HEBREOS 7 - Lengua Sur (Enxet) Nuevo Testamento

Jesús apteme apkemha apmonye appasmo apkelmaxnéseso Dios énxet'ák apagkok, ekhawo ektémakxa axta aptamheykha Melquisedec

¹ Melquisedec axta wese' apwányam ma'a tegma apwányam Salem, appasmo apkelmaxnéseso Dios énxet'ák apagkok axta anhan ma'a, cham'a Dios meyke nak ekhémo. Xama axta apwakto Abraham apkenyekto m'a empakháxchexa axta, cham'a apmallanakxa axta nepyeseksa kelwese'e apkelwányam nak, apkelanyexágkek axta Melquisedec, apkelmaxnésesek axta yakwayam epasmok Dios.

² Keñe axta apmésa cha'a Abraham Melquisedec xama aksok, cham'a ekyókxoho aksok ekwokmo axta cha'a diez ekyókxoho apkelma eñama apwatno kempakhakma. “Wese' apwányam appéwomo” nenteme nempeywa xa kélwesey nak Melquisedec; wese' apwányam tegma apwányam Salem axta anhan ma'a, nenteme nak nempeywa “wese' apwányam segmésamo nak meyke ektahakxa egwáxok”.

³ Axta kólya'áseykegkok apyap xa, axta nahan kólya'áseykegkok ma'a egken, axta anhan kólya'áseykegkok ma'a apyepmeyk nano', megkaxénamaxchek nahan ektémakxa sekxo' apteyékmo, megkaxénamaxchek nahan ektémakxa apketsapma; ékeso eñamakxa aptéma nak Melquisedec appasmo apkelmaxnéseso Dios énxet'ák apagkok megkatnegwayam enéxa, ekhawo ektémakxa nak aptamheykha Dios Apketche.

⁴ Kóllano hana ektémakxa axta wese' apwányam Melquisedec, awanhek nak axta eykel'a kéláyo, hakte apmések axta Abraham xama aksok, cham'a ekwokmo axta cha'a diez ekyókxoho aksok apkelma eñama apwatno kempakhakma, cham'a apmallana axta nepyeseksa kelwese'e apkelwányam nak.

⁵ Payhawók Leví aptawan'ák neptámen elmaxnak énxet'ák Israel yának egkések xama aksok ekwokmo enxoho cha'a diez ekyókxoho, cham'a Leví aptawan'ák neptámen aptaha nak appasmo apkelmaxnéseso Dios énxet'ák apagkok, ekhawo eltémókxa nak kóltemésesek segánamakxa eñama Moisés xa énxet'ák nak, megkeyxek axta m'a ektahakxa enxoho apteme apnámokkok, Abraham aptawan'ák neptámen nahan xa énxet'ák nak.

⁶ Háwe axta eykhe Leví aptáwen neptámen Melquisedec, apmések axta eyke cha'a Abraham xama aksok, cham'a ekwokmo axta cha'a diez ekyókxoho aksok apkelma, cham'a Abraham appekkencháseykekxo axta cha'a appeywa Dios. Apkelmaxnésesek axta Melquisedec Abraham yakwayam epasmok Dios;

⁷ méko kawának kaxének metnaha néten ma'a ektaha nak apkelmaxnéseso pók yakwayam epasmok Dios.

⁸ Enxet apkeletsapmo m'a apmeykekxohol'a xama aksok ekwokmo enxoho diez ekyókxoho keso negwánxa nak; wánxa agkok xeyenmék eyke eknaktáxésamaxche Melquisedec, máxa entemék megyetsapma enxoho.

⁹ Kélwanchek kólxének apmésama nahan xama aksok ekwokmo enxoho diez ekyókxoho Melquisedec ma'a énxet'ák ektaha nak appasmo apkelmaxnéseso Dios énxet'ák apagkok, aptaha nak Leví aptawan'ák neptámen, eñama m'a apméso axta Abraham xama aksok Melquisedec ekwokmo axta cha'a diez ekyókxoho, cham'a énxet'ák apkelma nak makham ekwokmo enxoho cha'a diez ekyókxoho aksok.

¹⁰ hakte máxa axta entahak apnaklóko enxoho Abraham aptawan'ák neptámen, cham'a apxega axta Melquisedec apkelanyexágko Abraham, hakte yetnegkek axta apyókxa Abraham xa aptawan'ák neptámen nak, cham'a meykexa axta makham aptawan'ák neptámen.

¹¹ Apkelxawáyak axta énxet'ák Israel segánamakxa eñama apméso m'a Leví énxet'ák apagkok aptaha nak appasmo apkelmaxnéseso Dios énxet'ák apagkok, aptaha nak han Aarón aptawan'ák neptámen xa énxet'ák nak. Apwanchek axta agkok etnésesek apkelpéwomo énxet ektaha axta apkelyetlo Moisés segánamakxa apagkok xa énxet'ák appasmo nak apkelmaxnéseso Dios énxet'ák apagkok, chakhók axta etyepekxak pók énxet appasmo nak apkelmaxnéseso Dios énxet'ák apagkok, ekhawo m'a ektémakxa axta aptamheykha Melquisedec, megkaxnawok ma'a ektémakxa axta aptamheykha Aarón.

¹² Kélyakmagkasesek agkok cha'a ektémakxa apkeltamheykha appasmo nak apkelmaxnéseso Dios énxet'ák apagkok, kólyakmagkasek nahan ektémakxa m'a segánamakxa;

¹³ keñe m'a Wese' egegkok ektéma nak ekxeyenma eknaktáxésamaxche s'e: apkeñamak nepyeseksa m'a pók énxet'ák Israel, cham'a metyapmakxa nak xama énxet appasmo apkelmaxnéseso Dios énxet'ák apagkok xama enxoho.

¹⁴ Hakte kélya'áseykegkok ektakmela Wese' egegkok apkeñama nepyeseksa m'a Judá énxet'ák apagkok, axta eyke exeyenmak Moisés xama enxoho xa énxet'ák nak, cham'a apxeyenma axta Moisés ektémakxa apkeltamheykha m'a énxet'ák appasmo nak cha'a apkelmaxnéseso Dios énxet'ák apagkok.

¹⁵ Egwanchek negko'o agya'asagkohok ektakmela agko' ekxéna enxoho egwáxok aphawo Melquisedec ma'a kaxwé apteyapma nak appasmo apkelmaxnéseso Dios énxet'ák apagkok,

¹⁶ cham'a Melquisedec aptaha axta appasmo apkelmaxnéseso Dios énxet'ák apagkok, hakte axta kañamak kélméso aptamheykha m'a segánamakxa ekxeyenma nak cha'a yakwánxa elenyék énxet'ák appasmo nak apkelmaxnéseso Dios énxet'ák apagkok, axta eyke keñamak kélméso aptamheykha Melquisedec ma'a aptémakxa axta, cham'a aptémakxa axta ektaha nak megkamassegwayam.

¹⁷ Hakte keso aptémakxa nak Dios apxeyenma Cristo s'e: “Xép apteme appasmo apkelmaxnéseso Dios énxet'ák apagkok megkatnegwayam enéxa, ekhawo ektémakxa axta aptamheykha Melquisedec.”

¹⁸ Kélmaseseykmek axta eyke m'a eltémókxa axta antehek Moisés segánamakxa apagkok, kélmeykencha'a axta cha'a nano' axta, momók agko' axta m'a, mékoho axta anhan,

¹⁹ hakte axta katekkesók nentémakxa ekpéwomo xa Moisés segánamakxa apagkok nak, yetneyk eyke kaxwo' negko'o nelhaxneykha ektaha nak ektakmela agko', ekyakmagkaso xa Moisés segánamakxa apagkok nak, cháxa segya'asamo nak aphakxa Dios xa.

²⁰ Cháxa aptemésesa axta nahan ekmámnaksoho agko' Dios xa. Keñe m'a apyókxoho énxet'ák appasmo nak apkelmaxnéseso Dios énxet'ák apagkok, apteme kélyeseykha meyke apteméseso ekmámnaksoho appeywa Dios,

²¹ ekmámnaksoho axta eyke aptemésesók appeywa Dios, cham'a kéltemésesama axta Wese' egegkok appasmo apkelmaxnéseso Dios énxet'ák apagkok, hakte temék ekxeyenma eknaktáxésamaxche s'e: “Ekmámnaksoho axta aptemésesók appeywa Wese' egegkok, meyakmagkasemek sat ma'a aptémakxa axta appeywa. ‘Xép apteme appasmo apkelmaxnéseso Dios énxet'ák apagkok megkatnegwayam enéxa.’ ”

²² Jesús akke apteméseso ekmámnaksoho m'a ekhémo mók nelpakhetchásamáxkoho Dios ektaha nak ektakmela agko', megkaxnawok ma'a émha amonye elánamáxche axta.

²³ Aptépeykegkek axta eyke xa énxet'ák appasmo nak apkelmaxnéseso Dios énxet'ák apagkok, hakte axta kaltémók cha'a kawegkohok apheykha m'a nétsapma nak.

²⁴ Méko eyke kayakmagkasek Jesús ma'a ektémakxa nak aptamheykha appasmo apkelmaxnéseso Dios énxet'ák apagkok, hakte megyetsapmak.

²⁵ Ekeso eñamakxa apkepwagko nak Jesús elwagkasek teyp megkatnegwayam enéxa m'a énxet'ák apkelya'eykekxa nak Dios eñama m'a Jesús, hakte apheyk makham ma'a yakwayam enxoho yának epasmok Dios xa énxet'ák nak.

²⁶ Jesús apteme apkemha apmonye appasmo apkelmaxnéseso Dios énxet'ák apagkok negmámenyého axta cha'a negko'o. Jesús apteme aptakmalma apagko', meyke ekmaso aptémakxa, megkeypetchegweykmohok ma'a aksok ekmanyása sempeysegkesamol'a, kélyetnakhasegkek axta anhan nepyeseksa m'a énxet'ák melya'asáxma nak, kélhésákxeyk axta nahan ma'a ektahakxa nak netno' agko' ma'a néten.

²⁷ Mexnawok Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, apchakhamol'a cha'a aksok kélnaktóso yakwayam egkések Dios ekyókxoho ekhem, ekyanmaga m'a aptémakxa nak mey'asáxma, tén han ma'a ektémakxa nak melya'asáxma énxet'ák. Wánxa agkok, xama apmeyásamákpoho apagko' axta eyke Jesús ekyanmaga mólya'asáxma negko'o megkatnegwayam enéxa, cham'a apmeyáseykpoho axta apagko' yakwayam emátog.

²⁸ Kalyésha cha'a Moisés segánamakxa apagkok, yakwayam katnésesek apkelámha apmonye'e appasmo apkelmaxnéseso Dios énxet'ák apagkok ma'a énxet'ák megkalpéwomo nak apkeltémakxa; keñe m'a ektaha axta apteméseso ekmámnaksoho Dios elyeseyncha'a yakwayam etnehek apkemha apmonye appasmo apkelmaxnéseso Dios énxet'ák apagkok ma'a Apketche, cham'a, kéltemésesama axta ekpéwomo aptémakxa megkatnegwayam enéxa, cháxa elánamáxche axta natámen segánamakxa xa, apteméseso nak ekmámnaksoho appeywa Dios apxeyenma Jesús.