HEBREOS 5 - Lengua Sur (Enxet) Nuevo Testamento

¹ Apyókxoho apkelámha apmonye'e nak appasmo apkelmaxnéseso Dios énxet'ák apagkok, apteme kélyéseykha nepyeseksa énxet'ák, yakwayam enxoho epasmok énxet'ák nápakto' Dios, tén han egkések aksok apméso naksa Dios yakwayam enxoho kólmasésesek apteme melya'asáxma énxet.

² Apwanchek kapyóshok elanok apkemha apmonye appasmo apkelmaxnéseso Dios énxet'ák apagkok ma'a énxet'ák melya'áseyak nak aksok, tén han ma'a énxet'ák ektaha nak megyakhémo apkeltémakxa, hakte hawók ektémakxa apyelkamákpoho ektaha nak appasmo apkelmaxnéseso apnámokkok ma'a ektémakxa nak apkelyelkamákpoho énxet'ák.

³ kéméxchek nahan egkések aksok apméso naksa Dios ma'a apkemha apmonye nak appasmo apkelmaxnéseso Dios énxet'ák apagkok, yakwayam enxoho megkólyakmagkásekxék ma'a ektémakxa nak mey'asáxma, tén han megkólyakmagkásekxék ma'a ektémakxa nak apkeláneyak melya'asáxma énxet'ák.

⁴ Méko xama énxet apmopwána etnésesakpohok apagko' appasmo apkelmaxnéseso Dios énxet'ák apagkok, Dios apwánxa apagkok aptaha cha'a apwóneykha, egkések nahan xa ektéma nak nentamheykha, ekhawo kéltemésesamakxa axta Aarón.

⁵ Ekhawo ektémakxa axta nahan ma'a Cristo, háwe axta apkelyésamakpoho apagko' yakwayam etnehek apkemha apmonye appasmo apkelmaxnéseso Dios énxet'ák apagkok, Dios axta eyke apméso aptamheykha, hakte Dios axta m'a aptéma axta apkenagkama Jesús se'e: “Xép apteme hatte, ektemék kaxwo' xép hatte.”

⁶ Mók eknaktáxésamaxche nahan aptemék apkenagkama s'e: “Xép apteme appasmo apkelmaxnéseso Dios énxet'ák apagkok megkatnegwayam enéxa, ekhawo ektémakxa axta aptamheykha Melquisedec.”

⁷ Ennaktéshok axta cha'a appeywa Cristo neyseksa apha axta keso náxop, yetlo apwóno axta anhan cha'a etnehek nempeywa nelmaxnagko ewónmakha Dios, aptaha nak apmopwána emyók emátog, aplegayók axta cha'a Dios xa, hakte apkelyaheykekxoho axta eghak Jesús.

⁸ Aplegeykegkoho axta keñamak Cristo eltámeya yakwayam etnehek apkelyaheykekxoho, cham'a aptaha nak eykhe Dios Apketche.

⁹ Xama axta apsawhawo apkelana Cristo m'a yakweykenxa axta elána' eñama apteme xa ektaha nak, aptemék axta eñamakxa apkelwagkásamap teyp megkatnegwayam enéxa apyókxoho énxet ektaha nak apkelyaheykekxoho.

¹⁰ Aptemésesegkek axta nahan Dios apkemha apmonye appasmo apkelmaxnéseso Dios énxet'ák apagkok ma'a Cristo, ekhawo m'a ektémakxa axta aptamheykha Melquisedec.

Sẽléso ólwataksek magya'áseyam

¹¹ Xámok eykhe makham yakwayam anxének xa amya'a nak, askehek eyke óltennásekxohok egnámokkok ektémakxa xa, hakte yehémek cha'a kólya'asagkohok kéxegke ektémakxa.

¹² Nano' axta kexaha eykhe kóltehek kéxegke kélxekmóso kélnámokkok, kéméxchek eyke kóltámesaxchek makham kéxegke nelxekmowásamáxche eñama Dios ekmanyehe nak agya'asagkohok, kélyelkáxkók kélagko' eyke kéxegke. Kéméxchek cha'a kólyenagkok weyke nam'agkok apyegmenek hakte megkólwanchek makham kóltók ma'a kélto ekyennakte nak.

¹³ Enxet ektahakxa enxoho makham apya weyke nam'agkok apyegmenek, máxa etnehek makham ma'a sakcha'a apteykegkohol'a neme, hakte mopwanchek elyekpelkohok xama aksok.

¹⁴ Nento ekyennakte nak, wánxa aksa etawagkok ma'a ektaha nak metnaha apketkók, cham'a apmopwancha'al'a elyekpelkohok aksok, hakte apwanchek elyekpelkohok ma'a aksok ektakmela nak, tén han ma'a aksok ekmaso nak.