SAN JUAN 15 - Lengua Sur (Enxet) Nuevo Testamento

Anmen yámet ekmámnaksoho

¹ “Ko'o sekteme anmen yámet ekmámnaksoho agko' ektaha nak aptakmelcheso m'a Táta.

² Méko agkok ekyexna xama ahaktog ektaha nak sépetcheyo ko'o, eyaktének ma'a Táta; keñe yaxñásesek ma'a ahaktog ekhakxa enxoho ekyexna yakwayam enxoho kaxámagkok ekyexna.

³ Kéltemék kaxwo' kéxegke kéláxñeyo eñama m'a sekpeywa sektahakxa axta seláneya kéxegke.

⁴ Kóllenxanmoho kélteme selyepetcheyo ko'o ekhawo ektémakxa nak ko'o selenxáneykmoho sekyepetcheyo kéxegke. Yawanchek keyxek anmen yámet aktog megkeypetcha'a enxoho m'a awhak; ekhawo nak han kéxegkáxa, megkólwanchek kóllának xama aksok megkóltaha enxoho selyepetcheyo ko'o.

⁵ “Ko'o sekteme anmen yámet, kéxegke eyke kélteme aktegák xa anmen yámet nak. Enxet ektahakxa enxoho apkelenxáneykmoho apteme sépetcheyo ko'o, xámok katnehek apkelané aksok ektémol'a ekxákma ekyexna anmen yámet, cham'a sektaha enxoho ko'o xa sekyepetcheyo. Megkólwanchek kéxegke kóllának xama aksok méko enxoho ko'o.

⁶ Enxet ektahakxa enxoho mehepetcheyo ko'o kóltekkesek sat, máxa sat etnehek ma'a yámet aktog ekyamayel'a, cham'a kéláncheseykekxohol'a keñe kólchexak neyseksa táxa.

⁷ “Kéllenxanakmók agkok kélteme selyepetcheyo ko'o, tén han kéllenxanakmoho enxoho kélyetlo m'a ektémakxa nak nelxekmowásamáxche eñama ko'o, kólmaxna aksok kélámenyexa enxoho, kólxawak sat kéxegke.

⁸ Kótaxchek cha'a ektémakxa apcheymákpoho Táta, cham'a ekwetáxko enxoho ekxáma aksok kéllané kéxegke, kéltemék agkok xa, kóltehek kéxegke ekmámnaksoho seltámeséyak.

⁹ Elásekhayok ko'o kéxegke ekhawo ektémakxa nak seyásekhayo ko'o Táta; kóllenxanmoho kélteme selyaheykekxoho ko'o yakwayam enxoho alásekhohok ko'o kéxegke.

¹⁰ Kélyahakxók agkok kéxegke m'a seltémókxa nak kóltehek, alenxanmohok sat nahan ko'o xa selásekhayo kéxegke, ekhawo ektémakxa nak ko'o selyaheykekxoho m'a apkeltémókxa nak atnehek Táta, apkelenxanakmok nahan apteme seyásekhayo.

¹¹ “Ektemék ko'o seláneya kéxegke xa yakwayam enxoho kalpayhekxak kélwáxok xamo' ko'o, yakwayam enxoho nahan kayawhok agko' elpayheykekxa kélwáxok.

¹² Keso seltémókxa nak kóltehek kéxegke s'e: Kólásekhaxkoho ekhawo ektémakxa nak ko'o selásekhayo kéxegke.

¹³ Cha'a negásekhayo ekyawe agko' ma'a negmáheyo nak ótsapok ekyanmaga egnámokkok.

¹⁴ Kéllanak agkok kéxegke m'a seltémókxa nak kóltehek, kélteme kéxegke enámokkok.

¹⁵ Massék ko'o sekxéna kaxwo' kéxegke kéltaha seláneykha, hakte énxet ektaha nak kélásenneykha mey'asagkek ma'a aksok apkelané nak wese' apagkok. Ekxénchek ko'o kéltaha kéxegke enámokkok, hakte elya'asásegwokmek kéxegke m'a ekyókxoho aptémakxa axta seyenagkama ko'o Táta.

¹⁶ Háwe axta kéxegke selyéseykha ko'o. Ko'o axta eyke selyéseykha kéxegke, ekmések axta ko'o kéltamheykha kéxegke seltamho kólxog yakwayam kayawhok agko' kéllané aksok eltakmela eñama kéltamheykha, cham'a nentamheykha megkamassegwayam nak. Keñe sat egkések kéxegke Táta ekyókxoho aksok kélmaxneyakxa enxoho eñama ko'o sekwesey.

¹⁷ Keso seltémókxa nak cha'a kóltehek kéxegke s'e: Kólásekhaxkohok cha'a.

Enxet'ák apkelyetleykekxa ektémakxa náxop aptaknagko Jesús yetlo apkeltámeséyak.

¹⁸ “Aptaknókek agkok kéxegke m'a énxet apkelyetleykekxa nak ektémakxa keso náxop, kólya'ásegwakxoho sat setaknagkama axta nahan ko'o xa emonye.

¹⁹ Kéltemék axta agkok kélyetleykekxa kéxegke ektémakxa nak keso náxop, yásekhohok axta énxet apkelyetleykekxa nak ektémakxa keso náxop, ekhawo ektémakxa nak cha'a apkelásekhayo m'a ektaha nak apnámokkok. Wánxa agkok elyesáha axta eyke ko'o kéxegke nepyeseksa énxet'ák apkelyetleykekxa nak ektémakxa keso náxop. Ekeso eñamakxa aptaknawe nak kéxegke xa énxet'ák nak, hakte megkóltahak kaxwo' kélyetleykekxa kéxegke apkeltémakxa nak énxet keso náxop.

²⁰ Kaxénwakxoho kélwáxok sektaha exchek seláneya kéxegke s'e: ‘Enxet ektaha nak kélásenneykha metnehek apyeykhágweykmoho m'a wese' apagkok.’ Elyakmáseykha axta agkok ko'o, kólmenxenmakha sat nahan kéxegkáxa; aptemék axta agkok apkelyaheykekxoho sekpeywa énxet, elyahakxohok sat nahan kélpeywa kéxegke.

²¹ Etnésesek sat kéxegke énxet'ák ekyókxoho xa, ko'o eñamakxa, hakte melya'ásegkok énxet'ák ma'a aptaha axta seyáphaso ko'o.

²² “Axta agkok axegakmok ko'o yakwayam altennasha xa énxet'ák nak, méko axta katnehek apkelsexnánémap. Kaxwo' eyke mopwanchek exének mey'ásegko m'a aksok apkelané nak ektaha mey'asáxma;

²³ hakte énxet ektahakxa enxoho setaknagko ko'o, etaknók nahan ma'a Táta.

²⁴ Méko axta katnehek apkelsexnánémap xa énxet'ák nak, cham'a malana enxoho ko'o m'a aksok meláneya nak xama énxet; apwet'ak eykhe nahan énxet'ák selana ko'o xa aksok nak, akke yahaxnak setaknawe ko'o, tén han aptaknawe m'a Táta.

²⁵ Temék ekyókxoho xa, hakte megkatnehek megkatné ektémakxa nak eknaktáxésamaxche segánamakxa apagkok xa énxet'ák nak, ektéma nak ekpeywa s'e: ‘Etaknókek ko'o énxet'ák meykexho eñamakxa.’

²⁶ “Apxegakmek sat agkok ma'a Apmasma kéxegke peya nak wáphásesek, aptaha nak Espíritu apmámnaksoho apkeñama nak ma'a aphakxa nak Táta, sat etnehek apxeyenma sekwesey ko'o m'a.

²⁷ Kéxegke sat nahan kóltehek kélxeyenma sekwesey, hakte selxegexma'a axta ektemék kéxegke sekxo' agko' sekmoma sektamheykha.