SAN JUAN 10 - Lengua Sur (Enxet) Nuevo Testamento

Keláneykha nekkések tén han apnaktóso nekkések

¹ Aptahak axta appakmeta Jesús se'e: “Enxet ektahakxa enxoho metaxnegweykta átog nekkések apxagkok, cháxa apteme énxet apmenyexma xa, apteme nahan ekmaso aptémakxa. Nakso' xa sektahakxa nak sekpeywa seláneya kéxegke.

² Enxet ektahakxa enxoho aptaxneweykta átog nekkések apxagkok, cháxa énxet apteme apkeláneykha nekkések apkeltakmelchesamol'a apnaktóso nekkések xa.

³ Emeykesesek nahan átog ma'a énxet ektaha nak aptakmelcheso átog, keñe keláneykha nekkések exének cha'a apwesey ewónmakha ektémakxa enxoho apwesey nekkések. Ekpelkohok nahan nekkések ma'a appeywa. Elántekkesek nahan ma'a apxagkok,

⁴ apsawhekpók agkok nahan apkelántepa, keñe exog apmonye m'a ektaha apkeltakmelcheso. Etlók nahan nekkések hakte ékpelkohok ma'a appeywa.

⁵ Keñe metlewe' ma'a pók énxet enxoho, yenyahagkok aksa, hakte mékpelchehek ma'a appeywa.”

⁶ Cháxa aptahakxa axta apyetcháseykekxoho Jesús xa. Axta eyke elya'ásegkohok énxet'ák aptahakxa apkeláneya Jesús.

Jesús apteme apkeláneykha nekkések aptakmalma

⁷ Aptahak axta makham Jesús apkeláneya énxet'ák se'e: “Ko'o sekteme átog apkelántaxnegweyktamxal'a nekkések. Nakso' xa sektahakxa nak seláneya kéxegke.

⁸ Apyókxoho énxet ektaha axta apkelwé maweykxa ko'o, apkelmenyexma axta m'a, ekmaso apkeltémakxa axta anhan; axta eyke elyaheykekxohok nekkések xa énxet'ák nak.

⁹ Ko'o sekteme átog; ewagkasakpok sat teyp énxet ektahakxa enxoho aptaxnegwé. Máxa sat etnehek ma'a nekkések aptaxnegweyktal'a apxagkok keñe m'a aptepa enxoho étak pa'at.

¹⁰ “Exegmak cha'a apmenyexma wánxa aksa etegyaha m'a apmenyexma, tén han etegyaha yakwayam yakhek, tén han etegyaha yakwayam enaktawasha aksok; wánxa agkok, ekxegakmek axta eyke ko'o yakwayam enxoho keytek ekyennakte kélnenya'ák, yakwayam enxoho anhan kayágwomhok agko' ekyetna kéxegke ekyennakte kélnenya'ák.

¹¹ Ko'o sekteme keláneykha nekkések aptakmalma. Keláneykha nekkések aptakmalma m'a megyeye nak yetsapok eñama apkeltakmelcheso nekkések;

¹² Keñe m'a énxet keláneykha nekkések kélyanmagkaseso nak aptamheykha, apwet'ak agkok ekxegakmo aksok nawhak eklo, ekxak aksa nekkések yenyehek, hakte háwe etnehek apkelánnekyha nekkések apagko', háwe nahan katnehek apnaktóso m'a nekkések. Páxakwokmek agkok aksok nawhak eklo nekkések yakwayam kalnápok, kaxpánchesek nahan.

¹³ Yenyehek nahan xa énxet nak, hakte wánxa aksa apmopmenyého m'a kélyanmagkaseso nak aptamheykha, megkaxének apwáxok nekkések.

^14-15 “Ko'o sekteme keláneykha nekkések aptakmalma. hékpelkohok cha'a ko'o Táta, eykpelkohok nahan cha'a ko'o xa, cháxa ektémakxa nak han selyekpelchémo ko'o m'a nekkések ahagkok, hékpelkohok nahan ko'o xa m'a. Magwakyek ko'o sétsapma eñama seltakmelcheso nekkések.

¹⁶ Yetneyk nahan ko'o nekkések megkatnaha nak apkeleñamakxa s'e kañe' apxagkok nak; kéméxchek eyke anaklantak nahan ma'a. Elyahakxohok sat nahan sekpeywa ko'o m'a. Xama apyáktamakxa sat katnekxa, xama sat nahan etnehek ma'a ektaha nak apkeltakmelcheso.

¹⁷ “Eyásekha'awók ko'o Táta hakte mamyagweykxak sekyókxoho yakwayam watsapok, yakwayam enxoho amekxak makham sekyennakte.

¹⁸ Méko kawának hémentók ko'o ektémakxa nak sekyennakte, seyhayo ahagko' eyke amátog eñama sekmámenyého ahagko'. Payhawók ko'o wohok amátog, payhawók nahan amekxak makham sekyennakte. Cháxa apkeltémo axta alának ko'o Táta xa.”

¹⁹ Xama axta apkelleg'a judíos xa aptahakxa axta appeywa Jesús, yeykháxchek axta makham mók apkelpakmeyesma.

²⁰ Apxámok axta énxet'ák aptaha apkelpeywa s'e: —Nakso' agkok ekyetna apwáxok kelyekhama' xa, nakso' agkok nahan aptaha ekyéháxma, ¿yaksak ektaha kélyahákxoho nak aptahakxa?

²¹ Wánxa agkok, aptahak axta nápakha énxet'ák apkelpakmeta s'e: —Méko xama énxet ekha kelyekhama' apwáxok katnehek appeywa xa ektaha nak. ¿Awanchek enxeykel'a kelyekhama' kóteyásekxaxma énxet meyke apakta'ák?

Enxet'ák judíos aptaknagko Jesús

²² Apchaknakxeyk axta énxet nátegma Jerusalén ekhem kélesawásesamókxa axta cha'a tegma appagkanamap. Chakhawók axta apketsamágexal'a.

²³ Apheyk axta anhan Jesús kañe' tegma appagkanamap, apwenchameyha axta nahan kóneg tegma kéltéma axta Salomón apagkok.

²⁴ Apwakhegwokmek axta énxet'ák judíos. Aptahak axta nahan apkelmaxneyeyncha'a s'e: —¿Háxko sat ekwánxa ekhem kammok mehẽltennasók negko'o aptémakxa exchep? Xép agkok Mesías, hẽltenneys hana negko'o.

²⁵ Aptahak axta apchátegmowágko Jesús se'e: —Eltennásek axta kéxegke, elya'ásekmek axta eyke, ekyókxoho aksok selané nak ko'o yetlo seyhayo Táta ekteme ekxekmóso eyámnaksoho sektaha ko'o m'a;

²⁶ Elya'ásekmek eyke kéxegke hakte háwe seknaktóso nekkések.

²⁷ Ekpelkohok cha'a ko'o sekpeywa m'a ektaha nak seknaktóso nekkések, alyekpelkohok nahan ko'o xa, hétlók nahan ma'a sekmahágkaxa enxoho.

²⁸ Ekmések ko'o elyennakte apnenya'ák megkatnegwayam enéxa m'a nekkések seknaktóso nak, meletsepek sat nahan cha'a, méko sat nahan kawának hémentók.

²⁹ Méko xama aksok kaxhok ma'a aksok segkéso nak ko'o Táta, méko nahan kawának keymentók.

³⁰ Wánxa negko'o xama, Táta tén han ko'o.

³¹ Apkelmákxeyk axta makham meteymog énxet'ák judíos peya elyetnak Jesús,

³² wánxa agkok, aptahak axta apkeláneya Jesús se'e: —Elanak ko'o ekyókxoho aksok eltakmela kélnápakta'awo' kéxegke eñama Táta apmopwána; ¿yaksa eñama selané xa kélmoko nak helyetnak meteymog kéxegke?

³³ Aptahak axta apkelátegmowágko judíos se'e: —Magmokók negko'o ólyetnak xép meteymog eñama m'a aksok ektakmela apkelané nak, akke nentaknawasásak negko'o exchep ma'a appeywa ektaha nak enmexeykha Dios. Enxet apagko' xép, apheyásekpók eyke Dios.

³⁴ Aptahak axta apkeláneya Jesús se'e: —Yetnegkek eknaktáxésamaxche segánamakxa kélagkok nak kéxegke s'e: ‘Ekxénchek ko'o kéxegke kéltaha dios.’

³⁵ Negya'ásegkok negko'o ektémakxa nak ekpeywa eknaktáxésamaxche, yawanchek katnehek ekmowána amya'a; apxénchek nahan Dios aptaha nahan dios ma'a énxet'ák ektaha axta apkelpakhetcheso.

³⁶ Epagkanchek axta ko'o Dios, eyáphásek axta nahan keso náxop, ¿yaksak ektaha kélxéna nak kéxegke sekwañeyncha'a ko'o m'a Dios, cham'a sekxéna nak ko'o sektaha Dios Apketche?

³⁷ Agkok ko'o alanak sektamheykha apkeláneyol'a Táta, kélwanchek helya'ásók.

³⁸ Élanak agkok ko'o sektamheykha neyseksa eykhe selya'áseyam, nágkólya'asem ma'a aksok selané nak ko'o, yakwayam enxoho kólya'ásegwomhok sektaha ko'o sekyepetcheyo m'a Táta.

³⁹ Peyk axta eykhe makham emok Jesús xa énxet'ák nak, wánxa agkok, apxegánegkesek axta eyke Jesús.

⁴⁰ Apmeyákxeyk axta makham Jesús ma'a mók nekha wátsam Jordán ekpayho nak ekteyapmakxa ekhem, aphákxeyk axta m'a apyakpasáseykegkaxa axta yegmen Juan énxet'ák.

⁴¹ Apxámok axta énxet'ák apteyánegweykmoho Jesús. Aptahak axta anhan apkelpakmeta s'e: —Nakso' axta eykhe meláneya Juan aksok sempelakkaso nak agweta', nakso' eyke entemék ma'a ektémakxa axta apkeltenneykha Juan apxeyenma xa énxet nak.

⁴² Apxámok axta énxet'ák apteme melya'áseyam Jesús xa yókxexma nak.