HEBREOS 2 - Lengua Sur (Enxet) Nuevo Testamento

Tásek antakmelchesek negko'o ektémakxa nak nelwagkásamáxche teyp

¹ Ekeso eñamakxa eyéméxko agko' nak antakmelcheshok negháxenmo negko'o m'a amya'a nenleg'a axta, yakwayam enxoho mólyetnakhágwomek negko'o negyetlo xa.

² Kayhek axta ektamheykha apkeltémókxa antehek Dios, cham'a apkelxeyenma axta apkelásenneykha apkeleñama nak néten, cham'a nano' axta, kóllegásesagkohok axta cha'a énxet'ák apkeláneyak axta melya'asáxma, tén han ma'a énxet'ák melyaheykekxoho axta xa apkeltémókxa nak antehek Dios, payhawók axta cha'a kóllegásesagkohok.

³ ¿Háxko sat antehek ólegketaxchek negko'o mantakmelchesa enxoho m'a nelwagkásamáxche teyp ektaha nak ektakmela agko'? Wese' egegkok Jesús apagko' axta ektaha aplegaso apmonye xa nelwagkásamáxche teyp nak, axta senxekmóso negko'o ektaha ekmámnaksoho m'a énxet'ák ektaha axta apkellegé.

⁴ Dios axta anhan senxekmóso negko'o ektaha ekmámnaksoho xa, yetlo apkelané m'a aksok magkenatcheso nak agweta', tén han yetlo apkelané m'a aksok eltakmela nak, tén han yetlo apkelané m'a ekyókxoho ektémakxa nak aksok sempelakkaso nak agweta', tén han eñama m'a Espíritu Santo, aptaha nak segméso cha'a megkaxnémo mók negmowána, ekhawo m'a ektémakxa axta apmopmenyého elának Dios.

Jesucristo kélhésamo apkelyáxeg

⁵ Axta egkésók Dios yakwayam etnahagkok apkelámha apmonye'e apkelásenneykha m'a yókxexma yakwánxa nak exmakha énxet, cham'a nenxeyenma nak cha'a negko'o.

⁶ Yetnegkek eyke eknaktáxésamaxche ekxénamaxko s'e: “¿Yaksak ektéma ekxéneykencha'a nak apwáxok xép énxet aptaha nak mékoho? ¿Yaksak ektéma ektemesáseykencha'a nak apwáxok xép énxet?

⁷ Yakwatakxoho axta aptemésesók xép kónego', axta exnawok ma'a Dios apkelásenneykha apkeleñama nak néten, wánxa agkok apmések axta eyke exchep apcheymákpoho, tén han ekyawe kéláyo.

⁸ Ekyókxoho aksok axta apnegkenchásak kóneg apmagkok.” Xama axta apnegkenchesa ekyókxoho aksok kóneg apmagkok, axta yeykmok xama aksok apnegkenchesa kóneg apmagkok. Wánxa agkok, akke agwet'ak makham negko'o énxet etnehek apkeláneykha ekyókxoho aksok.

⁹ Jesús akke negwet'ak negko'o, cham'a aptemésesa axta Dios kónegók yakwatakxoho nepyeseksa apkelásenneykha apkeleñama nak néten, negwet'ak nahan kélmésa apcheymákpoho tén han kélmésa ekyawe kéláyo, eñama m'a apketsapma axta. Segásekhayo axta keñamak Dios apkeltémo yetsapok Cristo yakwayam hempasmok negyókxoho negko'o.

¹⁰ Ekyókxoho aksok ekheyegko nak ekteme Dios apagkok, Dios nahan apkelané, cham'a Dios apkeltémo nak kawakxohok apyókxoho apketchek ma'a ektémakxa nak apcheymákpoho. Ekeso eñamakxa ekpayhawo axta etnésesek ekpéwomo aptémakxa Cristo eñama m'a aplegeykegkoho axta, aptaha nak han apkelwagkaso teyp apyókxoho énxet'ák.

¹¹ Hakte apyókxoho énxet'ák apteme Apyap ma'a Dios, cham'a énxet'ák apkelpagkanamap nak, tén han ma'a ektaha nak apteméseso apkelpagkanamap. Ekeso eñamakxa memegkaktama nak Dios Apketche sẽltéma negko'o apkelyáxeg,

¹² ekhawo ektémakxa nak appeywa ekyetnama nak eknaktáxésamaxche s'e: “Altennasha sat ko'o elyáxeg xép apwesey, anneykmaksek sat nahan ko'o xép apwesey neyseksa kélakneykekxexa.”

¹³ Aptemegkek nahan appeywa s'e: “Dios sat ko'o atnehek seyásenneykekxexa.” Keñe aptéma nahan appeywa s'e: “Ekheyk ko'o kaxwo' nepyeseksa énxet apkelyetchesamakpoho nak sakcha'a ektaha axta segkéso Dios.”

¹⁴ Hawók axta ektémakxa apyempehek Jesús ma'a ektémakxal'a apyókxa énxet, tén han ma'a éma apagkok nak, ekhawo ektémakxal'a apketchek xama énxet kaxhok mók ma'a empe'ék, tén han ma'a éma agkok. Temegkek axta xa yakwayam enxoho emaseksek ma'a ekha axta ekmowána kategyaha ekyógkexma, cham'a ekwesey nak kelyekhama', eñama m'a apketsapma axta.

¹⁵ Cháxa aptahakxa axta Jesús apmasésesa apyókxoho énxet'ák ma'a ektémakxa axta apkelaye apkeletsapma, cham'a ektemésesama axta máxa apkelmomap neyseksa apheykha.

¹⁶ Tásek axta ekwetamaxche apwaya Jesús yakwayam epasmok ma'a ektaha nak Abraham atawan'ák neptámen, háwe yakwayam epasmok ma'a Dios apkelásenneykha apkeleñama nak néten.

¹⁷ Ekeso eñamakxa apheyáseykpoho apagko' axta Jesús ma'a apkelyáxeg, yakwayam enxoho etnehek nápakto' Dios meyenseyam appasmo apkelmaxnéseso Dios énxet'ák apagkok, tén han etnehek apmopyósa elanok pók, yakwayam enxoho anhan étaksek meyakmagkáseykekxa Dios apkeltémakxa melya'asáxma énxet'ák, eñama m'a apketsapma axta segyanmaga.

¹⁸ kaxwo' apwanchek epasmok Jesús ma'a énxet ektahakxa enxoho ekyekkónma, hakte aplegeykegkók axta nahan ma'a, yekkónmeyk axta nahan.