SAN JUAN 13 - Lengua Sur (Enxet) Nuevo Testamento

Jesús apkelyenyéseso apmagkok apkeltámeséyak

¹ Apya'ásegkok axta Jesús ekwokmo ekhem yakwánxa kamaskok apha keso náxop, yakwayam enxoho exnakxak makham xamo' Apyap, amonye ekwayam ekhem melwagkayam axta énxet'ák judíos, cham'a apkeltéma axta Pascua. Apkelásekhayók axta cha'a Jesús ma'a énxet'ák ektaha axta apkelxegexma'a keso náxop, cháxa ektémakxa axta apkelásekhayo ekwokmoho néxa apha xa.

^2-4 Pekkenchesek axta apwáxok Judas kelyekhama' yakwayam yának kólpelakkasesek emakpok Jesús, cham'a Judas aptaha axta Simón Iscariote apketche. Apya'ásegkok axta Jesús aptaha apkeñama m'a aphakxa nak Dios tén han peya emyekxak makham ma'a aphakxa nak Dios, apya'ásegkok axta anhan Jesús apmésama Apyap apmopwána elának ekyókxoho aksok; apkempákxeyk axta néten Jesús nekha mésa neyseksa aptéyak, aplekkek axta apchaklamap keñe axta apteta nepxet apáwa nenleklamol'a egyempehek natámen negyakpaso yegmen.

⁵ Keñe axta apyetma yegmen sokpayhe ekwányam, apkelyenyésesek axta apmagkok apkeltámeséyak. Axta anhan apmáha apkelyamasásekxo apmagkok apkeltámeséyak ma'a apáwa nenleklamol'a egyempehek natámen negyakpaso, cham'a apteta axta nepxet.

⁶ Xama axta nahan peya elyenyésesek apmagkok Jesús ma'a Simón Pedro, aptahak axta Simón Pedro s'e: —¿Wese', peya ko'o xa helyenyésesek emagkok?

⁷ Aptahak axta apchátegmowágko Jesús se'e: —Mey'ásegkok makham xép se'e selana nak, natámen sat eyke ey'asagkoho'.

⁸ Aptahak axta apchátegmowágko Pedro s'e: —Magwohok ko'o helyenyésesek emagkok xép. —Agkok alyenyesásak xép apmagkok, mopwanchek etnehek xép énxet ahagkok, —axta aptahak apchátegmowágko Jesús.

⁹ Aptahak axta Simón Pedro apcháneya Jesús se'e: —Wese', néhelyenyéses aksa wánxa emagkok, helyenyéses sat nahan emék tén han epátek.

¹⁰ Wánxa agkok, aptahak axta apchátegmowágko Jesús se'e: —Enxet ektahakxa enxoho kaxwo' appencheso apyakpaso yegmen, apmagkok aksa megkatnehek melyenyéyáseykekxoho, hakte káxñekxoho ma'a ekyókxoho apyempehek. Kéláxñawo' kéxegke, háwe eyke kélyókxoho kéláxñeyo.

¹¹ Aptahak axta appeywa Jesús se'e: “Háwe eyke kélyókxoho kéláxñeyo”, hakte apya'ásegkok axta Jesús ma'a énxet apmáheyo axta etlakkasesek yának emakpok.

¹² Apkelántaxneykxek axta apkelántaxno Jesús natámen apkelyenyéseso apmagkok apkeltámeséyak, aphákxeyk axta makham nekha mésa. Aptahak axta apkeláneya apkeltámeséyak se'e: —¿Kélya'ásegkoya sektemésesakxa nak kéxegke?

¹³ Sẽlxekmóso cha'a kóltehek helwónmakha kéxegke tén han heltehek cha'a Wese', payhawók heltehek, hakte ko'o sekteme m'a.

¹⁴ Elyenyésesek xeyk kélmagkok kéxegke, ko'o sektaha nak selxekmóso, sektaha nak han Wese', kéméxchek nahan kéxegkáxa kólyenyésesek cha'a apmagkok kélmók.

¹⁵ Ekxekmósek ko'o yakwánxa kóltehek cha'a kéxegke, yakwayam enxoho kóllának kéxegkáxa ekhawo xa selana exchek ko'o.

¹⁶ Enxet ektaha nak kélásenneykha metnehek cha'a apyeykhágweykmoho wese' apagkok, keñe m'a énxet ektaha nak kéláphaso metnehek cha'a apyeykhágweykmoho m'a ektaha nak apcháphaso.

¹⁷ Kélyekpelchawók agkok kéxegke xa aksok selana nak, kéllanak agkok nahan, kéleñémo sat kóltehek kéxegke.

¹⁸ “Akke ko'o axénak kélyókxoho kéxegke, hakte ekya'ásegkok ko'o m'a ektaha nak selyéseykha. Megkatnehek nahan megkatné ektémakxa nak eknaktáxésamaxche s'e: ‘Etaknaweykxeyk ko'o énxet sektóko nak xamo' sekto.’

¹⁹ Nano' axta seltennasa kéxegke xa yakwayam enxoho mehelya'asók sektaha ko'o mamassegwayam, cham'a ektaha enxoho xa.

²⁰ Enxet ektahakxa enxoho apchápeykha m'a ektahakxa enxoho seyáphaso ko'o, heyahapmakha nahan ko'o xa; keñe m'a énxet ektahakxa enxoho seyápeykha ko'o, yáhapmakha nahan ma'a ektaha nak seyáphaso ko'o.

Jesús apxeyenma Judas peya etlakkasesek yának emakpok

²¹ Aplegágkok axta elapwayam apwáxok Jesús natámen apteme appeywa xa. Aptahak axta nahan appékáso apkeltennaso apkeltámeséyak se'e: —Hetlakkasesek sat yának amaxchek kélxama kéxegke, nakso' xa sektahakxa nak sekpeywa seláneya.

²² Apkelanawók axta pók apkeltámeséyak apkelleg'a xa, yetlo melya'áseyak ma'a ektaha axta apxénamap.

²³ Apyepetcha'awók axta xama apkeltámeséyak Jesús neyseksa aptéyak, cham'a ektaha axta apchásekhayókxa,

²⁴ apyexákpók axta Simón Pedro apkeltamho elmaxneyha ektahakxa aksok apxeyenma Jesús ma'a pók ektaha axta apyepetcheyo Jesús.

²⁵ Keñe axta apyepetchegwokmoho apagko' Jesús ma'a ektaha axta apchásekhayókxa, aptahak axta apkelmaxneyeyncha'a s'e: —Wese' ¿yaksa m'a apxéna exchek xép?

²⁶ Aptahak axta apchátegmowágko Jesús se'e: —Ayásesek sat ko'o pan nápakha, keñe m'a ektahakxa enxoho sekméso, cham'a sekxéna exchek ma'a. Yetlókók axta apyáseso pan nápakha Jesús, keñe axta apmésa Judas, Simón Iscariote apketche.

²⁷ Xama axta apxaka Judas pan nápakha, yetlókók axta ektaxno apwáxok Satanás. Aptahak axta Jesús apcháneya Judas se'e: —Epekhaksoho sat elának ma'a aksok apmoko nak elána'.

²⁸ Wánxa agkok, axta eyke elyekpelchak xama enxoho m'a ektaha axta aptómo xamo' nekha mésa, cham'a aptahakxa axta appeywa Jesús apcháneya Judas.

²⁹ Nápakha apkelxegexma'a axta apkeneyk eltamhok Jesús etegyek aksok Judas yakwayam kólmaha m'a neyseksa apchakneykekxa énxet ekhem mólwagkayam nak, énxet meyke aksok apagkok axta nahan apkeneyk eltamhok elmésagkok aksok, hakte selyakye axagkok axta aptakmelcheso m'a Judas.

³⁰ Xama axta apma Judas pan nápakha, aptekkek axta. Yaktések axta m'a.

Axnagkok kéltémókxa antehek

³¹ Aptahak axta appeywa Jesús natámen apteyapma Judas se'e: —Wetáxchek kaxwo' ektémakxa apcheymákpoho m'a ektaha nak Apketche énxet, keñe nahan ekwetáxko ektémakxa apcheymákpoho m'a Dios eñama xa.

³² Apxekmósek agkok ektémakxa apcheymákpoho Dios ma'a ektaha nak Apketche énxet, keñe sat nahan Dios exekmósek ektémakxa apcheymákpoho m'a ektaha nak Apketche énxet; kaxwo' sat nahan henxekmósek.

³³ Etchek selásekháyo, megkawegkók sat cha'a ko'o sekha kélnepyeseksa kéxegke. Hélchetmok sat kéxegke, hawók ektahakxa axta seláneya énxet'ák judíos se'e sektahakxa nak seláneya kéxegke: Megkólwanchek sat kólmahagkok ma'a yakwánxa nak amhagkok ko'o.

³⁴ Eltennásek kéxegke s'e axnagkok seltémókxa nak kóltehek: Kólteme cha'a kélásekhamaxkoho. Kólteme cha'a kélásekhamaxkoho ekhawo ektémakxa nak ko'o selásekhayo kéxegke.

³⁵ Kéltemék agkok kélásekhamaxkoho kélyókxoho kéxegke, apyókxoho énxet sat elya'ásegwók kéltaha kéxegke seltámeséyak.

Jesús apxeyenma Pedro yakwayam mexének apwesey

³⁶ Aptahak axta Simón Pedro apkelmaxneyeyncha'a Jesús se'e: —Wese', ¿háxko yakwánxa emhagkok? —Mopwanchek hétlók xép ma'a yakwánxa nak amhagkok, —axta aptahak apchátegmowágko Jesús—, wánxa agkok, axayók sat eyke hemhágkakxak xép.

³⁷ Aptahak axta apchátegmowágko Pedro s'e: —Wese', ¿yaksak ektaha apxéna nak mowanchek eytlók keso kaxwo' nak? Ekmakawók ko'o agkések sekyókxoho ekyanmaga exchep.

³⁸ Aptahak axta apchátegmowágko Jesús se'e: —¿Naksoya apmakawo ényók apyókxoho seyanmaga ko'o? Antanxo sat katnehek ekpáwá tat'a mexeyenma sekwesey exchep. Nakso' xa sektahakxa nak seyáneya exchep.