SAN JUAN 11 - Lengua Sur (Enxet) Nuevo Testamento

Lázaro apketsapma

¹ Apheyk axta xama énxet apháxamap apwesey Lázaro, apteme axta apkeñamakxa apagko' ma'a Betania, María eyókxa, tén han ma'a yáxeg ekwesey axta Marta.

² Lázaro axta apyáxeg María, cháxa expakhásesa axta sokmátsa apmagkok Wese' egegkok xa keñe axta anhan ektaha áwa' elyamasáseykxo apmagkok.

³ Cháphásek axta ekpeywa eltamho kóltennásekxak Jesús xa ánet Lázaro apkelyáxeg nak, keltamhok axta katnehek amya'a yánékpok Jesús se'e: —Wese', negmasé exnek entahak apxegexma apagko'la'a

⁴ Xama axta apleg'a Jesús xa, aptahak axta s'e: —Háwe apháxamap yakwayam kakhek Lázaro, Dios apcheymákpoho eyke yakwayam kataxchek ektaha Lázaro xa, tén han yakwayam kataxchek ma'a ektémakxa nak apcheymákpoho Dios Apketche.

⁵ Yásekhohok apagko' axta eykhe Jesús ma'a Marta, tén han ma'a yáxeg, tén han ma'a Lázaro,

⁶ wánxa agkok, xama axta kéltennasa Jesús apháxekpo Lázaro, aphákxók axta makham ánet ekhem ma'a aphakxa axta.

⁷ Keñe axta aptaha apkeláneya apkeltámeséyak Jesús se'e: —Olmeyekxak makham ma'a Judea.

⁸ Aptahak axta apkeltámeséyak apcháneya Jesús se'e: —Sẽlxekmóso, kaxwo' axta agkok apmokók yakhek xép énxet'ák judíos ma'a yókxexma nak, cham'a peya axta kólyetnak meteymog, ¿apmokóya emyekxak makham ma'a?

⁹ Aptahak axta apkeláneya Jesús se'e: —¿Háweya nakso' doce horas xama ekhem? Apxegkek agkok enxama ekhem, metlapmehe', hakte étak elseyexma ekyetna nak keso náxop;

¹⁰ Wánxa agkok, apxegkek agkok xama énxet axta'a, etlapmok, hakte méko katnehek elseyexma.

¹¹ Apyepetchesekmók axta anhan apxeyenma Jesús se'e: —Aptenchek axta nenteme egmók Lázaro, axátekhásekxak sat eyke ko'o.

¹² Aptahak axta apkelátegmowágko apkeltámeséyak se'e: —Wese', apxénchek agkok xép aptena Lázaro, cháxa magkenatcheso peya etakmelwók xa.

¹³ Axta eykhe apxénak Jesús apketsapa m'a Lázaro, keñe axta apkeltámeséyak ekxéna apwáxók ma'a nentémakxal'a antének.

¹⁴ Aptakmelchásók axta apkeltennaso Jesús apkeltámeséyak. Aptahak axta s'e: —Apketsekek Lázaro.

¹⁵ Payhekxeyk nahan ko'o ewáxok maxna m'a, hakte cháxa yakwayam kapasmok kéxegke xa, yakwayam enxoho megkólya'asók. Anteyánegwakxohok sat eyke.

¹⁶ Aptahak axta apkelpakhetchesa apkelxegexma'a Tomás, apkeltamhomakpo axta Apkánet Appalleykmoho s'e: —Nók negko'o xa, yakwayam enxoho ótsaphok xamo' Jesús.

Jesús apteme senxátekháseyam tén han segméso ekyennakte egnenyek

¹⁷ Xama axta apwákxo Jesús ma'a, apwetágweykxeyk axta ekwokmo hawók nekha ekhem kélatawanya Lázaro.

¹⁸ Keto' axta Betania m'a Jerusalén, tres kilómetros axta m'a;

¹⁹ apxámok axta judíos apteme meyk'a Marta tén han María, yakwayam enxoho elpeykesásekxak awáxók eñama ellapwámeyak apketsapma yepma.

²⁰ Xama axta ekleg'a amya'a Marta apxegakmo Jesús kelanyexágkek axta, keñe axta María ekhákxo m'a axagkok.

²¹ Entahak axta Marta eyáneya Jesús se'e: —Wese', apheyk axta agkok xép se'e megyetsepek axta ko'o eyepma.

²² Ekya'ásegkok eyke ko'o peya egkések makham xép Dios ekyókxoho aksok apkelmaxneyakxa enxoho.

²³ Aptahak axta apchátegmowágko Jesús se'e: —Exátekhágwók sat makham yepma.

²⁴ Entahak axta Marta eyáneya Jesús se'e: —Nakso', ekya'ásegkok ko'o peya exátekhágwók ma'a apnakxétekhágwokmo sat ma'a apkeletsapma axta, cham'a ekwokmo sat néxa ekhem.

²⁵ Keñe axta aptaha Jesús apcháneya Marta s'e: —Ko'o sekteme nennakxétekhágwayam tén han ekyennakte egnenyek. Enxet ektahakxa enxoho apteme mehey'áseyam ko'o, yetsapok sat eykhe, keynnakwók sat eyke apnenyek;

²⁶ keñe m'a apyókxoho énxet ektaha nak meletsapma apteme mehey'áseyam ko'o, meletsepek sat cha'a. ¿Yagkay'ásekmok xa?

²⁷ Entahak axta eyátegmowágko Marta s'e: —Wese', nakso' may'ásekmok xép aptaha Mesías Dios Apketche, cham'a apxénamakpo axta ewak keso náxop.

Jesús apkelekxagweykha nekha Lázaro takhaxpop apagkok

²⁸ Keltennásekxeyk axta yáxeg Marta ekwesey axta María natámen axta ekteme ekpeywa xa, entahak axta ekyexchásawo eltennasa s'e: —Exchek aphak Sẽlxekmóso á, apcháneyáha exchek.

²⁹ Ñohok axta empákxo néten María ekleg'a xa, xegkek axta ekteyánegwokmoho Jesús.

³⁰ Axta etaxnak makham Jesús ma'a nepyeseksa tegma apwányam; axta aphak ma'a ekwetágwánxa axta Marta.

³¹ Xama axta apwet'a énxet'ák judíos empákxo néten María tén han ekpekheyásawo ekteyapma, apyetlókek axta xa énxet'ák nak, cham'a appeykesáseykekxa axta awáxok apheyncha'a axta axagkok, apkeneykek axta kamyákxak takhaxpop yakwayam kalekxagwaha.

³² Xama axta ekwokmo María aphakxa Jesús, keltekxekwokmek axta atapnák xóp aphakxa. Entahak axta eyáneya s'e: —Wese', apheyk axta agkok xép se'e, megyetsepek axta eyepma ko'o.

³³ Xama axta apwet'a Jesús elekxagweyncha'a María tén han apkellekxagweyncha'a m'a énxet'ák judíos ektaha axta apkelyetlo María, teyekmek axta apwáxok Jesús, kelapwokmek axta anhan.

³⁴ Aptahak axta Jesús apkelmaxneyeyncha'a s'e: —¿Háxko axta kélatawanyakxa? Entahak axta amya'a apcháneyákpo s'e: —Wese', nók etyánegwomho.

³⁵ Apkelekxagweyha axta nahan Jesús.

³⁶ Aptahak axta apkelpakmeta énxet'ák judíos se'e: —¡Kóllano hana, yásekhoho apagko' nak axta eykel'a Lázaro xa!

³⁷ Aptahak axta apkelpakmeta nápakha énxet'ák se'e: —Cháxa énxet apwetáseykxo axta exma énxet meyke apakta'ák xa, ¿mopwancheya axta apkelana xama aksok yakwayam megyetsepek Lázaro?

Lázaro apxátekhágwayam

³⁸ Axta keynnak makham apwáxok Jesús apwokmo takhaxpop. Meteymog áxwa axta m'a, meteymog axta anhan kélapma átog nentaxnamakxa.

³⁹ Aptahak axta Jesús se'e: —Kóllek hana meteymog kélapma nak átog. Entahak axta Marta eyáneya Jesús se'e, cham'a ektaha axta apyáxeg ma'a énxet apketsapma axta: —Wese', aptahapchek ko'o nék, hawók nekha ekhem egwokmok apketsapma.

⁴⁰ Aptahak axta apchátegmowágko Jesús se'e: —Ektemék xeyk seyáneya, agkok hey'ásekmok, kótak sat Dios apcheymákpoho.

⁴¹ Kéllekkek axta meteymog kélapma átog, apkenmexawók axta néten Jesús, aptahak axta s'e: —Ekmések ko'o ekxeyenma ewáxok xép Táta, hakte apleg'awók xép selmaxnagko.

⁴² Ekya'ásegkok ko'o yeyxhok cha'a exchep selmaxnagko, ektemék eyke ko'o seyáneya exchep nápakta'awo' énxet apheyncha'a nak se'e, yakwayam enxoho kapasmok, yakwayam enxoho nahan mehey'ásemek aptaha exchep seyáphaso.

⁴³ Natámen apteme appeywa axta Jesús xa, aptahak axta apyennaktésawo appeywa s'e: —¡Lázaro, etyep xa!

⁴⁴ Aptekkek axta nahan énxet ektaha axta apketsapma, yetlo kélpextetmo apáwa, ekweykmoho apmék, tén han apmagkok, tén han ma'a nápát. Aptahak axta Jesús apkeláneya énxet'ák se'e: —Kólhexyawáses xa apáwa kélpextetma nak, kólho nahan exog.

Enxet apkelpakhetchásamákpoho yakwayam emok Jesús

⁴⁵ Axta keñamak apxáma judíos apteme mey'áseyam Jesús xa, cham'a ektaha axta elxegexma'a María, cháxa ektaha axta nahan apweteykegkoho ektahakxa aksok apkelané Jesús xa.

⁴⁶ Wánxa agkok nápakha énxet judíos axta eyke apkelmeyákxak aphágkaxa fariseos, apkeltennáseyha axta ektahakxa aksok apkelané Jesús.

⁴⁷ Keñe axta apchánchesákxo énxet'ák fariseos tén han apkelámha apmonye'e appasmo apkelmaxnéseso Dios énxet'ák apagkok ma'a kelwese'e ekha nak kéláyo. Aptahak axta apkelpakmeta s'e: —¿Háxko sat antehek negko'o? Xámagkek apkelané aksok sempelakkaso agweta' ma'a énxet nak.

⁴⁸ Neg'awók agkok apkelana xa, apxámok sat etnehek énxet apteme mey'áseyam, keñe sat elxegmak ma'a wese' apkelásenneykha apkeleñama nak Roma, etegkesak sat tegma appagkanamap egagkok, emasésak sat nahan ma'a negókxa nak.

⁴⁹ Apheyk axta xama énxet apwesey Caifás nepyeseksa xa énxet'ák nak, apkemha apmonye appasmo apkelmaxnéseso Dios énxet'ák apagkok axta xa, cham'a apyeyam axta. Aptahak axta apkeláneya apnámokkok se'e: —Megkólya'ásegkok kéxegke aksok,

⁵⁰ megkaxénak nahan kélwáxok kéxegke ektakmela yetsapok xama énxet ekyanmaga apyókxoho énxet, megkaxnók kólmasesók se'e apyókxoho énxet'ák apheykha nak negókxa.

⁵¹ Háwe axta appeywa apagko' Caifás aptaha appeywa xa, Dios axta eyke aptekkeseso appeywa, Cristo axta apxénak peya yetsapok apyanmaga apyókxoho énxet'ák judíos, hakte apkemha apmonye appasmo apkelmaxnéseso Dios énxet'ák apagkok axta Caifás, cham'a yeyam axta;

⁵² háwe axta apwánxa apagkok énxet'ák judíos apmáheyo etnehek apyanmaga Jesús, axta eyke nahan peyk yanchásekxak ma'a apyókxoho Dios apketchek ektaha nak apkexpakneykha keso náxop.

⁵³ Cháxa eyeynókxa axta ekhémo mók apkelpakmeyesma kelwese'e judíos apmoko yakhek Jesús xa ekhem nak.

⁵⁴ Ekeso eñamakxa apyexákpoho axta Jesús apweynchámeyncha'a nepyeseksa judíos, wánxa agkok aptekkek axta eyke m'a yókxexma Judea, axta apmeyákxak ma'a yókxexma meykexa énxet eyágketexa axta, cham'a nátegma keltéma nak Efraín. Aphákxeyk axta Jesús yetlo apkeltámeséyak ma'a.

⁵⁵ Chágketwokmók agko' axta ekhem melwagkayam axta énxet'ák judíos, cham'a apkeltéma axta Pascua, apxámok axta énxet apkelmeyákxo Jerusalén yakwayam elanagkok negaxñáseykekxoho nentémakxa nápakto' Dios amonye ekwayam xa ekhem Pascua nak, cham'a énxet'ák apkeleñama axta nepyáwa tegma apwányam Jerusalén.

⁵⁶ Apketamchek axta Jesús xa énxet'ák nak, aptahak axta cha'a apkelmaxneyeyncha'a pók kañe' tegma appagkanamap se'e: —¿Háxko ektahakxa elchetamso kélwáxok kéxegke? ¿Ewaya sat Jesús se'e ekhem mólwagkayam nak, mexegme' enxeykel'a?

⁵⁷ Apmések axta appeywa fariseos énxet'ák, tén han ma'a apkelámha apmonye'e nak appasmo apkelmaxnéseso Dios énxet'ák apagkok apkeltamho eltennásekxak énxet ektahakxa enxoho apya'áseykegkoho aphakxa Jesús, yakwayam enxoho emok.