HEBREOS 4 - Lengua Sur (Enxet) Nuevo Testamento

¹ Ekeso eñamakxa, eyéméxko nak negko'o antakmelchesaxkohok neyseksa ekyetno makham negyeseksa m'a sempekkencháseykekxa axta appeywa Dios, cham'a apxeyenma nak yakwánxa hẽllókasesek nelyampé, mopwanchek katnehek etxek enxama.

² Hakte ẽllegasegkek axta nahan negko'oxa xa amya'a ektakmela nak, ekhawo ektémakxa axta kéllagaso xa énxet'ák nak; wánxa agkok chakho' axta eyke kéllegasama amya'a xa énxet'ák nak, hakte axta etnék melya'áseyam nepyeseksa m'a énxet'ák apkelyaheykekxoho axta xa amya'a nak.

³ Keñe negko'o nenteme nak magya'áseyam, ólántexek sat ma'a yakwánxa nak hẽllókasesek nelyampé Dios, cham'a apxeyenma axta Dios aptéma appeywa s'e: “Axta keñamak nahan sekxéna axta ko'o neyseksa seklo peya melántexek ma'a yakwánxa nak allókasesek apkelyampé énxet.” Wánxa agkok, appenchesamók axta eyke aptamheykha Dios apkeláneya keso náxop;

⁴ mók eknaktáxésamaxche nahan entemék ekxénamaxche siete ekhem se'e: “Apkellókasek axta apyampé Dios ekwokmo axta siete ekhem.”

⁵ Entemék nahan eknaktáxésamaxche s'e: “Melántexek sat ma'a yakwánxa nak allókasesek apkelyampé énxet.”

⁶ Kéméxchek eyke makham elántexek nápakha énxet'ák xa yakwánxa nak hẽllókasesek nelyampé Dios, hakte melántaxnók ma'a énxet'ák apmonye axta kéllegaso tásek amya'a eñama m'a melyaheykekxoho axta.

⁷ Ekeso eñamakxa appekkenákxo nak makham Dios xama ekhem, apkeltéma nak Dios “keso negwánxa nak.” Nano' axta entemék apxeyenma Dios xa, cham'a sẽlpakhetchesa axta eñama m'a ektémakxa axta appeywa David, cham'a ekyetnama nak han eknaktáxésamaxche ekxénamakxo s'e: “kélleg'ak agkok kaxwo' kéxegke aptahakxa appeywa Dios, nágkólyennaktés aksa kélwáxok.”

⁸ Josué axta agkok apkellókaseso apkelyampé énxet'ák Israel, mexének axta Dios epekkenek mók ekhem yakwayam ellókasesek apkelyampé énxet.

⁹ Yetneyk eyke makham kélpagkancheso yakwayam ellókasek apkelyampé Dios énxet'ák apagkok;

¹⁰ hakte negko'o ektahakxa enxoho nentaxnegwayam yakwánxa nak hẽllókasesek nelyampé Dios, kamaskok anlának ma'a ekyókxoho ektémakxa nak nentamheykha, ekhawo ektahakxa axta apkellókaso apyampé Dios.

¹¹ Kéméxchek cha'a ólwaskápekxohok yakwayam ólántexek xa yakwánxa nak hẽllókasesek nelyampé Dios, yakwayam enxoho méko keytlakxak apkeltémakxa axta m'a énxet'ák apkelya'áseykmo axta.

¹² Hakte yetneyk ekyennakte Dios appeywa, yetneyk nahan ekmowána, ahamteyk agko' nahan, yeykhágweykmók ektémakxa ekmahanta m'a sawo ekwenakte ánet nekha ekmahantal'a, ektaxnegweykmohol'a kaño' agko' egwáxok ekweykmoho m'a ekyetnamakxa nak eghagák, kawomhok nahan ma'a kaño' agko' nak apexchakkok énxet; awanchek nahan kay'asagkohok ektémakxa nak elchetamso egwáxok, yáxñakxoho nahan kapekkenekxak ma'a ekmáheyókxa nak kalának egwáxok.

¹³ Yawanchek keyxánegkesek Dios ekyókxoho aksok ektaha axta apkelané, yáxñakxoho nahan katnehek apweté ekyókxoho aksok ma'a Dios, cham'a peya nak óltennásekxohok nentémakxa axta.

Jesús apteme apkemha apmonye apagko' appasmo apkelmaxnéseso Dios énxet'ák apagkok

¹⁴ Jesús, Dios Apketche, apteme apkemha apmonye apagko' sempasmo sẽlmaxnéseso negko'o, cham'a apmeyeykekxo axta néten. Ekeso eñamakxa eyéméxko nak anlenxanmohok nelwaskápeykekxoho eñama m'a magya'áseyam nenxeyenma nak ekyetna negko'o.

¹⁵ Hakte apya'ásegkok ektémakxa negyelkamáxkoho m'a apkemha apmonye sempasmo nak sẽlmaxnéseso negko'o, hakte hawók axta ektémakxa ekyekkónma m'a ektémakxa nak segyekkónma negko'o; axta eyke eláneyk mey'asáxma xama enxoho.

¹⁶ Agágketchesamhok hana aphamakxa m'a Dios segásekhayo nak yetlo megkatnaheykha egwáxok, yakwayam enxoho hegemlekxohok henlanok negko'o, tén han keytlawhok ektakmeleykha apwáxok hempasmok ma'a eyakhókxa enxoho neltamhókxa hempasmok.