GÁLATAS 6 - Lengua Sur (Enxet) Nuevo Testamento

Kólteme kélpasmomáxkoho

¹ Elyáxeg, kélwet'ak agkok kéxegke apteyekmo xama énxet eñama apkelané mey'asáxma, kéméxchek kéxegke kólpasmok kóllánekxések xa énxet nak, kéxegke kéltaha nak appeykesáseyak Espíritu, wánxa agkok, kóltakmelchesho kéllánekxéso yetlo kélásekhayo, tásek nahan kóltakmelcheshok kéltémakxa, keykkónek nahan katnehek kéxegkáxa.

² kólpasmaxkoho cha'a kéxegke yakwayam enxoho kólenmaxaxkohok ma'a ektémakxa nak ekyentaxnamo kélha, kéltemék agkok xa, kóllának ma'a eltémókxa nak antehek Cristo segánamakxa apagkok.

³ Apkeneykek agkok etnahak néten xama énxet apteme enxoho mékoho, yának nakso' ma'a ektaha nak megkamámnaksoho.

⁴ Enxama cha'a kéméxchek etnehek apkelányo apagko' ma'a aptémakxa nak, leyawók agkok apwáxok ma'a aptémakxa nak, tásek kalkohok apwáxok ma'a aptémakxa apagko' nak, háwe yetlo apkelányo m'a apkeltémakxa nak pók énxet'ák.

⁵ Hakte negyókxoho negko'o kéméxchek cha'a antehek nenláneykegkoho egagko' nentémakxa.

⁶ Negko'o ektahakxa enxoho sẽlxekmóso eñama nak tásek amya'a, kéméxchek cha'a ampasmok ma'a énxet ektahakxa enxoho sẽlxekmóso, cham'a ekyókxoho aksok eyéméxchexa enxoho.

⁷ Nágkólteme megkólakhémo kéxegke ektémakxa nak elchetamso kélwáxok: méko kawának kasmaksek Dios. Aksok kélcheneykekxa nak, kanakxaxchek nahan ekyexna.

⁸ Enxet ektahakxa enxoho apkelenxáneykmoho apkelané m'a aksok ekmaso apyespagkamakxa nak ektémol'a agkenekxak aksok aktek, étak sat nétsapma ekyakmageykekxa xa, ektémol'a annakxek ekyexna aksok negkeneykekxa. Enxet ektahakxa enxoho apkelenxáneykmoho apkelané m'a ekleklamókxa nak apwáxok Espíritu, Espíritu sat nahan kañék exkak ma'a ekyennakte egnenyek megkatnegwayam enéxa nak, ektémol'a annakxek ekyexna aksok negkeneykekxa.

⁹ Kéméxchek negko'o mehenleklágwomek nenlané m'a nentémakxa ektakmela nak, hakte agkok henleklágwokmok negko'o, agwetak sat ekyakmageykekxa ekwokmo sat ekhem, ektémol'a annakxek ekyexna aksok negkeneykekxa.

¹⁰ Ekeso eñamakxa eyéméxko nak cha'a negko'o ampasmok apyókxoho énxet, ekyagwánxa agkok ma'a ẽlyáxeg'a apteme nak melya'áseyam, cham'a ekyetnakxa enxoho cha'a yakwayam ampasmok.

Sẽléso tén han néxa ekxeyenma egwáxok

¹¹ Kóllano hana kéxegke, elyánchesások kaxwo' sektáxéseso kéxegke; ko'o ahagko' nahan sektáxéso.

¹² Enxet'ák apkelyáteyeykegkoho nak cha'a kéxegke kóllának ma'a kélkahaso kélyenyekhamol'a egyempehek, hákho aptamhéyak xa apmenyék yepmenyéhok énxet'ák, yakwayam enxoho anhan megkólmenxenmakha eñama apkeltenneykha m'a apketsapma axta Cristo néten aksok ektegyéso.

¹³ Wánxa agkok, akke esawhomók nahan apkeláneyak eltémókxa antehek segánamakxa m'a énxet'ák ekha nak ma'a sẽlkahaso kélyenyekhamol'a egyempehek. Apmenyék cha'a kóllanagkok kéxegke sẽlkahaso kélyenyekhamol'a egyempehek xa énxet'ák nak, yakwayam enxoho kaleyxkohok apkelpeywa exének ektaha apkelyáteyeykegkoho kóllának kéxegke xa sẽlkahaso kélyenyekhamol'a egyempehek.

¹⁴ Ko'o nak se'e, momenyék keyxkohok sekpeywa axének xama aksok enxoho, wánxa keyxkohok sekpeywa axének ma'a apketsapma axta Cristo néten aksok ektegyéso; máxa ektemésesók ko'o ekmassegweykmo enxoho ektémakxa nak aksok keso náxop, máxa nahan ektemék ko'o xa sekmassegweykmo enxoho magwanmexmo m'a ektémakxa nak keso náxop, eñama m'a apketsapma axta Cristo néten aksok ektegyéso.

¹⁵ Méko katnehek ekyetna enxoho sẽlkahaso kélyenyekhamol'a egyempehek, esenhan ma'a méko enxoho; akke ektakmela agko' ma'a sentemesáseykekxa nak eghaxnagcha'ák Dios.

¹⁶ Emenyék ko'o keytek meyke ektahakxa apwáxók, tén han Dios segemleykekxoho apyókxoho énxet'ák aptamhéyak nak sektémakxa nak ko'o, tén han ma'a apyókxoho énxet'ák ektaha nak ekmámnaksoho Dios énxet'ák apagkok.

¹⁷ Kaxwo' eyke momenyék ko'o helyánchesesamhok ekyentaxnamo ewáxok kélxama enxoho: hakte keso ekxekmóso ko'o sektaha Jesús apchásenneykha s'e kélyensáseykha nak empehek.

¹⁸ Elyáxeg, Wese' egegkok Jesucristo sat etnehek apméso naksa kélyókxoho kéxegke m'a ektémakxa nak segemleykekxoho. Katnahagkok sat.