HEBREOS 11 - Lengua Sur (Enxet) Nuevo Testamento

Magya'áseyam

¹ Ekha magya'áseyam ma'a negya'áseykegkoho nak yakwayam anxawak aksok nelháxanma nak; cham'a nenteméseso nak han ekmámnaksoho m'a aksok magwetayo nak.

² Leklamók axta apwáxok Dios apkeltémakxa ẽlyepmeyk nano' negko'o, hakte aptemegkek axta melya'áseyam.

³ Magya'áseyam keñamak negya'ásegkoho negko'o apkeláneya Dios ekyókxoho aksok eñama m'a appeywa. kelánamáxchek axta aksok magmowána nak agweta', keso negwet'awo nak kaxwo'.

⁴ Mey'áseyam axta keñamak Abel apmésama Dios ektakmela aksok apwatno, axta kaxnawok aksok apwatno m'a Caín, ékeso eñamakxa apxéna axta Dios aptaha appéwomo Abel, apmeyk axta anhan Dios aksok apméso Abel, apketsepmeyk eykhe Abel makhemek eyke makham apxénamap eñama m'a apteme axta mey'áseyam.

⁵ Mey'áseyam axta keñamak Enoc, kélya'áseykekxo apyókxoho apagko' ma'a néten, yakwayam enxoho megyetsepe', axta éteyamakpekxa', hakte Dios axta apyentameykekxa. Xeyenmék eyke nahan eknaktáxésamaxche appeykesáseykekxo cha'a apwáxok Dios ma'a Enoc, cham'a amonye kélya'áseykekxa axta néten.

⁶ Magwanchek negko'o ampeykesásekxak apwáxok Dios méko enxoho magya'áseyam, hakte negmokók agkok agyo'ókxak Dios kéméxchek magya'asók sekxo' apha m'a Dios, tén han magya'asók apkelánésa aksok eltakmela m'a énxet'ák ektaha nak apketamso Dios.

⁷ Mey'áseyam axta keñamak Noé apkelyahákxoho aptahakxa appeywa Dios, cham'a apchésa axta káhapwak aksok méteya axta katnehek Noé, apkelanak axta yántakpayhe yakwayam elwagkasek teyp ma'a ekheykha apxagkok. Axta nahan keñamak apkelsexnenagkama énxet'ák apheykha náxop Noé xa mey'áseyam nak, apwagkáseykpek axta nahan teyp eñama m'a ektémakxa nak magya'áseyam.

⁸ Mey'áseyam axta keñamak Abraham apkelyahákxoho m'a apwónencha'a axta Dios, apmahágkek axta yókxexma appagkanchesamakxa axta Dios apmáheyo egkések, apyamasmeyk axta aksa xóp apagkok apxegama neyseksa mey'áseyak yakweykenxa emhagkok,

⁹ mey'áseyam axta keñamak Abraham apheykmo m'a yókxexma megkatnahakxa axta apkeñémekxa, cham'a apkeltennasamakxa axta Dios apmáheyo egkések. Appakxenweykmek axta m'a, ekhawo aptamhágkaxa axta nahan Isaac tén han ma'a Jacob, cháxa appekkencháseykekxo axta nahan appeywa Dios xa énxet'ák nak.

¹⁰ Hakte axta apkelhaxanmak Abraham ma'a tegma apwányam aptaha nak memassegwayam, aptaha nak Dios apkelané yakwánxa katnehek apkelánamap, Dios apagko' nahan apkelané xa tegma nak.

¹¹ Mey'áseyam axta nahan keñamak Abraham apxawáya yakwayam étak apketche, yawanchek axta eykhe kótak étchek m'a Sara, hakte apwanyamok apagko' axta Abraham, axta eyke ey'ásekmok apmáheyo esawhohok elának Dios ma'a ektémakxa axta appekkencháseykekxa appeywa.

¹² Ekeso eñamakxa apxámákxo axta Abraham aptawan'ák neptámen keto' apketsapmakxa, apxámo apagko' axta m'a, máxa axta m'a ektémakxal'a apxámokma yaw'a néten, máxa axta anhan ma'a ektémakxal'a xóp ánek neyáwa wátsam ekwányam magmowánal'a ólyetsetek.

¹³ Apsawhomakpók axta apkeletsapma xa énxet'ák nak neyseksa melxaweyák ma'a aksok apxeyenma axta egkések Dios; nano' axta eyke apkelya'áseyak ekmáheyo katnehek ma'a ektémakxa axta appekkencháseykekxa appeywa Dios eñama m'a melya'áseyam axta, leklamók axta apwáxók xa, apkelyekpelchágweykmoho apancha'awo' axta aptamheykegkok aptaha apkelwé yakwatakxoho keso náxop, megkatnahakxa nak apkeleñémekxa.

¹⁴ Enxet'ák ektaha nak apkelxeyenma xa ektéma nak, tásek katnehek sẽltennaso apketama makham ma'a yakwánxa nak yekhegwók.

¹⁵ Xénwokmek axta agkok apwáxók apkeleñémekxa axta xa énxet'ák nak, apwanchek axta eltakhohok apkeleñémekxa;

¹⁶ wánxa agkok apmenyék axta eyke étak apkelókxa ektakmela xa énxet'ák nak, cham'a negókxa ekyetna nak néten. Ekeso eñamakxa memegkaktama nak Dios apkeltéma énxet'ák apagkok xa énxet'ák nak, hakte yetneyk apkeláneso xama tegma apwányam.

¹⁷ Mey'áseyam axta keñamak Abraham memyagweykxo peya yakhek apketche Isaac yakwayam egkések Dios, cham'a apyekkóna axta Dios ekwánxa mey'áseyam. Axta emyagweykxak Abraham apmoko egkések Dios apketche xama apagko', axta eykhe entemék appekkencháseykekxa appeywa Dios Abraham se'e:

¹⁸ “Isaac sat kañék apxámeykekxa aptawan'ák neptámen xép.”

¹⁹ Xeyenmék axta eyke apwáxok Abraham apkepwagko Dios enakxátekhásók ma'a énxet'ák apkeletsapma axta; máxa axta entahak apxátekhágwokmo enxoho Isaac nepyeseksa énxet'ák apkeletsapma axta, cham'a apxawákxo axta makham apketche Abraham.

²⁰ Mey'áseyam axta keñamak Isaac, cham'a apkelmaxnésesa axta Jacob tén han ma'a Esaú yakwayam enxoho elxawak aksok eltakmela eleñama néten.

²¹ Mey'áseyam axta keñamak Jacob apkelmaxnésesa aksok eltakmela José apketchek amonye apketsapma, yetlo aptaskapeykha axta apkenmáha apkelpeykáso Dios.

²² Mey'áseyam axta keñamak José apkeltennasama amonye apketsapma peya elántépok énxet'ák Israel ma'a yókxexma Egipto, appekencháseykxék axta nahan appeywa apkeltamhókxa kóltemésesek apyókxa.

²³ Megkalya'áseyam axta keñamak Moisés enchána ekpósama sekxo' apteyékmo ekweykmoho apkántanxo pelten; hakte wetayak axta aptaha sakcha'a aptakmela, axta kalakak apmokókxa etnehek wese' apwányam apkeltamho kólnápok sakcha'a apkelennay'a.

²⁴ Mey'áseyam axta keñamak Moisés megyepmenyého kóltehek Faraón apketche étche, cham'a aptaha axta apwányam;

²⁵ Apmenyék axta aksa Moisés kasók kéltemésesakxa xamo' ma'a Dios énxet'ák apagkok nak, mopmenyék axta kamok apwáxok ma'a ektémakxa nak negyespagko mólya'asáxma.

²⁶ Xeyenmék axta apwáxok Moisés ektakmela kawakxohok nahan ma'a ektémakxa nak kélwanyémo Mesías aptaha nak Dios apkelyéseykha, mopmenyék axta kapeykesásekxak apwáxok ma'a aksok eltakmela ekhéyak axta Egipto; hakte xéneykha axta cha'a apwáxok ma'a aksok apxeyenma axta egkések Dios.

²⁷ Mey'áseyam axta keñamak Moisés apteyapma yókxexma Egipto meyke apkeye wese' apwányam aplo; axta eyenseykmok ma'a ektémakxa axta ekxeyenma apwáxok yakweykenxa etnehek, máxa axta entemék apwetaya enxoho m'a Dios meteymap nak.

²⁸ Mey'áseyam axta keñamak Moisés apkelana ekhem melwagkayam apyeykhaya axta aksa Dios apchásenneykha ektekyawa egyap, apkeltamhok axta kóltexnagkok éma tegma apatña'ák, yakwayam enxoho megyakhek Dios apchásenneykha ektekyawa egyap xama enxoho m'a Israel apketchek metnaha apketkók nak.

²⁹ Melya'áseyam axta keñamak énxet'ák Israel apkelyeykhaya m'a wátsam ekwányam ekyexwasé, máxa axta entahak ma'a meykexal'a yegmen; keñe axta apmoko eykhe nahan etnahagkok ma'a énxet'ák apkeleñama axta Egipto, apsawhekpók axta apkelweywegko.

³⁰ Melya'áseyam axta keñamak énxet'ák Israel appallakmo axta aksa kélhaxtegkeso nepyáwa tegma apwányam Jerico, cham'a ekwokmo axta siete ekhem aphaxnencheyam xa énxet'ák nak.

³¹ Megkay'áseyam axta keñamak Rahab, megkatsapawo xamo' ma'a énxet'ák meyke apkelyaheykekxoho nak, hakte kelápeyha axta m'a énxet'ák Israel ektaha axta apteyánegweykmoho yókxexma yakwayam elano', cham'a Rahab ektaha axta ekyakmagkáseyak pók énxet ekpathéteyak ektegye selyakye.

³² ¿Yaksak eyéméxko axének kaxwo' ko'o? Masawhók sat ko'o neyk sekxeyenma m'a Gideón, tén han ma'a Barac, tén han ma'a Sansón, tén han ma'a Jefté, tén han ma'a David, tén han ma'a Samuel tén han ma'a apyókxoho énxet ektaha nak apkellegaso Dios appeywa.

³³ Melya'áseyam axta keñamak apmoma mók apkelókxa xa énxet'ák nak, apkelánegkek axta apkeltémakxa ekpéwomo, apkelxawáyak axta m'a apmáheyo axta egkések Dios, apkelahakkásékxeyk axta atña'ák yamakméwa,

³⁴ apmasések axta anhan ma'a táxa eyálewe ekyawe axta, xegkesek axta etekyók xa énxet'ák nak, apkelyennákxók axta eyke m'a apkelyelkamákpoho axta, apmelyéha'ak axta anhan neyseksa kempakhakma, apkelmallanmeyk axta nepyeseksa apkelenmexma.

³⁵ Yetneyk axta anhan kelán'ák elxawákxo axta étchek kélnakxátekháseyam, cham'a apkeletsapma axta. Apkeletsepmeyk axta anhan nápakha énxet eñama kélnaktawáseykegkoho, mopmenyék axta kólchexeykxak, yakwayam enxoho étak ektakmela ekyennakte apnenyek natámen apnakxátekhágwayam.

³⁶ Keñe axta anhan nápakha énxet apkelesmésakpo, aptekyaweykha axta anhan nápakha, weykmók axta anhan kélpextetma kélheseykmo m'a sẽlpextétamakxa.

³⁷ Nápakha énxet axta anhan kélyetneyk meteymog aptekyawoma, keñe axta anhan nápakha kélpáxkatma nepyeseksók aptekyawoma, keñe axta anhan nápakha énxet apkeletsapma eñama kélyetxéyak sawo; yetneyk axta anhan énxet'ák mexneykha axta aksa, wánxa axta aksa apkelántaxno m'a nekkések apyempehek tén han ma'a yát'ay apyempehek; apyósekak axta xa énxet'ák nak, kélnaktawáseykegkók axta anhan xa.

³⁸ Axta elásekhamakpok keso náxop, hakte tásek axta apkeltémakxa, apkelwenchámeykha axta aksa nahan yókxexma meykexa énxet, tén han ma'a neyseksa xóp elekhaheyak elyawé nak, tén han ma'a neyseksa meteymog áxwa'a nak, tén han ma'a máxek elmatawóneg nak.

³⁹ Wánxa agkok, axta eyke elxaweykegkok aksok apxeyenma axta egkések Dios xa énxet'ák nak, leklamók axta eyke apwáxok Dios eñama m'a ektémakxa axta melya'áseyam;

⁴⁰ apkeláneykxeyk axta Dios aksok ektaha nak ektakmela agko', hakte negko'o axta xeyenmak apwáxok, yakwayam enxoho kóltemésesek apkelpéwomo xa énxet'ák nak eñama segyepetcheyo negko'o.