GÁLATAS 5 - Lengua Sur (Enxet) Nuevo Testamento

Kóllenxanmoho kélwaskápeykekxoho eñama m'a kélchexeykekxa nak

¹ Egmések axta negko'o Cristo yakwayam hẽlchexeykxa' nentéma axta máxa nelmomaxche, yakwayam enxoho antehek mólmomaxche. Ekeso eñamakxa seltamho nak ko'o kólwaskápekxohok kéxegke kólmeyók xa kéltemésesama nak kaxwo' megkólmomaxche, nágkóltemekxa makham kéxegke máxa kélmomaxche.

² Kóleyxho hana sekpeywa. Ko'o Pablo eltennásek kéxegke, mopwanchek sat epasmok kéxegke Cristo xama enxoho, cham'a kél'awo enxoho kélkahásexko kéxegke m'a kélyenyekhamol'a egyempehek.

³ Emenyék ko'o altennásekxohok kéxegke m'a énxet ektahakxa enxoho kélkahaso kélyenyekhamol'a egyempehek, esawhohok elának ma'a eltémókxa nak antehek segánamakxa.

⁴ Kéxegke kélmámenyého nak exének Dios kéltaha kélpéwomo eñama kéllané m'a eltémókxa nak antehek segánamakxa, massék kéltaha kélyepetcheyo Cristo, kélyenyókek nahan kéxegke m'a memyagweykekxa nak segméso Dios ma'a segásekhayo nak.

⁵ Wánxa agkok nelhaxneyk negko'o henxének Dios nentaha nelpéwomo eñama m'a Espíritu, tén han eñama m'a nenteme nak magya'áseyam.

⁶ Nentemék agkok negko'o negyepetcheyo Cristo, méko katnehek ekha enxoho sẽlkahaso kélyenyekhamol'a egyempehek esenhan ma'a méko enxoho. Akke tásek keytek negko'o m'a magya'áseyam nak, cham'a magya'áseyam sentemésesamol'a ekha nelásekhamaxkoho.

⁷ Tásek axta kélyetlo kéxegke m'a ámay ektakmela nak. ¿Yaksak megkahayo kéxegke kóltehek kélyaheykekxoho m'a amya'a ekmámnaksoho nak?

⁸ Háwe axta Dios apteméseso kéxegke xa, cham'a aptaha axta apkelwóneykha kéxegke.

⁹ Katnohok cha'a amya'a se'e: “Ketsék kempáseyak awanchek kampasagkok apyókxoho hótahap kélyelakteso”.

¹⁰ May'ásekmok ko'o peya megkatnehek kéxegke mók ektémakxa elchetamso kélwáxok eñama negyepetcheyo Wese' egegkok; Dios sat eyke eñásesagkohok xa énxet aptawasáseykencha'a nak elchetamso kélwáxok kéxegke, megkeyxek ma'a aptémakxa enxoho.

¹¹ Ko'o nak se'e elyáxeg, elenxanakmók agkok makham ko'o seltémo kalanaxchek ma'a sẽlkahaso kélyenyekhamol'a egyempehek, meheyakmasha axta exaha ko'o énxet'ák judíos, hakte ektemék axta agkok ko'o xa, megkallókasek axta énxet'ák judíos ma'a amya'a ekxénamaxche nak Cristo kélyepetcheso axta aksok ektegyéso.

¹² Emenyék ko'o elyakténhok apagko' apancha'ák énxet'ák aptawasáseyncha'a nak kéxegke ektémakxa nak elchetamso kélwáxok.

¹³ Elyáxeg kélwóneyha axta kéxegke yakwayam enxoho megkóltemésesek máxa kélmomaxche. Wánxa agkok, nágkólásenneykxa aksa kéxegke xa kélteme nak máxa megkólmomaxche, yakwayam kólyeykhasaxkohok kóllának ma'a aksok ekyespagko nak kélyókxa. Akke tásek kóltehek kéxegke m'a kélpasmomáxkoho nak eñama kélásekhayo.

¹⁴ Hakte keso ektaha nak eksawhomo ekyókxoho ektémakxa nak eknaktáxésamaxche segánamakxa s'e: “Yásekhoho pók, ekhawo ektémakxa nak apchásekhamakpoho apagko' xép.”

¹⁵ Kólawho kéxegke, hakte kéltemék agkok kélenmexamaxche tén han kélnaktawásencha'a enxoho kélnámokkok, kélnaktawásamáxkoho kélagko' sat kóltehek kéxegke.

Negyespagko nenteme nak énxet tén han axnagkok nentémakxa eñama nak Espíritu.

¹⁶ Ekeso eñamakxa sektaha nak seláneya kéxegke s'e: kólho kéxegke etnehek appeykesáseyak Espíritu, nágkóltegyaha cha'a yakwayam kagkések ekpayheykekxa kélwáxok ma'a aksok ekmaso kélyespagko nak.

¹⁷ Hakte enmexma cha'a katnehek Espíritu m'a aksok ekmaso negyespagko nak, apkenmexma nahan etnehek Espíritu m'a aksok ekmaso negyespagko nak. Elenmexamaxche katnehek xa ánet nak. Ekeso eñamakxa megkólewagko nak kéxegke kóllának ma'a kélmokókxa enxoho kóllának.

¹⁸ Aptemék agkok kéxegke appeykesáseyak Espíritu, kamaskok kélwehenákxoho kéxegke m'a eltémókxa nak antehek segánamakxa.

¹⁹ Ñohok cha'a agyekpelkohok aksok apkeláneyak ma'a énxet apkeláneykegkoho nak aksok ekmaso apkelyespagkamakxa nak: elanagkok cha'a m'a ekmaso nentémakxa mansexta nak, tén han elanagkok cha'a m'a aksok ekmanyása nak, tén han elyeykhasakpohok cha'a apmáheyo elanagkok ma'a mansexta nak,

²⁰ etnehek nahan cha'a apkelpeykesamo m'a aksok kéleykmáseso nak, etnahagkok nahan cha'a m'a apkeltémakxal'a kelyohóxma. Melwátésemek nahan aptaknagko pók, tén han apkelenmexamap, tén han apnatha pók. Ñohok nahan cha'a ellók, etekkesesek cha'a apkelenmexamap énxet, tén han etekkesek cha'a apkexpanchásamap énxet, etnahagkok nahan cha'a apkelánesamakpoho mók nekha.

²¹ Elwok cha'a eyásekkesek pók aksok apagkok, anmenát'ák nahan, megyeksek nahan cha'a emayhagkok aptéyak, tén han elanagkok cha'a m'a mók aksok ekhawo nak xa. Eltennásek ko'o kéxegke seyésa xa, ekhawo m'a sektahakxa axta seláneya kéxegke nano' axta, megkawakxók sat apkelteme Wese' apwányam apagkok Dios énxet'ák aptamhéyak nak xa ektaha nak.

²² Akke ektaha nak aptekkeso Espíritu s'e: nelásekhamaxkoho, ekpayheykekxa egwáxok, meyke ektahakxa egwáxok, mampekhésamaxche, negapeykha egmók, ektakmeleykha egwáxok, mantemeseseykmohoxma egmók,

²³ megkeymáxkoho egwáxok, tén han negmowána anlanagkohok nentémakxa. Méko xama segánamakxa enmexma xama enxoho xa.

²⁴ Massék kaxwo' apkelánégko aksok apkelyespagkamakxa m'a Cristo énxet'ák apagkok nak, cham'a aksok ekmaso apkelmopmenyého axta, máxa axta entahak apkelyepetchesa enxoho aksok ektegyéso m'a ekyókxoho ekmaso nentémakxa nak.

²⁵ Egmések agkok negko'o Espíritu ekyenneykha egyempehek, kéméxchek óghok nahan hempékesesagkok Espíritu.

²⁶ Mantehek hana neleymáxkoho, tásek nahan mantekkesek nelenmexamaxche, tén han mantehek nennathaheyak egmók.