nak.

Juan Bautista apxéneykekxoho makham Jesús

²² Apmeyákxeyk axta Jesús yetlo apkeltámeséyak yókxexma Judea natámen xa, cham'a aphámxa axta yetlo apkeltámeséyak apyakpasásegko yegmen énxet.

²³ Axta anhan apyakpasásegkok yegmen énxet Juan ma'a nátegma Enón, keto' axta nategma Salim ma'a, hakte awanhek axta yegmen ma'a; elmeyekxohok axta cha'a énxet ma'a, kélyakpasáseykegkek axta anhan yegmen.

²⁴ Cháxa ektahakxa axta amonye kélheseyam Juan sẽlpextétamakxa xa.

²⁵ Wánxa agkok nápakha Juan apkeltámeséyak axta eyke apkelátegmoweykpok xama énxet judío apxéna ektémakxa m'a sẽltemesáseykekxa nak negáxñeyo.

²⁶ Keñe axta apya'aweykto apkeltámeséyak Juan apkeltennasakto. Entahak axta amya'a apcháneyákpo Juan se'e: —Sẽlxekmóso, apyakpasásegkek kaxwo' yegmen énxet'ák ma'a aptaha axta exchep apxegexma wátsam Jordán, cham'a énxet sẽltennasa axta exchep. Apxámok nahan énxet apyetleykekxa.

²⁷ Aptahak axta Juan apkeláneya s'e: —Megkeytek negko'o xama aksok mehegmésa enxoho Dios.

²⁸ Tásek axta kéllegé kéxegke sekxéna ko'o matnaha Mesías. Ko'o eyke sekteme seyaphásamáxche amonye yakwayam ewak ma'a.

²⁹ Enxet ekha nak appagkanma apteme appagkanamap yakwayam kalyamhápok; exek nahan kaxwé elyamhopma apteme pók ma'a, eñak nahan aptahakxa enxoho appeywa m'a, awanhek nahan katnehek ekpayheykekxa apwáxok apleg'a enxoho aptahakxa appeywa. Cháxa setnahakxa nak ko'o xa, awanho' agko' kaxwo' ekpayheykekxa ewáxok.

³⁰ Kayawagkok sat nahan kélteme kéláyo m'a, keñe sat ko'o kaweywentak kélteme seláyo.

Enxet apkeñama néten

³¹ Enxet apkeñama nak néten apteme apyeykhágweykmoho apyókxoho énxet, keñe m'a énxet apkeñama nak náxop apteme apkeñamakxa apagko' keso náxop, exének nahan ma'a aksok eleñama nak keso náxop. Keñe m'a énxet apkeñama nak néten apteme apyeykhágweykmoho apyókxoho énxet,

³² exének nahan ma'a aksok apwetaya nak, tén han ma'a aplegaya nak; wánxa agkok, kólya'asók eyke m'a ektahakxa enxoho aksok apxeyenma.

³³ Yetneyk agkok xama énxet apteme mey'áseyam aptahakxa appeywa, nakso' etnésesek ektaha ekmámnaksoho m'a aptémakxa nak appeywa Dios;

³⁴ énxet aptaha nak Dios apcháphaso, wánxa aksa exének ma'a amya'a eñama nak Dios, hakte memyágwakxék egkések Dios ma'a Espíritu apagkok.

³⁵ Apchásekhayók Apketche Dios, apmések axta nahan apmopwána yakwayam elának ekyókxoho aksok.

³⁶ Negko'o ektahakxa enxoho nenteme magya'áseyam Dios Apketche, keytek ekyennakte egnenyek megkatnegwayam enéxa; keñe m'a ektahakxa enxoho apya'áseyam Dios Apketche mexkeyk sat xa ekyennakte egnenyek nak, wánxa sat exkak ma'a ekmaso senlegasáseykegkoho nak Dios.