HEBREOS 12 - Lengua Sur (Enxet) Nuevo Testamento

Anlanok hana wánxa m'a Jesús

¹ Ekeso eñamakxa eyéméxko nak agyenyók ekyókxoho m'a aksok sẽlya'asama nak exma, tén han ma'a mólya'asáxma sẽlpextetma nak, tén han onyahagkok yetlo nelwaskápeykekxoho m'a nelteyásamáxche peya nak óltésaxchek, hakte apxámok énxet negyáwa negko'o apxekmósama nak apteme melya'áseyam.

² Anlanok hana wánxa m'a Jesús, hakte cha'a keñamak magya'áseyam nak negko'o m'a, Jesús nahan apteme apteméseso ektakmela m'a magya'áseyam nak negko'o. Aplegágkók axta Jesús néten aksok ektegyéso, axta yenmexmók Jesús ma'a nétsapma segmegkasamo nak, hakte apya'ásegkok axta peya étak ekpayheykekxa apwáxok natámen aplegeykegkoho apketsapma; aphákxeyk axta anhan ma'a ekpayhókxa nak nelya'asamakxa nekha Dios aptaháno.

³ Kaxén kélwáxok ektémakxa axta Jesús, cham'a aplegágkoho axta eñama aptaknagko m'a énxet'ák melya'asáxma nak; ékeso eñamakxa eyéméxko nak megkólyampágwomek kéxegke tén han megkalleklágwomek.

⁴ Megkólenmexak eykhe makham kéxegke m'a ektémakxa nak mólya'asáxma ekwokmoho kéltekyawa,

⁵ kelwagkámeykegkek nahan kéxegke m'a aptahakxa axta apméso appeywa Dios, kéxegke kéltaha nak Dios apketchek. Entemék eknaktáxésamaxche weykcha'áhak se'e: “Hatte, nétaknaw aksa m'a ektémakxa nak sempékesáseyak Wese' egegkok, nágkaleklagwom nahan ma'a apkeltennáseykxoho enxoho Wese' egegkok eyesagko aptahakxa exchep.

⁶ hakte elánésekxohok cha'a Wese' egegkok aptémakxa m'a énxet ektahakxa enxoho apchásekhayo, eñásesagkohok nahan cha'a m'a aptéma nak máxa apketche.”

⁷ Kólenmaxaxkoho kéxegke m'a aplegasáseykegkoho nak Wese' egegkok, cháxa apxekmósamo kéxegke Dios kéltaha apketchek xa. ¿Yetneyk enxeykel'a énxet melxekmowáseyak nak apketche?

⁸ Agkok elánesákxak kéltémakxa kéxegke Dios, ekhawo aptemésesamakxal'a Dios ma'a ektaha nak apketchek, megkóltehek kéxegke Dios apketchek apancha'awo' melánesákxo enxoho kéltémakxa Dios.

⁹ Hẽlxekmósagkohok axta cha'a negko'o ẽlyepmeyk apheykha nak keso náxop, cham'a nentémakxa axta makham egketkók, ólyahakxohok axta nahan cha'a negko'o xa. Ekyagwánxa agkok ektakmela ólyahakxohok ma'a Egyap apha nak néten, yakwayam enxoho agwetak ekyennakte egnenyek.

¹⁰ Hẽlxekmósagkohok axta cha'a negko'o yakwatakxoho ẽlyepmeyk keso náxop, cham'a ekxéna enxoho apwáxok ekpayhawo hentemésesek; wánxa agkok, henlánekxéshok akke cha'a negko'o nentémakxa Dios, yakwayam enxoho katnehek ekmámnaksoho sempasmo, tén han hentemésesek nentakmalma ekhawo ektémakxa nak aptakmalma Dios.

¹¹ Nakso' mehegmések ekpayheykekxa egwáxok ma'a sẽllegasáseykegkoho nak, cham'a sẽllegasásegkoho enxoho, askehek aksa katnehek; wánxa agkok, ẽltameyak agkok negko'o sẽllegasáseykegkoho, henteméseshok cha'a meyke nentémakxa xa, tén han ekpéwomo nentémakxa.

Sẽléso antaknók Dios appeywa

¹² Kólmeyásekxa makham elyennakté kélmék elyampágwayam nak tén han ma'a kéltapnák elyelkamáxche nak,

¹³ kólchetam ámay ekpéwomo nak yakwayam enxoho katakmelekxak ma'a kélmenek ekyelkamáxche nak, yakwayam enxoho megkayágwomok ekyakseykekxa.

¹⁴ Kóllenxánem kóltehek meyke ektahakxa kélwáxok nepyeseksa m'a apyókxoho énxet'ák nak, kólteme nahan kélpagkanchásamáxche Dios; hakte méko kawának kótak Wese' egegkok megkólpagkanchásexko enxoho Dios.

¹⁵ Kóllenxánem megkólyensemek ma'a ektémakxa nak segméso naksa segemleykekxoho Dios, yakwayam enxoho metnehek kélxama kéxegke m'a ektémakxal'a yámet egkepmenák ekmáskel'a, cham'a étsagkasamol'a énxet, tén han ma'a ekwayol'a énxet'ák.

¹⁶ Nágkólho kamok kélwáxok kélxama kéxegke m'a ekmaso nak nentémakxa mansexta, nágkóltaknaw nahan ma'a ektaha nak ekpagkanamaxche; hakte cháxa aptémakxa axta Esaú xa, cham'a apyakmagkáseykekxo axta nento aksok yakwayam eykhe exkekxa' eñama apteme metnaha apketkok.

¹⁷ Kélya'ásegkok kéxegke m'a ektahakxa axta natámen, axta exka'ak ma'a aksok eltakmela peya axta eykhe elmaxnésesek apyap; apchakhákpók axta eykhe apwóno, mopwanchek axta eyke elánekxak ma'a ektahakxa.

¹⁸ Megkólyepetchegweykmohok kéxegke m'a egkexe ekhawo aptamhágkaxa axta énxet'ák Israel, cham'a egkexe negmowána nak ampaknegwomhok, cham'a eyálewomakxa axta anhan ma'a, cham'a ekyaktésamakxa axta nahan exma, cháxa ekyennaktamakxa axta anhan exchahayam xa;

¹⁹ megkóllegeyk nahan kéxegke m'a kélakkahaso ekpáwá axta, megkóllegeyk nahan ma'a aptahakxa axta appeywa Dios. Enxet'ák ektaha axta apkellegé xa Dios appeywa nak axta eltamhók kawegkohok appeywa,

²⁰ hakte kelyegwakkasek axta apkelleg'a aptaha appeywa Dios se'e: “Enxet ektahakxa enxoho apkenátwe s'e egkexe nak, kólyetna' sat meteymog kólakhek, sawhéwa esenhan kólyetxa', aksok nawha'ák sat eykhe katnehek enátwayam, kólakhek sat eyke.”

²¹ Kelyegwakkasek axta énxet'ák ma'a ektahakxa axta apweté, Moisés apagko' axta anhan aptahak appeywa s'e: “Elpexyenegkek ko'o xa seyeka.”

²² Kélágketchesekmek eyke kéxegke enmakxa m'a egkexe Sión, tén han ma'a Dios memassegwayam tegma apwányam apagkok nak, cham'a Jerusalén apyetna nak néten, tén han kélágketchesekmo m'a apchaknákxexa nak Dios apkelásenneykha apxámokma apagko' apkelpeykáso Dios.

²³ kélágketchesekmek nahan ma'a apchaknákxexa nak Dios apketchek eknaktáxésamaxko nak apkelwesey m'a néten, cham'a aptaha nak apmonye'e Dios apketchek. Kélágketchesekmek nahan aphakxa m'a Dios aptaha nak segyekpelchémo negyókxoho, kélágketchesekmek nahan ma'a kélekhéseykemxa nak cha'a aphagák ma'a énxet ektakmela nak apkeltémakxa, cham'a aptemésesama axta apkelpéwomo Dios,

²⁴ kélágketchesekmek nahan aphakxa m'a Jesús aptaha axta apkelané m'a axnagkok ekhémo mók nelpakhetchásamáxkoho Dios nak, kélágketchesekmek nahan ekyetnakxa m'a éma sentemésesama nak eyáxñeyo nentémakxa, cham'a éma sẽltennasama nak hegmések aksok eltakmela eleñama nak néten, megkaxnawok ma'a ektahakxa axta Abel éma apagkok.

²⁵ Kólawho sat kéxegke, nágkóltaknaw aksa m'a ektaha nak sẽltennaso xa. Hakte axta elegketamakpok ma'a énxet'ák ektaha axta aptaknagko Dios appeywa, cham'a apmésa axta eykhe appeywa Dios apkeltennasa eyesagko aptamhágkaxa neyseksa apheykha makham keso náxop. Negko'o sat eyke ekyagwánxa agkok magmowána ólegketaxchek, cham'a maghaxno enxoho aptahakxa segméso appeywa seltennasa eyesagko nentahakxa m'a apkeñama nak néten.

²⁶ Yawhésakmók axta xóp appeywa Dios cham'a appakmeyesma axta, akke aptahak kaxwo' appeywa Dios se'e: “Ayawhésamhok sat makham xóp, háwe sat ekwánxa agkok xóp yakwayam ayawhésamhok, sat nahan ayawhésamhok ma'a néten.”

²⁷ Negya'ásegkok negko'o peya kólyakmagkasek mók ma'a ekyókxoho aksok ektaha axta Dios apkelané kélmowánal'a kóltakhesha, cham'a aptaha axta appeywa Dios se'e: “Mók sat makham”. Elának sat xa yakwayam enxoho megkaltakheykha m'a aksok megkólmowána nak kóltakhesha.

²⁸ Méko kawának kaltakhesha m'a aptémakxa nak Wese' apwányam Dios segmésama nak negko'o. Agmések hana ekpayheykekxa egwáxok Dios eñama xa, ólpeykeshok hana Dios yetlo nempagkanchásamáxche, tén han yetlo negáyo, cham'a ekleklamókxa nak apwáxok antehek.

²⁹ Hakte Dios egagkok apteme aphawo m'a táxa ekmaseseykmoho agko'la'a aksok.