HEBREOS 3 - Lengua Sur (Enxet) Nuevo Testamento

Jesús apteme néten agko' mexnawok Moisés

¹ Elyáxeg, kélteme nak Dios énxet'ák apagkok, kéltaha nak han Dios apkelpagkanma, kéxegke ektaha axta apkelwóneykha Dios yakwayam kóltehek énxet'ák apagkok, kaxén kélwáxok Cristo Jesús, aptaha nak seykha amya'a, aptaha nak han apkemha apmonye appasmo apkelmaxnéseso Dios énxet'ák apagkok, cha'a keñamak nenxeyenma ekyetna negko'o magya'áseyam ma'a.

² Hakte apkeláneyak axta Jesús ma'a apkeltémókxa axta etnehek Dios, aptaha axta apkelyéseykha yakwayam elának se'e aptamheykha nak, ekhawo m'a aptémakxa axta Moisés apkeláneya m'a apkeltémókxa axta etnehek Dios, axta eyenyaweykha aptamheykha appasmoma m'a Dios énxet'ák apagkok.

³ Wánxa agkok, payhawók eyke keytek ekyawe kéláyo Jesús, kaxnók ma'a Moisés, hawók agko' nahan ektémakxa m'a énxet apkelanél'a tegma, awanhok agko' katnehek kéláyo m'a énxet, kaxnók ma'a tegma.

⁴ Apyókxoho tegma apteme énxet apkelané; wánxa agkok Dios akke apkelané ekyókxoho aksok ekhágko nak.

⁵ Ekeso eñamakxa meyenseykmo axta apkelané Moisés ma'a apkeltémókxa axta etnehek Dios, appasmoma m'a Dios énxet'ák apagkok nak, axta apxeyenmak cha'a Moisés ma'a yakwánxa nak etnehek appeywa Dios. Axta entemék aptamheykha Moisés xa.

⁶ Cristo aptaha nak Dios Apketche apteme melwátéseyam apkeltakmelcheso xa Dios énxet'ák apagkok nak, negko'o nenteme Dios énxet'ák apagkok, cham'a magyenseyam nak nenteme magya'áseyam, tén han magyenseyam nak ma'a ekpayheykekxa egwáxok neyseksa nelhaxneykha ekyetna nak negko'o.

Apkellókasamakxa apkelyampé Dios énxet'ák apagkok

⁷ Ekeso eñamakxa aptéma nak appeywa Espíritu Santo ekyetna nak eknaktáxésamaxche s'e: “kélleg'ak agkok kaxwo' kéxegke aptahakxa appeywa Dios,

⁸ nágkólyennaktés aksa kélwáxok nágkólteme apkeltémakxa axta ẽlyepmeyk nano', cham'a apkenmexeykencha'a axta Dios, cham'a apyekkónma axta anhan aplókasama Dios ma'a yókxexma meykexa énxet.

⁹ Axta apyekkónhok selókasa ko'o kélyepmeyk nano' kéxegke m'a yókxexma nak, apwetayak axta eykhe ektémakxa sektamheykha, ekweykmoho cuarenta apyeyam.

¹⁰ Ekeso eñamakxa selókasa axta ko'o xa énxet'ák nak, ektahak nahan sekxéna s'e: ‘Aptemegkek cha'a mehekpelchémo ko'o xa énxet'ák nak, mopmenyék nahan étlók ma'a sektémakxa nak.’

¹¹ Axta keñamak nahan sekxéna axta ko'o neyseksa seklo peya melántexek ma'a yakwánxa nak allókasesek apkelyampé énxet.”

¹² Elyáxeg kólawho sat keytek ekmaso elchetamso kélwáxok kéxegke, cham'a segyenyókasamol'a Dios memassegwayam nak, eñama ekteme ekya'áseyam kélwáxok.

¹³ Kólpasmaxkoho cha'a ekyókxoho ekhem neyseksa megkamassegwayam makham se'e “ekhem negwánxa nak”, cham'a ekxeyenma nak han eknaktáxésamaxche, yakwayam enxoho megkalyexanchesha kélxama kéxegke m'a mólya'asáxma nak, yakwayam enxoho nahan metnehek meyke apkelyaheykekxoho.

¹⁴ Nenlenxanakmók agkok negko'o nenteme magya'áseyam ekweykmoho néxa, ekhawo m'a ektahakxa axta magya'áseyam sekxo' axta, cháxa nentaha negko'o nempasmo m'a ektémakxa nak aptamheykha Cristo.

¹⁵ Ekeso eñamakxa ektéma nak eknaktáxésamaxche weykcha'áhak se'e: “kélleg'ak agkok kaxwo' kéxegke aptahakxa appeywa Dios, nágkólyennaktés aksa kélwáxok, nágkólteme apkeltémakxa axta ẽlyepmeyk nano' apkenmexeykencha'a axta Dios.”

¹⁶ ¿Yaksak axta m'a énxet'ák apkenmexeykencha'a axta Dios natámen apkellegé appeywa? Apkelánekpók ma'a apkelántekkesa axta Moisés yókxexma Egipto.

¹⁷ ¿Yaksak axta énxet'ák aptaknagkama Dios ekweykmoho cuarenta apyeyam? Axta aptaknagkók Dios ma'a énxet'ák apkeláneykegko axta melya'asáxma, cham'a apkeletsapwokmo axta yókxexma meykexa énxet.

¹⁸ ¿Yaksak axta énxet'ák apxéna Dios peya melántexek ma'a sẽllókasesamakxa nak nelyampé? Axta apxénak Dios ma'a énxet'ák melyaheykekxoho axta appeywa.

¹⁹ Negyekpelchawók negko'o megkalepwagko elántexek xa énxet'ák nak, eñama m'a ektémakxa axta apkelya'áseyam.