SAN JUAN 1 - Lengua Sur (Enxet) Nuevo Testamento

Dios appeywa ektamheykekxa énxet

¹ Aphegkek axta sekxo' agko' ma'a ektaha nak Appeywa, aphegkek axta xamo' Dios, Dios axta anhan ma'a.

² Aphegkek axta xamo' Dios sekxo' agko'.

³ Axta keñamak apkeláneya Dios ekyókxoho aksok ma'a, megkalanaxchek axta ekyókxoho aksok ekhágko nak, méko enxoho m'a ektaha nak Appeywa.

⁴ Yetnegkek axta nahan ekyennakte egnenyek ma'a. Elseyexma axta m'a ekyennakte egnenyek nak yakwayam enxoho kalsásesexma apyókxoho énxet'ák.

⁵ Chápogwatchek nahan neyseksa ekyaktesóxma xa elseyexma nak, yawanchek nahan ekyaktesóxma kaspanchesek.

⁶ Apwa'ak axta xama énxet apwesey Juan, aptaha axta Dios apcháphaso.

⁷ Apwa'ak axta yakwayam enxoho exének ektémakxa m'a elseyexma, yakwayam enxoho melya'asók apyókxoho énxet'ák ektémakxa apkeltenneykha.

⁸ Háwe axta Juan elseyexma, wánxa agkok kéláphaso axta eyke yakwayam exének ektémakxa elseyexma.

⁹ Wayak axta elseyexma ekmámnaksoho agko' keso náxop ektaha nak elsásesóxma apyókxoho énxet'ák.

¹⁰ Aphegkek axta náxop xa ektaha nak Appeywa; apkeláneyak axta eykhe anhan Dios keso náxop eñama xa ektaha nak Appeywa, axta eyke elyekpelchék énxet'ák apheykha nak keso náxop.

¹¹ Apwayak axta eykhe apheykegkaxa m'a ektaha nak énxet'ák apagkok, wánxa agkok axta eyke yápeykha m'a ektaha nak énxet'ák apagkok.

¹² Keñe m'a énxet'ák ektaha axta apchápeykha, ektaha axta anhan apteme mey'áseyam, apxénchek axta ekpayhawo etnahagkok Dios apketchek,

¹³ Dios apketchek xa énxet'ák nak, háwe m'a ektémakxal'a appaleyam kélketchek, háwe nahan ma'a ektémakxal'a apmopmenyého apketchek énxet, Dios akke keñamak apteméseso yakwayam etnahagkok apketchek xa.

¹⁴ Enxet apagko' axta aptamheykekxak ma'a ektaha nak Appeywa, aphegkek axta nahan negyeseksa, negwet'ak axta anhan negko'o ektémakxa apcheymákpoho. Cháxa apcheymákpoho apmésa axta Apyap eñama apteme wánxa xama Apketche xa. Láneyok axta apwáxok segásekhayo tén han ma'a ekmámnaksoho nak.

¹⁵ Apkeltenneykha axta Juan apxeyenma aptémakxa m'a. Aptahak axta apxéna s'e: “Cháxa sekxeyenma axta cha'a ko'o seltenneykencha'a xa, sektéma axta cha'a sekpeywa s'e. Enxet peya nak ewak netámen, apteme maxnawo ko'o, hakte aphegkek axta meykexa ko'o.”

¹⁶ Tekxeyagkók axta mók segásekhayo Dios eñama m'a ektémakxa nak ekyawe ektakmeleykha apwáxok.

¹⁷ Moisés axta keñamak ekteyapma m'a segánamakxa, Cristo axta eyke keñamak segweyktámho negko'o m'a segásekhayo tén han ma'a ekmámnaksoho nak.

¹⁸ Méko ekwetaya aptémakxa Dios xama enxoho; axta eyke segyekpelcháseseyam negko'o m'a aptaha nak wánxa xama Dios Apketche, aptaha nak han Dios, aptaha nak han cha'a meyenyaweykha Apyap.

Juan el Bautista apkeltenneykha apxeyenma Jesucristo

¹⁹ Apkeláphásek axta énxet'ák judíos apkeleñama tegma apwányam Jerusalén aphakxa Juan ma'a appasmo nak apkelmaxnéseso Dios énxet'ák apagkok, axta anhan apkeláphásak ma'a énxet'ák Levitas yakwayam elmaxneyha aptémakxa.

²⁰ Aptakmelchásók axta eyke apxeyenma Juan. Aptahak axta s'e: —Háwe ko'o Mesías.

²¹ Apkelmaxneyakxók axta makham xa énxet'ák nak: —¿Yaksak eyke énxet xép? —¿Háweya exchep Elías aptaha axta Dios appeywa aplegaso? —Háwe ko'o, —axta aptahak apchátegmowágko Juan. Apkelenxanakmók axta eyke apkelmaxneyeykha xa énxet'ák nak: —¿Xeyepya Dios appeywa aplegaso apxénamakpo nak ewa'? —Háwe ko'o, axta aptahak makham apchátegmowágko Juan:

²² Kélmaxneyakxók axta makham Juan: —¿Yaksak énxet xép? Egmenyék negko'o ansakxések amya'a m'a énxet'ák ektaha axta sẽláphaso negko'o. —¿Háxko sat etnehek hẽltennaksek aptémakxa exchep?

²³ Aptahak axta apchátegmowágko Juan se'e: —Ko'o sekteme énxet apkelpáxameykha yókxexma meykexa énxet, sektéma cha'a sekpeywa s'e: ‘Kóllanés Wese' egegkok ámay ekpéwomo’, ekhawo m'a aptémakxa axta cha'a apkeltenneykha Isaías, aptaha axta Dios appeywa aplegaso.

^24-25 Aptahak axta apkelmaxneyeyncha'a énxet'ák ektaha axta apkeláphaso fariseos yakwayam elpakhetchesapohok Juan se'e: —Háwe agkok xép Mesías, háwe agkok nahan Elías, háwe agkok nahan Dios appeywa aplegaso, ¿Yaksak ektaha apyakpasásegko nak yegmen énxet?

²⁶ Aptahak axta apchátegmowágko Juan se'e: —Yegmen agko' ko'o ekyakpasásegkok kéxegke, wánxa agkok apheyk eyke kélnepyeseksa kéxegke megkólyekpelcha nak,

²⁷ cham'a peya nak ewak netámen ko'o. Mehepayhawok nahan ko'o alhexyawásesek axát'ák apkeltéto apmagkok.

²⁸ Cháxa ektaha axta yókxexma kéltéma axta Betania xa, ekpayho nak ekteyapmakxa ekhem nekha wátsam Jordán, cham'a apyakpasáseykegkaxa axta yegmen énxet Juan.

Jesús Nekkések Apketkok apkeñama Dios

²⁹ Mók ekhem axta entahak apwet'a Juan apxegakmo Jesús, aptahak axta Juan apkeláneya énxet'ák se'e: “¡Kóllano, cháxa Nekkések Apketkok apkeñama nak Dios xa, aptaha nak apmaséseso melya'asáxma énxet'ák keso náxop!

³⁰ Cháxa sekxeyenma axta cha'a ko'o xa sektéma axta cha'a sekpeywa s'e: ‘Apxegakmek netámen xama énxet maxnawo nak ko'o, hakte aphegkek axta meykexa ko'o.’

³¹ Axta ko'oxa ay'ásegkok aptémakxa xa, wánxa agkok ekwa'ak axta eyke ko'o sekyakpasásegko yegmen énxet, yakwayam enxoho elyekpelchágwók énxet'ák Israel aptémakxa m'a sekxéna nak.”

³² Aptahak axta anhan Juan apxéna s'e: “Ekwet'ak axta ko'o Espíritu Santo apwéweynto apkeñama néten, máxa axta aptahak wáx'ay apyakwa'a apyetseksek.

³³ Axta ko'o makham ay'áseykegkok aptémakxa m'a; wánxa agkok, aptahak axta seyáneya ektaha axta seyáphaso yakwayam ayakpásesagkok yegmen énxet se'e: ‘Apwet'ak sat agkok xép apwéweynto Espíritu, tén han apyakwa'a enxoho apyetseksek énxet, cháxa apyakpasáseykegkohol'a yegmen énxet yetlo Espíritu Santo xa.’

³⁴ Ekwet'ak axta ko'o m'a. Ekxénchek nahan ko'o aptaha Dios Apketche m'a.”

Apmonye'e Jesús apkeltámeséyak

³⁵ Mók ekhem axta entahak apha makham Juan yetlo apkánet apkeltámeséyak ma'a.

³⁶ Xama axta apwet'a Juan apyeyk'a Jesús, aptahak axta s'e: —¡Kóllano, cháxa Nekkések Apketkok apkeñama Dios xa.

³⁷ Xama axta apkelleg'a aptahakxa appeywa Juan apkánet apkeltámeséyak, keñe axta apkemhágko Jesús.

³⁸ Appeynchakpok axta neptámen Jesús. Xama axta apwet'a kélemhágko, aptahak axta apkelmaxneyeyncha'a ektaha axta apkemheyak se'e: —¿Yaksak kélchetama? —Sẽlxekmóso, ¿háxko aphakxa exchep? axta aptahak apkelátegmowágko.

³⁹ Aptahak axta apchátegmowágko Jesús se'e: —Kólchempoho, kólteyánegwomho. Apkelxegkek axta apteyánegwokmoho m'a aphamakxa axta Jesús, aphakmek axta xamo' ma'a, hakte las cuatro taxnam axta entahak.

⁴⁰ Apkánet énxet axta apkellegé aptahakxa appeywa Juan, apkelyetlákxeyk axta anhan Jesús, Andrés axta apwesey xama m'a, aptaha axta Simón Pedro apepma'.

⁴¹ Apxegkek axta Andrés apketama apepma' apwesey Simón, aptahak axta apcháneya s'e: —Negwetákxeyk negko'o Mesías (kéltéma nak: Cristo)

⁴² Keñe axta Andrés apyentamákxo Simón ma'a aphakxa axta Jesús; xama axta apwet'a Jesús ma'a Simón, aptahak axta apcháneya s'e: —Xép Simón, Juan apketche, eltamhakpok sat xép Cefas (nenteme nak nempeywa Pedro).

Jesús apwóneykha Felipe tén han Natanael

⁴³ Mók ekhem axta entahak ekxéna apwáxok emhagkok Jesús ma'a yókxexma Galilea. Aptahaña'awók axta Felipe. Aptahak axta apcháneya s'e: —Hétlawha ko'o.

⁴⁴ Nátegma Betsaida axta apkeñamak Felipe, cham'a apkeleñamakxa axta Andrés tén han Pedro.

⁴⁵ Apxegkek axta Felipe apketama Natanael. Aptahak axta apcháneya s'e: —Negwet'ak negko'o m'a énxet aptáxesama nak apwesey Moisés weykcha'áhak eknaktáxésamaxchexa nak segánamakxa, cham'a aptáxesama nak han énxet'ák Dios appeywa apkellegaso apxeyenma m'a. Jesús apkeñama tegma apwányam Nazaret ma'a, José apketche.

⁴⁶ Aptahak axta appakmeta Natanael se'e: —¿Awanchek enxeykel'a katyapok aksok ektakmela m'a tegma apwányam Nazaret? Aptahak axta apchátegmowágko Felipe s'e: —Empoho, etyánegwoho hana.

⁴⁷ Xama axta apwet'a Jesús apxegakmo Natanael, aptahak axta appakmeta s'e: —Cháxa apxegakmo aptaha nak nakso' Israel xa, melyexancháseykha anhan xama énxet enxoho.

⁴⁸ Aptahak axta apkelmaxneyeyncha'a Natanael se'e: —¿Háxko ektahakxa sékpelchawo nak xép? Aptahak axta apchátegmowágko Jesús se'e: —Ekwet'ak xeyk xép kóneg higo yámet amonye apwóneykha exchek Felipe.

⁴⁹ Aptahak axta Natanael apcháneya Jesús se'e: —Sẽlxekmóso, ¡Xép apteme Dios Apketche, xép nahan apteme Israel Wese' apwányam apagkok!

⁵⁰ Aptahak axta apchátegmowágko Jesús se'e: —¿Wánxaya aksa aptaha mehey'áseyam xép ma'a sekxéna exchek sekwet'a kóneg higo yámet? Étak sat xép aksok ektakmela agko' megkaxnawo nak xa.

⁵¹ Aptahak axta nahan Jesús appeywa s'e: —Kólwetak sat kéxegke kamayhekxak néten, kólwetak sat nahan elweweykentak cha'a Dios apkelásenneykha apkeleñama néten, tén han elmeyekxak cha'a m'a néten, takhapxet ma'a ektaha nak Apketche énxet. Nakso' xa sektahakxa nak seláneya kéxegke.